Sigmund Freud
Sigmund Freud (pronunsiada "zigmunt froit") ia nase 6 maio 1856 en un vila peti — Freiberg — en Moravia. Sua padre ia es un mercator de lana con un mente agu e un bon umor. Sua madre ia es un fem vivosa, la sposa du de sua padre e plu joven par 20 anios. Sua madre ia ave 21 anios cuando el ia pari sua fio prima, sua cara Sigmund. Sigmund ia ave du duifrates plu vea e ses frates e sores plu joven. Cuando el ia ave cuatro o sinco anios (el no ia es serta), la familia ia move sua casa a Wien, do el ia abita per la plu de sua vive.
Un enfante multe intelijente, sempre a la culmina de sua clases, el ia vade a la scola de medica, cual ia es un de la poca elejes per un iudi joven e intelijente en Wien en acel dias. En universia, el ia deveni envolveda en rexerca su la gida de un profesor de fisiolojia nomida Ernst Brucke. Brucke ia crede la reduisme, cual ia es revoluinte ma poplal en acel eda: "No otra fortia ca la fortias comun de cimica e fisica ata en la organisme." Freud ia atenta redui la personalia a neurolojia per multe anios, un idea cual el ia abandona plu tarda.
Freud ia es multe bon en sua rexerca. El ia consentra en neurofisiolojia e ia inventa un tecnica spesial per tinje selulas. Ma sola un cuantia limitada de postos ia es otenable, e multe otra studiantes ia es ante el. Brucke ia aida el a oteni la suporta finansial per studia, prima con la psiciatriste grande Charcot (pronunsiada "xarco") en Paris, e seguente con la oposor de Charcot, Bernheim en Nancy. Ambos esta dotores ia es rexercante la usa de ipnose con istericas.
Pos un periodo corta como un dotor nova en neurolojia e la dirijor de un sala de enfantes en Berlin, el ia reveni a Wien, ia sposi sua prometeda Martha Bernays, e ia comensa sua ofisia medical en neuropsiciatria, con la aida de sua ami Joseph Breuer.
Un pasiente de Joseph Breuder ia ave multe sintomes de isteria (aora nomida "sindrom de converti") como ansia, paralise nonfisical, atacas psicojenetical, etc. La nom de esta fem joven ia es Bertha Pappenheim, ma en la leteratur, on nomi el "Anna O". Breuer ia demanda de Freud sujestas per aida Bertha, e la tre de los ia descovre la idea fundal de psicoanalise: Si on parla sur un problem e trova la radis de lo, la sintomes diminui.
La libros e lesones de Freud ia dona e fama e esclui de la corente xef de la comunia medical. El ia atrae alga suportores multe intelijente ci ia deveni la cor de la move psicoanalisal. Nonfortunosa, Freud ia ave un tende de refusa persones ci no acorda completa con el. Alga ia separa de el en modo amin; otras ia separa de el en modo nonamin, e ia fundi moves competente.
Freud ia migra a England prosima ante la Gera Mundal 2, cuando Wien ia deveni un loca multe perilosa per iudis, spesial los ci ia es tal famosa como Freud. No multe plu tarda, el ia mori de canser de la boca e mandibula, de cual el ia sufri tra la 20 anios final de sua vive.