Ghanees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Ghanees hierevoetbalèlftal vertreujt Ghana in internationaol voetbalmatche. 't Team huurt bij de sterkere vaan Afrika en heet bij meminte 't Afrikaons voetbal gans gedomineerd. Wereldwied had 't team evels minder te beteikene; pas in d'n einentwintegsten iew woort veur 't iers 't WK gehaold.
Historie
bewirk
In 1920 woort in de Britse kolonie Goudkös 'ne voetbalboond opgeriech. De boond formeerde in 1950 veur 't iers e nationaol team, wat mèt 1-0 vaan Nigeria won. Al gaw greujden 't team oet tot ein vaan de bèste vaan Afrika. In 1962 woort Nyasaland mèt wel 0-12 geklop (e rizzeltaot wat ze in 1965 tegen 'tzelfde team zouwe herhole) en woort in 'n vrundsjappeleke match Real Madrid, daan ein vaan de absolute topclubs vaan de wereld, op 3-3 gehawwe. In 1963 plaotsde Ghana ziech, es oonaofhenkelek land, veur 't iers veur de Africa Cup en won ze direk. Dit woort in 1965 herhaold, dewijl in 1968 en 1970 de twiede plaots gehaold woort. Heinao volgde e paar jaor vaan druugde, meh in 1978 en 1982 woort 't land obbenuits Afrikaons kampioen.
Nao 1984 haolde Ghana e paar kier neet de indrunde vaan de Africa Cup, en wie 't in 1992 trökkaom, waor de concurrentie gegreujd. Aander Afrikaonse len waore korterbij gekoume in 't niveau of zelfs gepasseerd. In 1992 woort Ghana wel twiede, meh 't zouw nog jaore dore ietot vergliekbaar succes gehaold woort.
Al die jaore deeg Ghana noets mèt aon de Wereldbeker. Dèks sjreef 't ziech neet in, en es 't dat wel deeg kaom 't neet door de kwalificatierundes. Pas in 2006 debuteerde Ghana op e WK; in Duitsland woort de achste finaal gehaold. Op 't WK vaan 2010 in Zuid-Afrika góng Ghana zelfs door tot in de kwartfinaal. Nao 'n euverwinning op de Vereinegde Staote (nao verlenging) woort 't oetindelek nao penanties oetgesjakeld door Uruguay. Heimèt waor Ghana wiedoet 't succesvolste Afrikaons land op dit ierste WK in Afrika. Datzelfde jaor woort 't team ouch twiede in de Africa Cup.
Binne Afrika bleve ze de jaore dao-op in de top mètdrejje; op de Africa Cup woort in 't gemein de haaf finaal of de finaal gehaold, meh 't team won d'n titel noets mie. De prestaties op 't WK vaan 2014 vele tege. In 2018 woort 't WK zelfs neet gehaold; Ghana waor intösse oet d'n top vaan 't continent eweggevalle. Op 't WK vaan 2022 zien ze wel weer presint.