Filaza mandidy

Ny filaza mandidy dia endriky ny teny (ny matoanteny indrindra) izay atao hilazana baiko na fandraràna. Ao amin' ny fiteny maro dia anambaràna fiangaviava na fanasana, torohevitra na firariana, tsodrano na ozona koa ny filaza mandidy.

Ny filaza mandidy sy ny filaza hafa

Ny mariky ny filaza mandidy

Matetika miavaka amin' ny filaza tsotra ny filaza mandidy amin' ny tsy fahitana ny teny atao lazaina (mpisolo tena na anarana na hafa) izay manondro ny olona itenenana na ny mpisolo tena manam-pifandraisana aminy.

• Mividy fanafody ianao. (filaza tsotra)
• Mividiana fanafody. (filaza mandidy)

Filaza mandidy sy laharam-pitanisana

Ho an'ny mpisolo tena faharoa fotsiny

Tsy miavaka ny tokana sy ny maro

Ny fiteny maro dia manana endrika mandidy ho an' ny mpisolo tena faharoa milaza tokana sy milaza maro. Ohatra, tsy miavaka ny an'ny fiteny malagasy sy ny an' ny fiteny anglisy ary an' ny fiteny maro hafa koa:

• Mihainoa ahy (ianao/ianareo)
• Listen to me ("Mihainoa ahy ianao/ianareo")

Miavaka ny tokana sy ny maro

Ny fiteny maro dia manana endrika mandidy ho an' ny mpisolo tena faharoa milaza tokana sy milaza maro. Tsy miavaka ny an' ny fiteny malagasy fa ny an' ny fiteny latina dia miavaka.

• Audī ("Mihainoa (ianao)")
• Audīte ("Mihainoa (ianareo)")

Ho an' ny mpisolo tena voalohany milaza maro sy fahatelo koa

Ho an' ny mpisolo tena voalohany milaza maro koa

Ny fiteny sasany dia manana endrika mandidy ho an'ny mpisolo tena voalohany milaza maro. Toy izany ny fiteny frantsay:

• Achète du médicament ("Mividiana fanafody (ianao)").
• Achetons du médicament ("Ndeha isika hividy fanafody").
• Achetez du médicament ("Mividiana fanafody (ianareo)").

Ho an'ny lahara-mpandray anjara rehetra

Fiteny malagasy

Ao amin' ny fiteny malagasy, raha tsy amin' ny fiendrika manano ny matoanteny dia azo atao amin' ny filaza mandidy amin' ny lahara-mpandray anjara lazaina rehetra ny matoanteny.

Ampio

• 1 Ampio aho. (= Manampia ahy ianao)
• 2 Ampio ianao. (Ampio ny tenanao) (= Manampia ny tenanao ianao)
• 3 Ampio izy. (= Manampia azy ianao)
• 1 Ampio isika. (= Manampia antsika ianao)
• 1 Ampio izahay.(= Manampia anay ianao)
• 2 Ampio ianareo. (Ampio ny tenanareo) (= Manampia ny tenanareo ianao/ianareo)
• 3 Ampio izy ireo. (= Manampia azy ireo ianao)

Manampia

• 1 Manampia azy aho
• 2 Manampia azy ianao
• 3 Manampia azy izy
• 1 Manampia azy isika
• 1 Manampia azy ianareo
• 2 Manampia azy ianareo
• 3 Manampia azy izy ireo

Fiteny tiorka

Ao amin' ny fiteny tiorka dia ahazoana filaza mandidy avokoa ny lahara-mpandray anjara am-pehezanteny rehetra.

• 1. Içeyim ("Ndeha hisotro aho")
• 2. Iç ("Misotroa ianao")
• 3. Içsin ("Aoka izy hisotro")
• 1. Içelim (Ndeha/Aoka hisitro isika")
• 2. Için ("Misotroa ianareo")
• 2. Içiniz ("Aoka ianao/ianareo hisotro")
• 3. Içsinler ("Aoka izy ireo hisotro")

Sokajin-teny azo atao amin' ny filaza mandidy

Ny reniteny hafa

Amin' ny fiteny maro dia tsy ny matoanteny ihany no azo atao amin' ny filaza madidy fa ny mpamari-toetra na sokajin-teny hafa koa. Toy izany no mitranga ao amin' ny fiteny malagasy.

• Maty ny mpanao ratsy. (filaza tsotra)
• Matesa ny mpanao ratsy. (filaza mandidy)
• Velona ianareo. (filaza tsotra)
• Veloma ianareo. (filaza mandidy)

Ny filaza mandidy mandà

Mitady mpanampy

Amin' ny fiteny malagasy dia tsy amin' ny filaza mandidy fa amin'ny filaza tsotra ny matoanteny na ny mpamari-toetra raha amin' ny endrika mandà ny fehezanteny ka ny fandavana dia asehon' ny mpanampy aza.

• Mividy fanafody ianao. (filaza tsotra)

• Mividiana fanafody ianao. (filaza mandidy tsotra)

• Aza mividy fanafody ianao. (filaza mandidy mandà)
• Maty ny mpanao ratsy. (filaza tsotra)
• Matesa ny mpanao ratsy. (filaza mandidy tsotra)
• Aza maty ny mpanao ratsy. (filaza mandidy mandà)

Amin' ny fiteny latina koa dia ahitana zavatra sahala amin' izany ka ny teny hoe nōlī ("aza ... ianao") na nōlīte ("aza ... ianareo") no mitondra ny mariky ny filaza mandidy sy ny fandavana:

• Audī ("Mihainoa (ianao)")
• Nōlī audīre ("Aza mihaino (ianao)")
• Audīte ("Mihainoa (ianareo)")
• Nōlīte audīre ("Aza mihaino (ianareo)")

Filazam-potoan' ny filaza mandidy

Tokam-pilazam-potoana

Amin' ny fiteny maro dia tsy manana afa-tsy filazam-potoana tokana ny filaza mandidy. Ny fanavahana atao hoe "lasa" (frantsay: impératif passé) sy "ankehitriny" (frantsay: impératif présent) ao amin' ny filaza mandidy, toy ny hita ao amin' ny fiteny frantsay, dia fanavahana ara-panehoan-javatra ka tokony hantsoina hoe "filaza mandidy efa" (frantsay: impératif accompli) sy "filaza madidy tsy efa" (frantsay: impératif non accompli) ireo endrika roa ireo.

• Rentrez à sept heures ("Modia ianareo amin'ny fito")

• Soyez rentrés à/avant sept heures (ara-bakiteny: "Tafidira an-trano ianareo amin' ny/alohan' ny amin' ny fito").

Filaza mandidy ankehitriny sy hoavy

Misy anefa ireo fiteny manavaka ny ankehitriny amin' ny hoavy, eny fa na amin' ny lasa koa aza. Ao amin' ny fiteny latina dia ahitana filaza mandidy ankehitriny sy filaza mandidy hoavy, ka ilay atao hoe ankehitriny dia mitaky fanatanterahana eo no ho eo ny zavatra andidiana fa ilay atao hoe hoavy dia tsy mitaky izany eo no ho eo fa any amin' ny fotoana hoavy. Amin'io endrika hoavy io vao mitranga ny endrika mifandraika amin' ny olona na zavatra tenenina (laharana fahatelo).

Filaza mandidy ankehitriny:

• Audī ("Mihainoa (ianao izao ankehitriny izao)")
• Audīte ("Mihainoa (ianareo izao ankehitriny izao)")

Filaza mandidy hoavy:

• Audītō ("Mihainoa (ianao amin' ny hoavy)")
• Audītōte ("Mihainoa (ianareo amin' ny hoavy)")
• Audiuntō ("Aoka izy hihaino (amin' ny hoavy)")

Filaza mandidy lasa

Ao amin' ny fiteny neerlandey dia ahitana filazam-potoana lasa ny filaza mandidy:

• Had gebeld! ("Tokony niantso ianao!")
• Was gekomen! ("Tokony tonga ianao!")

Ny rafi-pehezanteny amin' ny filaza mandidy

Ao amin' ny fiteny sasany dia matetika tsy mitovy ny filahatry ny teny ao amin' ny fehezanteny amin' ny filaza tsotra sy ny ao amin' ny fehezanteny amin'ny filaza mandidy na ao amin' ny fehezanteny amin' ny filaza mandidy mandà (mandrara). Izany no mitranga ao amin' ny fiteny frantsay.

• Donne-le-leur. ("Omeo azy ireo izany/izy.")
• Ne le leur donne pas. ("Aza omena azy ireo izany/izy.")

Jereo koa

• Filaza
• Filaza tsotra
• Filaza ifampiankinana
• Filaza mihonohono
• Filaza mirary
• Impératif présent - impératif passé (teny frantsay)

• Lisitry ny teny ampiasaina amin' ny haiteny