Leviatàna
I Leviatàna na ny leviatana dia bibilava an-dranomasina resahina ao amin' ny teôlôjia sy ny fedrà. Atao hoe לִוְיָתָן / Līvyāṯān izy amin' ny teny hebreo. fa Λεβιάθαν / Lebiathan kosa amin' ny teny grika. Voaresaka ao amin' ny boky maromaro ao amin' ny Baiboly hebreo izy io, anisan' izany ny Salamo (Salamo 74:14; 104:26) sy ny Bokin' i Jôba (Jôba 3:8; 40:25–41:26) ary ny Bokin' i Isaia (Isaia 27:1). Resahina ao amin' ny Bokin' i Henôka (Henôka 60:7–9; 60:24) izay pseodepigrafa izany biby izany. Ny Leviatana dia matetika anehoana ny fikorontanana (khaos), mandrahona ny hihinana ny olom-boaozona rehefa tapitra ny fiainany. Amin' ny farany dia ho foanana izy. Ny teôlôjiana kristiana dia mihevitra fa i Leviatana dia ny demonin' ny fitsiritan' ny fahotana mahafaty. Araka ny Diagrama Ôfita, ny Leviatana dia mandrakotra ny habaky ny tontolo azo tsapain-tanana.
Ny Leviatana ao amin' ny Bokin' i Jôba dia mifanandrify amin' i Lôtàna (Lutan) kananita izay tranainy kokoa, biby goavam-be tamin' ny fotoana voalohany resin' ny andriamanitra Baal-Hadad (en). Ny fitoviana eo amin' ny anjara asan' i Tiamat (en) mesôpôtamiana resin' i Marduk dia efa hita hatry ny ela tao amin' ny haifedrà fampitahana, toy ny fampitahana mivelatra kokoa amin' ny tantaran' ny dragona sy ny bibilavan' izao tontolo izao, toa an' i Indra (en) izay namono an' i Vrtra na i Thor namono an' i Jörmungandr. Ao amin' ny Baiboly hebreo, ny Leviatàna koa dia manondro ny fahavalo mahery, indrindra fa i Babilôna (Isaia 27:1). Nisy manam-pahaizana sasany tamin' ny taonjato faha-19 izay nihevitra azy io ho zavamananaina lehibe anaty rano, toy ny mamba na ny voay. Taty aoriana io teny io dia nampiasaina hilazana ny trozona lehibe sy ny biby goavam-be any an-dranomasina amin' ny ankapobeny.