Edward 8
Edward 8 (Edward Albert Christian George Andrew Patrick David; 23 junio 1894 – 28 amio 1972) ia es la re de la Rena Unida e la Dominas de la Impero Brites, e la Imperor de India, de 20 janero 1936 asta sua renunsia en desembre 1936.[lower-alpha 1]
Edward ia nase en la rena de sua duava Rea Victoria como la enfante un de la duxe e duxesa de York, plu tarda Re George 5 e Rea Mary. El ia deveni la Prinsi de Cimri a sua aniversario des-ses, sete semanas pos cuando sua padre ia segue ja como la re. Cuando joven, Edward ia servi en la Armada Brites tra la Gera Mundal Un, incluinte multe turis militar ultramar per sua padre. Como Prinsi de Cimri, el ia es envolveda en un serie de adulteras, cual preocupa sua padre e la ministro xef brites Stanley Baldwin.
A la mor de sua padre, Edward ia deveni la re. Como re, el no ia es pasiente sur la protocol de la corte reial, preocupante la politicistes per sua iniora evidente de la costumes constitual instituida. Sua proposa sposi Wallis Simpson, mera poca menses pos la comense de sua rena, ia causa un crise constitual; ela ia es un american, divorsada ja un ves e divorsante otra ves. La ministros xef de la Rena Unida e la Dominas ia oposa la sposi, argumentante ce un fem divorsada, con du sposes pasada vivente, ia es nonasetable political e sosial como sposa reial futur. En ajunta, un tal sposi ta conflita con la titulo de Edward, xef de la Eglesa de England, cual ia desaproba alora la resposi pos un divorsa si un sposa pasada vive ancora. Edward ia sabe ce la governa Baldwin ta renunsia si la sposi ta avansa; esta ta pote causa un eleje jeneral forsada e ta ruina sua state como monarca constitual politica-neutra. Cuando el no ia pote e sposi Wallis e resta sur la trono, Edward ia renunsia; sua frate plu joven, George 6, ia deveni la re. Con un rena de 326 dias, Edward es un de la monarcas de rena la plu corta en tota la istoria de Britan.
Pos sua renunsia, Edward ia deveni la Duxa de Windsor. El ia sposi Wallis en Frans a 3 junio 1937, pos la divorsa du de ela ia es completada. Plu tarda en 1937, la duple ia turi tra Deutxland Nazi. Tra la Gera Mundal Du, Edward ia es stasionada prima con la Mision Militar Brites a Frans, ma pos acusas ce el es suportor de la Nazis, el ia es nomi Governor de la Bahamas. Pos la gera, Edward ia pasa la resta de sua vive en Frans. El e Wallis ia resta sposada asta la mor de Edward en 1972. Wallis ia mori pos 14 anios.
Jovenia
edita