Nijefurd
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Nijefurd waor tösse 1984 en 2011 'n gemeinte in de Nederlandse provincie Friesland, aon 't IJsselmeer, mèt 'n oppervlak vaan 289,17 km2 (daovaan neet minder es 192,49 km2 water). De gemeinte umvatde de kerne It Heidenskip, Hemelum (Himmelum), Hindeloopen (Hylpen, daoboete ouch wel Hynljippen), Koudum, Molkwerum (Molkwar), Nijhuizum (Nijhuzum), Stavoren (Starum), Warns en Workum (Warkum). Op 1 januari 2010 had de gemeinte 10.957 inwoeners.
De Nederlandse naome zien officieel, boete die vaan It Heidenskip en de naom vaan de ganse gemeinte. Ouch in de kerne mèt officieel Nederlandse naome stoon bij de plaotsnaomsjèldsjes de Friese naom bovenaon. In Hindeloopen weurt e hiel awwerwets Fries dialek gesproke: 't Hindeloopers. In Stavoren sprik me 'ne variant vaan 't Stadsfries. In de res vaan de gemeinte euverhiers 't Zuidhooks dialek.
Nijefurd woort in 1984 gevörmp oet de gemeintes Hemelumer Oldeferd, Hindeloopen, Stavoren en Workum. De ierste waor ein vaan de 30 aw grietenije, de lèste drei huurde bij de èlf Friese stei. In 2011 góng de gemeinte, mèt veer aander gemeintes, zelf weer op in Súdwest Fryslân.