Aleksej Navalni
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Aleksej Anatoljevitsj Navalni (Russisch: Алексей Анатольевич Навальный, 4 juni 1976, Butyn, oblast Moskou - 16 fibberwarie 2024, Charp, Jamalië) waas 'ne Russischen avvekaot, blogger, politieker en aktivis. Óngere regeringe van Vladimir Poetin en Dmitri Medvedev kaam d'r bekandj te staon es eine vanne veurders vanne Russisch oppositie. Door dem zien veroordeiling in 'n ómstreje percès móch t'r zich sieër 2018 nimmieë kandidaat stèlle veur 't Russisch prizzendentsjap.
In 2012 waas t'r 'nen ónaafhenkelike kandidaat veur 't bórgemeistersjap van Moskou. Doe kaam d'r oet oppe twieëdje plaats.
Navalni waas 'ne veurname aktivis taenge de krupsie in Róslandj en waas t'r d'n oprichter vanne Stichting veur Krupsiebestriejing (Fond borby s korruptsijei). Zien documentaires Tsjaika (2015) en On wam ne Dimon (2017) die hanjelen euvere krupsie in Róslandj woorte väöl bekeken op YouTube.
Navalni en zien aanhengers woorten aktief vervolg door 't rezjiem van Poetin. In augustus van 2019 wós t'r net 'nen aanval mit 't zaenegaas Novitsjok te euverlaeve. Kort dao-op reisdje d'r oppernuuj nao Róslandj, wo d'r ouch drek aangehaje woort, went hae zów de kóndiesjes van zien veurwaerdelike vrielaoting neet in ach gehaje höbbe. Flot daonao kaam van zien organizaasje 't filmke Dworez dlja Poetina ("'t Pelies veur Poetin") oet op YouTube, worin me kan zeen wie Poetin zich e geheim pelies leet boewe det hóngerde miljoene kosdje. Nao zien aanhajing woort Navalni in drie percèsse veroordeildj toet 'n straof van neugetieën jaor gevangesjap, worónger in straofkampen in Siberië.
Op 16 fibberwarie 2024 stórf Navalni op zevenenvieërtigjäörige laeftied ónger verdachdje ómstenj tiejes zien gevangesjap.