Nederland

Nederland Nederland
Informa jeneral
Capital:	Amsterdam
Lingua ofisial:	Nederlandes
Dirije
Governa:	Monarcia constitual
- Xef de stato:	Re Willem-Alexander der Nederlanden
- Xef de governa:	Ministro xef Mark Rutte
Otras
Area:	41 543 km²
Popla:	17 000 074
Densia:	404,8
PIB:	USD 706 955
Mone:	Euro (€, EUR)
Zona de ora:	UTC+1, UTC+02:00
Numero de telefon:	+31, +599
Interede:	.nl

Nederland es un nasion locada xef en Europa ueste, con tre munisipas spesial en la Caribe: la isolas de Bonaire, San Eustasio, e Saba. En Europa, lo es bordada par Deutxland a la este, Beljia a la sude, e la Mar Norde a la norde-ueste, con Britan a la otra lado. Nederland (Nederland [ˈneɪdərlɑnt] en nederlandes; Nederlân en frisce ueste; e Hulanda en papiamento) es un pais en Europa cual es parte de la Rena de Nederland (Koninkrijk der Nederlanden; "der" es gramatica vea per "van de" ("de la")). Nederland sinifia leteral "Tera Basa".

La area es sirca 41,848 cilometres cuadrida. En la anio 2011 la pais ia ave sirca 16,660,700 abitores. La site capital es Amsterdam (Holland-Norde), e la seja de la governa es Den Haag (Holland-Sude). La site tre es Rotterdam. (Holland-Sude).

La site la plu grande en Nederland es Amsterdam, Rotterdam, Den Haag, e Utrecht. Amsterdam es la site con la plu abitores en la nasion, e es la capital "ofisial" (pd par tradision); Den Haag es la loca de Statos Jeneral, la Consilio, e la Corte Suprema. La porto de Rotterdam es la porto la plu ativa en Europa, e la plu ativa en cualce nasion estra Asia este e sude-este, pos Xina e Singapor. La airoporto a Amsterdam - Schipol - es la airoporto la plu ativa en Nederland, e la airoporto tre en Europa.

Nederland es un membro orijinal de la Uni European, la Eurozone, la G10, NATO, OECD, e WTO, e un parte de la Area Schengen e la Uni Benelux (composada de Beljia, Nederland, e Luxemburg (Be-ne-lux). Lo es la ospitor de multe organizas intergovernal e cortes internasional, multe de cual es sentrida en Den Haag, cual ave la nometa "la capitol legal de la mundo".

Nederland es numero 12 de paises la plu densa en la mundo, e numero du en la Uni European, con un densia de 521 abitores per km2. An tal, Nederland es numero du en esporta de comeda e produidas cultivada, pos la SUA, la resulta de sua tera fertil, clima temperada, cultiva intensa, e inventosia.

Nederland ia es un monarcia parlamental e constitual con un strutur unial de 1848. La pais ave un tradision de verzuiling, cual indica ce grupos sosial pote defini multe de sua regulas autonom de otras. Lo ave ance un reputa longa per tolera sosial, e ia legali aborta, prostitui, e eutanasia, e lo ia manteni un politica libral de drogas. La Nederland ia elimina la puni de mori en sua leges sivil en 1870. Lo ia permete la vota par femes en 1919, e deveni la nasion prima cual legali sposi entre persones de la mesma seso.

La economia de Nederland es un tipo de mercato miscada avansada e ia ave un revenu per person 13 en la mundo. Lo es listada como la pl alta en indicas internasional de libria de jornalisme, libria economial, developa umana, cualia de vive, e felisia. En 2019, Nederland ia es gradida la economia como numero 11 como mesurada par la produi interna bruta (GDP) per person. En 2019, lo es gradida como numero 10 a la indise de developa umana.

Jeografia

La partes de Nederland cual es plu alta ca la mar

La nom Nederland sinifia "la pais basa", cual refere a sua altia basa e topografia plata. Sola 50% de sua tera es plu ca un metre supra la nivel de mar, e cuasi 17% es su la nivel de mar. La areas su la nivel de mar, nomida polderes, es la resulta de reclama de tera cual ia comensa en la sentenio 16.

La pais es divideda en du partes xef par tre rios, la Reno, la Maas, e la Schelde. Esta rios opera como un ostaculo natural entre la feudos temprana e de asi ia crea un divide cultural, como videda en alga cualias fonetical reconosable norde e sude de esta "Rios Grande".

Provinses

La provinses e munisipas de Nederland

Nederland ave des-du provinses e tre munisipas spesial (Bonaire, Saba, e San Eustasio).

Politica

La indui de Re Willem-Alexander e Rea Maxima, 2013

Nederland ia es un monarcia constitual de 1815 e un democratia parlamental de 1848. La monarca (de 1980 la rea Beatrix) ia es la xef de stato. La Rea Beatrix ia renunsia la trono en favore a sua fio, Willem-Alexander (45 anios) en april 2013, cuando la rea ia ave 75 anios. Esta ia es la ves prima en 103 anios cuando la Rena ia ave un re e no un rea.

La potia de esecuta es formida par la Consilio de Ministros de Nederland (Ministerraad en nederlandes). La ministro xef de setembre 2012 es sr. Mark Rutte de la VVD (Volkspartij voor Vrijheid en Democratie - Uni per Libria e Democratia). El es la xef de un alia political.

Linguas

La lingua major es nederlandes, ma frisce, platdeutx e limburgan es ance parlada, e on ave ance un cuantia grande de persones ci parla otra linguas, como sranan, turces, indonesian, etc. On ave ance multe persones de Maroco ci parla berber e arabi. La lingua ofisial es nederlandes, e linguas co-ofisial es engles, papiamentu, e frisce ueste. Linguas reconoseda es sason basa nederlandes, limburges, ides e sinti romani.

Etnicos

77,39% de persones en Nederland es nederlandes (2017), con 9.88% composada de otra europeanes. 2.34% es turces, 2.29% es marocan, 2.13% es malucu e otra indonesian; 2.05% es surinames; .90 es caribe nederlandes; .23% es otra americanes; e 2.80% es de otra orijinas.

Relijios

50.1% de nederlandeses no ave un relijio (2017). 43.8% es cristian, con 23.7% catolica, 18.1 protestante, e 2.0% otra cristianes. 4.9% es muslim, e 1.2% otra relijios, incluinte budisme e induisme.