Rumàn Capitel Ses

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Ses

¹Dunca, che cossa dirèmm? Gh'avarìum de cuntinüà in del pecaa, perchè la grazia la bundass? ²Che la sia no! Nümm che sèmm mort al pecaa, cuma ghe vivarèmm ancamò? ³O sii ignurant che tant quant hinn batezaa in del Crist Gesü hinn batezaa in de la sua mort? ⁴Dunca, sèmm staa suteraa cun lü per mèzz del batesim in de la mort, perchè propi cuma Crist l'è staa levaa sü di mort per mèzz de la gloria del Pader, inscì anca caminassum nümm in de la nuitaa de la vita. ⁵Già che se sèmm devegnüü ünii cun la sumejanza de la sua mort, ma anca sarèmm ünii cun la sua resüreziún; ⁶savend chèst, che la nostra vegia persona l'è stada crusefissa cun lü, perchè 'l corp del pecaa el füss abulii, e perchè nümm sium pü s'ciav al pecaa; ⁷già che lü che l'è staa mort l'è staa faa giüst del pecaa. ⁸E se sèmm staa mort cun Crist, credum che anca vivarèmm cun lü, ⁹perchè savèmm che, già che Crist l'è levaa sü di mort, el mör pü, la mort la gh'ha pü pudè sura de lü. ¹⁰Già che lü che l'è mort, l'è mort una völta per el pecaa; e lü che 'l viv, el viv a Diu. ¹¹Inscì anca vialter, cunsidereev mort al pecaa e vivent a Diu in del Crist Gesü.
¹²Dunca, el pecaa el gh'avarìa no de regnà in del voster corp murtal, per übedìgh in di sò desidéri, ¹³né presentee i voster member al pecaa cuma strümént d'ingiüstizia, ma presentee vialter medemm a Diu cuma vivent di mort, e i voster member a Diu cuma strümént de giüstizia. ¹⁴Già che 'l pecaa el gh'avarà minga pudè sura de vialter: già che sii no suta la lég ma suta la grazia.
¹⁵Dunca, che cossa? Pecarèmm perchè sèmm no suta la lég ma suta la grazia? Che 'l sia no! ¹⁶Savii no che a chèll che presentuv vialter medemm in d'übediénza cuma s'ciav, sii s'ciav de chèll che übedii, sia del pecaa per la mort, o de l'übediénza per la giüstizia? ¹⁷Ma grazi a Diu perchè seruv s'ciav del pecaa ma avii übedii de cör a l'esempi d'insegnamént al qual sii staa cunsegnaa, ¹⁸e despö che sii staa faa liber del pecaa sii staa faa sèrv de la giüstizia.
¹⁹Disi una roba ümana per via de la debuléza de la vostra carna. Già che propi cuma avii presentaa i voster member cuma s'ciav de l'impüritaa e de l'iniquitaa, per l'iniquitaa, inscì adèss presentee i voster member cuma s'ciav de la giüstizia per santifegaziún! ²⁰Già che quand seruv s'ciav del pecaa, seruv liber a la giüstizia. ²¹Dunca, qual gener de frütt gh'avevuv alura, di quij adèss gh'avii vergogna? Già che la fin de quij robb l'è la mort. ²²Ma adèss, perchè sii staa faa liber del pecaa e staa faa s'ciav a Diu, gh'avii 'l voster frütt per santifegaziún, e la fin l'è la vita etèrna. ²³Già che la paga del pecaa l'è la mort, ma 'l regall de Diu l'è la vita etèrna in del Crist Gesü, el noster Signúr.

Navigaziun

• ← Indree a Capitel Cinch
• Inanz a Capitel Sett →
• A l'indes