Gemeinschaft e Gesellschaft
Gemeinschaft e gesellschaft (pronunsiada [ɡəˈmaɪnʃaft] e [ɡəˈzɛlʃaft], aprosima "gemainxaft e gezelxaft"), un espresa deutx per comunia e sosia. Los es categorias usada par la sosiolojiste Ferdinand Tonnies per divide lias sosial entre du tipos sosiolojial cual defini lunlotra. Max Weber, reconoseda jeneral como la creor de sosiolojia, ance ia scrive multe sur la relata entre gemeinschaft e gesellschaft.
Seguente la dicotomia, lia sosial pote es categorida, a un lado, como parteni a interatas sosial personal, e la roles, valuas, e credes fundida sur tal interatas, o a la otra lado como parteni a interatas nondireta, roles nonpersonal, valuas formal, e credes fundida sur tal interatas. La dicotomia ia es proposada como un util pur consetal e no como un tipo ideal en la modo ce lo ia es usada par Weber per asentua elementos clavin de un cabia sosioistorial.
Tonnies ia es un studiante de Thomas Hobbes - el ia edita la edita model moderne de La elementos de lege e Behemoth. Lo ia es sua studia de Hobbes cual coraji Tonnies per dedica se completa a la filosofia de istoria e la filosofia de lege. E lo ia es sujesteda ce el ia deriva ambos categorias de la consetas de Hobbes nomida "acorda" e "uni".
La edita du, publicada en 1912, de la obra en cual Tonnies ia promove plu la consetas, ia deveni un susede nonespetada ma permanente pos la edita plu ia es publicada en 1887 con la sutitulo "Trata sur comunisme e sosialisme como motifes empirical de cultur" Sete plu editas deutx ia segue, la final en 1935, e lo ia deveni un parte de un colie de ideas jeneral, con cual la inteletosas deutx ia es familiar ante 1933. La libro ia inisia un revive de pensa corporaliste, incluinte la asende de neomedievalisme, la crese de suporta per sosialisme de sindicatos, e ia causa cambias major en la campo de sosiolojia.
La consetas ia es ance usada par Weber en Economia e Sosia, cual ia es prima publicada en 1921. El razona ce gemeinschaft es fundida en un "senti sujetal" cual pote es "emosial" o "tradisional". Relatas fundida en "acorda razonante par acorda mutual", la esemplo xef de cual es un contrata comersial.
Alga teoristes razona ce, en cuando globali converti la planeta intera a un tipo cresente distante de gesellschaft, e la politicas de identia coletiva xerca per un reformi imajinal de la cualias de gemeinschaft par recrea artifisial lias de grupos e identias. La desira sentida par los ci debe vive en gesellschaft direta los a enclaves restante de gemeinschaft, an cuando sua esiste es nonevitable corode.