Basin mediteraneo
La basin mediteraneo es la rejion sirca la Mar Mediteraneo cual ave la clima mediteraneo, con invernos moderada e pluvosa, e estates calda e seca, cual suporta la forestas, bosces, e subosces tipal mediteraneo. La basin covre partes de tre continentes: Europa, Asia, e Africa.
La basin ave un topografia variada e contrastante. Lo ofre un vista continuante cambiante, de montes alta, costas rocosa, bosces nonpenetrable, stepes semiseca, pantanes costal, plaias arenosa, e multe isolas de grandias e formas variosa, e un mar clar e blu. La mediteraneo ave multe colinas, e montes pote es videda de cuasi cualce loca.
Neandertales ia abita en Asia ueste e la partes de Europa nonglasida, comensante sirca 230,000 anios ante aora. Umanas moderna ia move a Asia ueste de Africa min ca 100,000 anios ante aora. Esta umanas, cual nos nomi cromagnones (de la loca en Frans en cual sua restas ia es prima descovreda) ia entra Europa sirca 50,000 a 40,000 anios a ante.
La periodo glasial la plu resente, la glasi Wisconsin, ia ateni sua estende masima sirca 21,000 anios ante aora, e ia fini sirca 12,000 anios ante aora. Un periodo tempera, nomida la clima la plu bon de la olosene, ia segue la eda glasial.
Sereales, incluinte trigo, xixes, e olivas, e oveas e capras, ia es domada en la mediteraneo en la milenio 9 aec, cual ia permete la institui de colonias de cultivores. La colies de Asia ueste ia sperde a Europa sude-este en la milenio 7 aec. Papaveras e avena ia es domada en Europa de la milenio 6 a la milenio 3 aec. Vilas de cultivores ia sperde sirca la basin mediteraneo. La construis de grande petras, conoseda como Megalitos ia es construida en Europa de 4500 a 1500 aec, indicante un move a un forma de sosia plu sofisticada.
La forti de la monsones de estate de 9000 a 7000 anios ante aora ia crese la pluve tra la deserto Sahara, cual ia deveni un savana, con lagos, rios, e pantanes. Pos un periodo de nonstablia de clima, la Sahara ia deveni un deserto denova per la milenio 4 aec, e resta como lo asta aora.