Sajia

La sajia sinifia la sabe e la virtua de un esente. Lo distingui un person ci es en armonia con se mesma e con la otras, con sua corpo e sua pasiones (virtuas de modera e de justia), ci ia cultiva ja sua capasias mental, en armonia con sua atas e sua parolas.

En sua persepi poplal, la sajia es atribuida a la person ci prende desides razonable, an si los difere de sua interesas tempora. La enfantes ci es obedinte e discrete ave la capasia saja.

Istoria

Sajia elinica

Per la filosofistes elinica e en la tradision este, la sajia (sofia en elinica antica) es la ideal de la vive umana. La sajia pote es definida como un state de realia cual fundi se sur un conose de se mesma e de la mundo, e teni compania a un felisia suprema e coresponde a la state de perfeti la plu alta cual la umana e sua spirito pote ateni. La sajia es la "sabe de es felis" o ancora la siensa de la felisia. Alga vias es posible.

La sajia trajedial de Heraclito la oscur presenta aforismes cual esposa la move eterna de la cosas, la cambia cual obliga nos a rexerca la solves, ajustante se a lo a cual on debe abitua se ("Tu no va bani tu a du veses en la mesma rio") par un conose de la razona de la cosas: "la sajia es fada de un sola cosa: conose la "logos" (=razona) cual ata sempre e en cada partes."

De pos Socrate, model de la sajia antica, la Stoicistes e la aderores de Epicuro ia defini la sajia como la mestri de desiras par la razona e la conose de lo cual depende de nos, e de lo cual no depende. La Sofistes clama la relativia de la veria cual los esplica en la parla, en la debate competosa, en la maneja de la retorica, de la lojica e de la resolve de la contradises.

La Academistes rexerca la Bonia Suprema, e Aristotele presenta con cautia la ativias contemplante e teorial per ariva a esta bonia. Socrate predica la refleta, la umilia, la aseta de sua iniora, e la respeta asoluta de la leges de la site (en sua caso, Atina). Presocratal, Parmenide ia esamina en un poesia la via de la es, la via de la non-es, e la posiblia de un via tre. La Sinicas ia insiste sur la idea de joia individua, de severia (aseticisme) e de libria. "No asconde mea sol" la filosofiste sinica Diogene de Sinope ia dise a Alexandro Grande.

Sajia relijiosa

Sajia este

En la Este, ma ance en la Ueste antica, a veses la sajias es difisil a distingui de la mesuras relijiosa, spesial car los es praticada (o ia es ja praticada) a la scala de un comunia de individuas avente la mesma pensa. Buda pote per esemplo es regardada como un mestre de sajia o ance como la fundor de un relijio.

Esta consideras de sajia no es stranjer a la pensa ueste. On retrova esta consideras en la pensa de autores tan diversa como la filosofiste Confuzi, Laozi, la prinse e dramiste indian Sudraka, o la poesiste e matematiciste farsi Omar Khayyam.

Sajia cristian

La sajia cristian de la Anticia tarda e de la Eda medieval no evita esta ambigua: la monces prima, como la filosofistes plu tarda (San Augustino, San Tomas de Acuino…) ia punta ja a esta, crusante sua fide relijiosa con la ideal de sajia, e clar referente a la filosofistes elinica e roman a veses.

Ance la comunias moncal ia es la plu frecuente fundida par la sajas (en la sense clasica de la terma). La autores de alga libros de la Biblia, Qohelet, como la "libro de la Proverbos", identifiada a la Re Salomon, ia nuri multe la refletas relijiosa sur la sajia.

Sajia moderna e pos-moderna

A la comensa de la sentenio 16, la moves como la umanisme, e plu tarda la Filosofia de la Luminadas ia comensa constitui otra sajias, proposante la boni de la state umana par la fide a la razona, e la dana de la dogmas relijiosa. Montaigne recomenda la reveni a la sajia antica, esplicante ce la gusta per la plaser epicural es sola un ama simple per la vive.

Spinoza esplica la sajia par un razona siensal cual afirma la potia de ama e de joia a fas de la desordina turbante de la pasiones. Nietzsche proposa reveni a la consepi de Heraclito de un sajia trajedial fundida sur la aproba de la realia (amor fati: la ama de la destina). En la sentenio 19, la Positivistes como Auguste Comte prende spesifada sua dirije a la progresa tecnical e asosia la sajia a la siensa, movente reatas de la parte de la relijiosas e de la misticas.

An tal, e cuando simil la individuisme ia developa se en la asosias de Ueste, la sajias (como ance la vias de boni de la umana par la individua) ia declina en la mesma tempo, recambiada par la prinsipes puntante a cuieti la pasiones de la jenero umana par medio de solves global, frecuente de ordina economial e/o political (liberalisme, sosialisme, comunisme, anarcisme, etc).

La "bancarota", o a la min la retarda potiosa en causa de esta sistemes, como ance la preda de consensia sirca alga problemes (como la degrada de la ambiente par la asosia materialiste), ia condui ja, de alga desenios, a un repara de interesa per la "sajias", en la sinifia clasica de la terma, en otra parolas la vias permetente ce la individua boni se par un modo de vive ecuilibrada e de un spesie de controla de sua pasiones ante la mundo esterna.

La rexerca de sajia cuando lo es liada a la fenomenos coletiva no es an tal protejeda contra alga falis como en la promove de hipis en la anios 1960–70, o de devias comersial esensal nononesta, per esemplo alga "setas", ma vera de mestres spirital continuante la furni de instruis de sajia, como Swami Prajnanpad e sua disiplo franses Arnaud Desjardins, o la pensores-instruores como Krishnamurti. Pos un fase de manca de interesa par la filosofistes, la sajia presente ia deveni denova un tema sentral de la refleta de nosa tempo: La Sagesse des modernes (La sajia de la modernas, André Comte Sponville e Luc Ferry), Principes de sagesse et de folie (Prinsipes de sajia e de folia, Clément Rosset), L'Amour de la sagesse (La ama de la sajia, Bruno Giuliani)...

Sajia poplal

La sajia poplal sinifia a veses la "sensa comun" o la capasia de fa elejes parente justa, un sajia pratical de la vive cual no nesesa fundi se sur comandas filosofial o relijial.