Ethanol
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Ethanol of ethylalcohol is de bekèndjste en meis-veurkómmendjen alcohol. 't Wuuertj döks gebroek es oplosmiddel en 't is ouch d'n alcohol dae in drank zitj. Inne vouksmóndj hètj ethanol meistes gewuuen alcohol. De molecuulformuul van ethanol is C2H5OH. Verwantje stoffe zeen methanol en propanol.
Ethanol vörmp mit water e mingsel van 96% ethanol en 4% water det e vas kaokpuntj haet en neet mieë mit destillatie is te sjeie. Dit neump me azeotroop. Zuveren alcohol wie te vinjen innen hanjel is daoveur slechs 96% zuver, of op 'nen angere waeg verkrege. 100% zuveren ethanol bevatj döks späör van benzien det vriewaal 'tzelvendj kaokpuntj haet, meh vergiftig is. Daoveur is 't gevieërlik veur consumptie.
Väöl saorten aan gis kónne sókkers anaeroob ómzètten in ethanol en koealdioxied. Dees gisting wuuertj gebroek bie 't make van alcoholischen drank wie beer en wien. Bie zoeaget 12% ethanol gaon de giste zelf doead; sterkeren drank kan allein op kónsmaesige wies waere gemaak.