Venus

Venus (simbole: ) es la planeta du de la Sol, e orbita lo en 224,7 dias. Pos nosa Luna, Venus es la ojeto la plu briliante en la sielo a note, con fortia parente de -4,6 (masima). Videda de la Tera, Venus pare resta sempre prosima la Sol, de cual sua distantia angulal masima es 47,8%. Venus deveni la plu briliante pronto ante la leva de sol, o pronto pos la reposa de sol, e per esta razona on nomi lo la stela de matina o la stela de sera.

Vista de Venus de Mariner 10, en colores real.

Venus es un planeta terin, e on ia descrive lo como la sore de la Tera, car la du ave grandia e composa simil. La planeta es covreda con un strato opaca de nubes refletante, e sua surfas no pote es videda de spasio en lus vidable. Venus ia es la sujeto de multe divinas asta la descovre de alga de sua secretas par siensa planetal en la sentenio 20. Lo ave la atmosfera la plu densa de la planetas terin, xef composada de dioside de carbono, e la presa atmosferal a sua surfas es plu forte a 90 veses ca lo de la Tera.

La surfas de Venus ia es descriveda en mapas detaliosa sola en la 30 anios resente. On vide atesta de multe ativia volcanal, e alga volcanes es cisa ativa ance oji. Diferente de la move constante de la crosta de la tera, siensistes crede ce la crosta de Venus sumerji rapida (en alga milion anios) a un ves en sirca sento milion anios, e deveni resiclida.

Venus es nomida per la diva roman de ama, e la plu de la ojetos a sua surfas es nomida per femes famosa de mitolojia.

Atmosfera

La atmosfera de Venus es multe densa, composada de 96% CO₂, 3% nitrojen, e otra gases. En la surfas, la presa atmosferal es plu densa a 90 veses ca lo de la Tera, e la temperatur es prosima 500 °C. A contra, a 50 cilometres supra la surfas, la temperatur e presa atmosferal es sirca la mesma de los de la Tera, e esta es la local la plu simil a la Tera en la sistem solal. La siensiste Geoffrey A. Landis ia publici un paper cual asentua ce nos debe vade no a Marte pos la Luna, ma a Venus.

Esplora de Venus

Un sonda sirca la planeta, nomida Venus Express, ia es realida par la Ajenteria Spasial de Europa. Venus Express ia ariva a la planeta en 2006, e sua mision ia fini en 2014.

Referis

Colonization of Venus, Geoffrey A. Landis