Corpora

Un corpora es un compania o grupo de persones cual es autorida par lege a ata como un person. Lo es ance conoseda como un "person de lege" (legal person o juridical person en engles, en contrasta con la "person natural").

Istoria

La parola "corpora" ia es derivada de la parola latina corpora, e un coletiva de persones ia es un "corpora de popla". La lege roman en la sentenio 6 ia ave alga tipos de corpora, como universitas, corpus e collegium. Governas, eglesas, sindicatos e grupos political ia es corporas en Roma, e ia posese diretos de posese proprias e suscrive en contratos en la nom de la corporas.

En la sentenio 17, paises european ia permete la constitui de corporas per venturas colonial. La rea de Britan ia emete la constituis a La Compania de la Baia Hudson (The Hudson's Bay Company) e La Compania de India Este (The East Indian Company).

En la lege moderna, corporas es formida per condui comersial, e sua propriores e dirijores es protejeda de obligas finansial en caso de fali. En jeneral, on debe rejistra con la governa nasional (statal o provinsial en paises federal) per crea un corpora. Corporas debe normal ance paia impostas.  

Leges de corporas

En la SUA

En la SUA, la governa statal es encargada de la corporas. Cada stato ave un Secretor de Stato, ci dirije la arcivo de corporas. (No confusa esta con la Secretor de Stato de la governa federal, ci es la ministro de esternas de la SUA.) On pote crea corporas comersial, o corporas nonprofitante. La corporas nonprofitante es esenta de cuasi tota impostas. La Codigo de Revenu Interna (Internal Revenue Code) de la governa federal regula ance la atas de la corporas nonprofitante.

La Corte Suprema de la Statos Unida de America, en la caso de "Sitadanes unida contra la Comision Federal de Eleje" (Citizens United v. Federal Elections Commission), ia redise ce la corporas es reconoseda como persones en la lege SUA, e los posese diretos su la Constitui de la SUA.

En Canada

En Canada, la lege federal Lege Canadian sur la Companias par Atas (Canada Business Corporations Act/Loi canadienne sur les sociétés par actions) (R.S.C. 1985, c. C-44) governa la institui e regula de companias comersial constituida su la governa federal de Canada.

Corporas nonprofitante es governada su la lege federal Lege Canadian sur la Organizas sin Intende de Profitas (S.C. 2009, c. 23) (Canada Non-Profit Corporations Act/Loi canadienne sur les organisations à but non lucratif).

Cada governa provinsial ance ave sua propre leges e regulas de corporas. On pote eleje corpora un compania o como un corpora federal, o un corpora provinsal. En la lege federal, e en cuasi tota provinses, on debe crea un constitui de corpora (Article of Incorporation/Statut constitutif); en Isola de Prinse Eduard, on debe reseta un letera patental de la governa de la provinse; en Scotia Nova, on crea un corpora par un "nota de asosia".

Tipos de Corporas

SUA

Corporas comersial

• C Corporation (Corpora C)
• S Corporation (Corpora S)
• Limited Liability Corporation, LLC (Sosia a Responsabilia Limitada, S.a.r.l.)
• Benefit Corporation (Corpora Beneficante) - en alga statos
• Limited Partnership, LP (Asosia Limitada)
• Limited Liability Partnership, LLP (Asosia de Responsabilia Limitada)
• Professional Corporation, PC (Corpora Profesal)

Corporas nonprofitante, e la categorias federal

• 501(c)(1): Corporas creada par la Congresa; cooperativas federal de credito (Federal Credit Unions)
• 501(c)(3): Organizas carital, relijial, de instrui, cultural o siensal
• 501(c)(4): Organizas de aida sosial o sivil
• 501(c)(5): Sindicatos laboral
• 501(c)(6): Asosias comersial, o cameras de comersia
• 501(c)(7): Clubes sosial con membros
• 501(c)(8) e (10): Fraterias
• 501(c)(9): Asosias beneficante per empleadas
• 501(c)(14): Cooperativas statal de credito
• 501(c)(16): Cooperativas cultival
• 508(c)(1)(A): Eglesas
• 527: Comites de Ativa Political (Political Action Committees, "PAC")

Canada (federal)

• Corporas de comersia (Business Corporations/Sociétés par actions)
• Corporas sin intende de profitas (Non-profit Corporations/Organisations à but non lucratif)
• Cooperativas (Cooperatives/Coopératives)
• Cameras de comersia (Boards of Trade/Chambres de commerce)

Europa Continental

• Sosias Anonim (SA, AS, o A/S)
• Sosias a Responsabilia Limitada (S.a.r.L.) en Portugal
• Aktiebolag (AB) - corporas limitada en Sveria o Suomi
• Ansvarlig selskap (ANS) - asosias comersial
• Aktiengesellschaft (AG) - corporas limitada en deutx
• Naamloze vennootschap (NV) - corporas limitada en nederlandes
• Gesellschaft mit beschränkter Haftung (GmbH) en Deutxland, un compania de encarga limitada ("gemeinnützige GmbH" es un corpora sin intende de profitas)
• Osakeyhtiö (Oy) - companias de responsabilia limitada en Suomi

Britan e Ireland

• Companies limited by guarantee (companias limitada con garantia)
• Companies limited by shares (companias limitada con asiones)
• Public Limited Companies (PLC) - Companias Limitada Publica
• Charitable Incorporated Organizations (CIO) - Organizas Incorporada Carital
• Community Interest Companies (CIC) - Companias con Interesa Comunial ("emprendes sosial," como la Corporas Beneficante o la "B Corporations" en la SUA)

Japan

Corporas comersial

• 株式会社 Kabushiki-gaisha (K.K.) - Companias limitada con asiones
• 合同会社 Godo-gaisha (G.K.) - Companias de encarga limitada (como LLC american e S.a.r.L. portuges)
• 合名会社 Gomei-gaisha (Gm.K.) - Companias en nomes coletiva
• 合資会社 Goshi-gaisha (Gs.K.) - Asosias limitada

Corporas publicas

• 独立行政法人 Dokuritsu-gyosei-hojin - corporas dirijal independente
• 地方独立行政法人 Chiho-dokuritsu-gyosei-hojin - corporas dirijal independente local
• 国立大学法人 Kokuritsu-daigaku-hojin - corporas de universia nasional
• 公立大学法人 Koritsu-daigaku-hojin - corporas de universia publica (prefetal o munisipal)

Corporas sin intende de profitas

• 財団法人 Zaidan-hojin - fundas carital
• 社団法人 Shadan-hojin - corporas de benefica mutua de los membros
• 学校法人 Gakko-hojin - corporas scolal (universias, liseos privata, etc.)
• 医療法人 Iryo-hojin - corporas medical (ospitales, clinicas, etc.)
• 社会福祉法人 Shakai-fukushi-hojin - corporas per aida sosial
• 宗教法人 Shukyo-hojin - corporas relijial
• 特定非営利活動法人 (NPO法人) Tokutei-hieiri-katsudo-hojin (NPO hojin) - corporas sin intende de profitas