Reggae

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Reggae (spreek oet: Regkee) is 'ne meziekstijl, aofkomsteg oet Jamaica. Reggae is nej verboonde mèt de Rastafarireligie. Ze oontstoont in 1968 door de hippiecultuur die opkaom.

't Begin

Meziek oet Afrika

In de 18e iew zien d'r hiel väöl zwarte slaove oet Afrika gebrach nao 't Zuid-Amerikaanse Jamaica. Toen de slaovehandel woort aofgesjaf zien de mieste lui hei gebleve, um e nui leve te beginne. Daomèt brachte ze väöl Afrikaanse meziek mèt, dee iers lankzaam veranderde in slaovemeziek. Dee stijl heet 'ne aonhawwende melodie, boe door de slaove in 'n soort trance kóste weijer wèrke.

Ska

De bevolking vaan Jamaica woort rieker, en kós mèt instruminte aon de geng. Noe 't minder rei veur verdreet gaof, woort de slaovemeziek al gaw sneller, en veural vroleker. Nog altied had 't 'n opjuttend ritme. Ouch had 't väöl europese trèkskes, zoewie 'n soort Polkaritme (twiekwartsmaot).

Rocksteady

In de jaore '50 vaan de 20ste iew kaom de Rock & Roll op. De pop- en rockgeluide kaome ouch lankzaam in de Jamaicaanse meziekcultuur. Rocksteady waor lang neet mie zoe strak op de maot wie ska en slaovemeziek. D'r kaom mie swing in, en dèks waore ze ouch hitgeveuleg.

't Gouwe tiedperk

Ind jaore '60 oontstond de hippiecultuur. Kemp en aander genres softdrugs begóste populair te weure. Veural in Jamaica sloog de kemp-hype erg aon. Rocksteady veranderde (mèt daankzij Bob marley) in väöl minder snel. Dèks is reggae ouch bedoeld um te luustere es me oonder invlood vaan drugs is. Reggae woort in de jaore '70 enorm populair in Noord-Amerika, Australië en Europa.

Begin jaore tachteg woort Doe Maar bekind mèt Nederlandstaolege reggae en ska.

Riddems

't Reggae-ritme, riddem volges 't jargon, besteit hoofzakelek oet e basluipke mèt e bepaold drumpatroen. In sommeg gevalle weurt de melodie besjouwt es e oonderdeil vaan 't riddem. De meiste riddems zien aofkomsteg vaan hitsingles. 't Riddem heet meistal de naom vaan de betreffende hit gekrege.

De door artieste meis gebruukde riddems zien dèks mie es twintig jaor aajt en aofkomsteg vaan Coxsone Dodd's legendarische Studio One. Bekinde, väöl gebruukde riddems zien o.a. Real Rock Riddim, Answer Riddim, Full Up Riddim, Stalag Riddim, Punaany Riddim en Satta Massagana Riddim.

Dub

Dub is oontstande oonder zwoeren invlood vaan kemp. Es me bekans boete weste waor, maakde me dub. In dub is allein mer 'n zwoere baslijn te hure, en 'n echo-ende drum. Dub is nog steeds erg populair in coffeeshops. Veural in Amsterdam en Mestreech kin me nog väöl dub beluustere. Doe Maar "verdubde" zien plaat Doris Day en andere stukken tot Doe de dub.