Andonis Samaras
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Andonis Samaras [anˈdonis samarˈas] (Grieks: Αντώνης Σαμαράς) (Athene, Attika, 23 mei 1951) is 'ne Griekse politicus. Heer waor oonder aandere lid vaan 't Grieks Parlemint en 't Europees Parlemint en aajd premier vaan zie geboorteland. Ouch waor heer dèkser minister vaan 't ein en aander. Heer is lid vaan de partij Nea Dimokratia (Nuie Democratie). Die partij waor vaan 2012't begin vaan 2015 de regierende partij same mèt de PASOK en de Dimokratiki Aristera. Seer 20 juni 2012 waor heer daomèt de premier vaan Griekeland. Heer waor de opvolgere vaan de technocrate Loukas Papadimos (11 november 2011 bis 17 mei 2012) en Panagiotis Pikrammenos (17 mei bis 20 juni) op, die de euvergaansregiering leijde nao de val vaan Giorgos Papandreou gedäörende de aonhawwende Eurocrisis. Op 27 jannewarie 2015 nóm Alexis Tsipras 't premiersjap euver.
Samaras studeerde economie aon de Harvard-universiteit in de Amerikaanse stad Boston, Massachusetts. In 1976 nóm Samaras deil aon de Griekse regiering, veur Nea Demokratia. Vaan 1989 bis 1992 waor heer minister vaan boetelendse affaires. Wie Griekeland in konflik raakde mèt 't land Macedonië, umtot hun regio Macedonië dezelfde naom druug, besloot Nea Demokratia bis e kompromis te komme. Dit weigerde Samaras evels en es reaktie stapde heer oet de coalitie. Heidoor goof 't in de regiering gein mierderheid vaan de zetels mie, boedoor de coalitie veel. Samaras begos 'n nui partij, Politiki Anixi (Polletiek Veurjaor). In 1993 kraog de partij tien zetels in Griekeland en in 1994 twie zetels in de Europese Unie, zoonder deil te zien vaan 'n groetere Europese partij. In de Griekse verkezinge vaan 1996 kraog 't 2,9 percent vaan de stömme, zjus neet genog um touw te treije bis 't parlemènt (daoveur heet me drei percent nudeg). Wie de partij obbenuits in 1999 gein zetels verkraog in de EU, besloot Samaras de partij op te doke. In 2000 leet heer weite de Nea Demkratia obbenuits te steune. In 2004 bekleijde heer 'ne zetel vaan de ND, es deil vaan de Europese partij European People's Party (de Europese Volkspartij, boe CDA ouch bijzit). In 2007 goof heer ziene zetel op naotot heer naomes 't departemint Messenia in Peloponnesos 'ne zetel kos kriege in 't Griekse parlemènt. In 2009 woort heer de Griekse Minister vaan Kultuur. Oonder häöm woort 't Akropolis Museum in Athene geopend. In 2009 goof 't 'n nek-aon-nekrace tösse Samaras, Dora Bakoyanni en Dimitris Avramopolous betrèffenterend 't leijersjap vaan de ND. Avramopolous goof havereweg de race op en leet zien steun betuige aon Samaras. In partijcongress woort daonao beslote tot de leijer veur d'n ierste kier demokratisch gekoze zaw mótte weure, door middel vaan e referendum oonder alle Europese börgers (wat nier kump op zoegood es allein meh Grieke, op 'n paar immigrante en Cypriote nao) die lid zien vaan de Nea Demokratia. Op 30 november 2009 woort bekind gemaak tot Samaras de nuie leijer waor.
In 2012 won Nea Demokratia mèt 108 zetels de verkezinge. Samaras kraog 't evels neet veur mekaar 'n coalitie te vörme en goof al op nao einen daag. Heer goof de fakkel euver aon SYRIZA. Dees partij lökde 't ouch neet 'n coalitie te vörme. Wie bleek tot de daarde partij, PASOK, 't ouch neet veur mekaar kraog, besloot prizzedent Karolos Papoulias tot nui verkezinge nudeg waore. Nao de nui verkezinge won Nea Demokratia obbenuits, noe mèt mie zetels, naomelek 129. Samaras vörmde succesvol 'n coaltie mèt de PASOK en de DIMAR. Door de aonhawwende Eurocrisis en 't nog ummertouw dalend vertrouwe vaan 't Grieks volk in de polletiek, beslote de PASOK en DIMAR 'n gelimiteerde rol te späöle in 't Samaras-kabinèt boedoor beslote woort tot de ministers oonder Samaras inkel oet ND-politici en e paar oonaofhenkeleke technokrate zaw gaon bestaon. De lètse Griekse parlemèntsverkiezinge vaan 2015 waore op 25 jannewarie. Dit naodat 't Parlemènt vaan Samaras nao drei stömroondes ind december 2014 d'r neet in waore geslaag um 'ne nuie prizzedent te keze. Zoewie in de Griekse groondwet steit vermeld, deende nao 'n daarde gefaalde stömroonde 't parlemènt binne tien daog te weure oontboonde, wat dan ouch gebäörde. De verkezinge woorte gewonne door 't linkse SYRIZA, dat mèt 149 zetels zjus gein absolute mierderheid behaolde. Daogs nao de verkezinge sloot de partij e regeerakkoord mèt de Anexartiti Ellines (oonaofhenkeleke Grieke). Op 27 jannewarie 2015 woort 't nuij kabinet vaan Alexis Tsipras ingezwore. 't Nuij kabinet heet 11 ministeries, 6 minder es 't Samaras-kabinèt. De prizzedent bleef Karolos Papoulias oonder hun periood.