Pœuxo (dio)

ZE-P

Sta paggina chie a l'è scrita in zeneize, co' ina grafia tipo quella do Prian do 1745

O pœuxo (ciu antig. prob. pœurexo, da-o lat. pollex)^[1] ò polliçe, ò ciù comunemente dio grosso (dito ascì à uzo informale "sciacca-pigœuggi") o l'è o primmo dio da man. Tegnindo a scheña de moen gjâ verso a proppia faccia i pœuxi en e die ciu interne.

Anatomia

O l'è composto da doe falange, a falange proscimâ e a falange distâ. A peto di atre quattro die gh'amanca a falange mezaña. A falange proscimâ a l'è articolâ co-o primmo metacarpo.

O pœuxo o l'è l'elemento indispensabbile pe efetoâ a preiza à tenaggia graççie a-o gran nummero di so moscoli attivatoî (antibrachiæ e tenæghi) che ghe permettan d'ópoñise (pançetta contra pançetta) a-i atre die.

Scindrome

Gh'è de scindrome da comprescion nervoza tippiche de çerti mestê ò zœughi pe via do continno movimento anommalo do pœuxo ch'o caoza 'n'ecesciva soleçitaçion do nervo radiâ e ulnâ. Tæ son o "pœuxo do zugao de bowling" e o "pœuxo do sunao d'arpa", i quæ scintomi son abessimento e parestexia.

Mâformaçioìn

A mâformaçion congennita ciu comuña a l'è a dupricaçion do pœuxo, ò pœuxo biffido. Un'atra a l'è quella do pœuxo trifalangêo, saiv'à dî con træ falange, into quæ caxo poriæ no esighe l'óponibilitæ a-i atre die. Ciu ræa a l'è l'aplaxia, cioè l'assença dœ-un ò d'intrambidoî i pœuxi.

Atri scignificæ

Coscì in zeneize comme in toscan a mæxima paola a l'indica ascì un grosso gàngao

Aprœuvo a-o latin pollex transversus a paola pœuxo (ò polliçe) a pœu ese ascì scinonnimo d'onça liniâ.

Voxe conrelæ

Referençe

↑ O Cazaçça, à diferença di atri aotoî, inta segonda ediçion do so vocabolaio (Zena, Schenon, 1876 p. 594) o dœuvia a grafia peûxo (equiv. à "pœüxo" inta priaña) ch'a doviæ indicâ 'na pron. /'pøjʒu/, ma dæto chi-a mæxima uniçitæ graffica a se riscontra into lemma precedente ascì (peûro invece che pêuro ò "pœuro", comme scrive i atri), l'è poscibbile che se tratte soo che de 'n malinteizo ò de 'n aro tipograffico.

Atri progetti

Wikimedia Commons a contêgne di files in sce pœuxo

Contròllo de outoritæ	GND (DE) 4240591-9 · BNF (FR) cb11975881j (data)

[1] O Cazaçça, à diferença di atri aotoî, inta segonda ediçion do so vocabolaio (Zena, Schenon, 1876 p. 594) o dœuvia a grafia peûxo (equiv. à "pœüxo" inta priaña) ch'a doviæ indicâ 'na pron. /'pøjʒu/, ma dæto chi-a mæxima uniçitæ graffica a se riscontra into lemma precedente ascì (peûro invece che pêuro ò "pœuro", comme scrive i atri), l'è poscibbile che se tratte soo che de 'n malinteizo ò de 'n aro tipograffico.

[1]