Santa Agnesa

Quest articol chì l'è scrivuu in lombard, grafia milanesa.

La Agnesa o Nesa (Roma, 290/293 - Roma, 21 de genar del 305) l'è stada ona tosa romana (de la gens Clodia), martira cristiana a l'età de dodes agn, ai temp di persecuzzion del Dioclezzian.
L'è onorada 'me santa de la Gesa Catolega.

Teodorigh de Praga, Sant'Agnesa

Agiografia

I notizzi in su la soa vita e 'l sò martiri hinn tant e despess anca descompagn vuna de l'altra. Per on quaivun el fioeu del prefett de Roma el s'era inamoraa de l'Agnesa senza vess ricambiaa, perchè la tosanetta l'aveva faa vod de castità al Signor. Dopo el refud de la tosa, el prefett l'ha menada a fà la vita de clausura in di Vestai. Ma l'Agnesa l'ha refudaa anca de fà quell lavorà chì, e alora el prefett l'ha fada sarà su in d'on bordell. Ma nissun l'ha voruu toccàlla, foeura che on omm che (segond la tradizzion) l'è staa inorbii de on angel, anca se poeu (per intercession de l'Agnesa), l'è tornaa a vedè. A 'sto pont, segond la tradizzion, l'è stada fada brusà in su 'na pira, ma i fiamm l'hann minga toccada, e i sò cavei hinn cressuu inscì tant de vess bon de quattàlla giò tutta.
Despoeu de 'sto miracol, l'Agnesa l'è stada sgavezzada cont on colp de spada. Dopo la soa mort el sò corp l'è staa soteraa in de la catacomba che incoeu l'è cognossuda cont el sò nomm.

In de la tradzzion popolar

El dì dedicaa a la santa l'è 'l 21 de genar. In di proverbi de l'area lombarda se dis che in quei dì chì i giornad tacchen a vess on poo pussee cald, e donca se scomincia a vedè i lusert a vegnì foeura del letargh.

	«De Sant'Agnesa, corr la luserta in su la scesa.»

Inoltra i dì se slonghen:

	«Sant'Agnesa, on'ora distesa»