Salamo faha-106

Ny Salamo faha-106 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky fahefetra" (Sal. 90 -106) ity salamo ity. Ny Salamo faha-105 no eo alohany ary ny faha-107 no manaraka azy.

Lahatsoratra

Dikan-teny katôlika

¹Aleloia!

Ankalazao Iaveh, fa tsara fo izy,

satria mandrakizay ny famindram-pony.

      ²Iza no mahalaza ny asa amin-kerim-po ataon'ny Tompo,

iza no mahambara ny voninahiny rehetra?

      ³Sambatra izay mitandrina ny lalàna,

ka manaraka ny rariny mandrakariva!

      ⁴Ry Iaveh ô, tsarovy aho amin'ny hatsaram-ponao amin'ny vahoakanao,

vangio amin'ny famonjenao aho,

      ⁵hahitako ny hasambaran'ny olom-boafidinao,

hifaliako amin'ny fifalian'ny vahoakanao,

ary hiravoravoako miaraka amin'ny lovanao.

      ⁶Efa nanota toy ny razanay izahay,

nahavita heloka izahay, nanao ratsy izahay.

      ⁷Ny razanay tany Ejipta tsy nihevitra ny fahagagana nataonao,

tsy nahatsiaro ny hamaroan'ny fahasoavanao;

niodina teo amoron-dranomasina, dia ny ranomasina Mena.

      ⁸Namonjy azy anefa izy noho ny anarany,

mba hampiharihary ny fahefany.

      ⁹Nambanany ny ranomasina Mena, dia maina io,

ka nentiny nita ny hantsana toy ny namaky ny efitra izy ireo.

      ¹⁰Namonjy azy tamin'ny tànan'izay nankahala azy izy,

nanafaka azy tamin'ny tànan'ny mpampahory azy.

      ¹¹Nosaforan'ny onjan-drano ireo mpandrafy azy,

ka tsy nisy niangana na dia iray aza.

      ¹²Dia nino ny teniny izy ireo tamin'izay,

ary nihira fiderana azy.

      ¹³Kanjo kosa izy ireo nalaky nanadino ny asany,

tsy niandry ny hanatanterahany izay voakasany.

      ¹⁴Voan'ny fitsiriritana tany an'efitra izy,

ka naka fanahy an'Andriamanitra tany an-tany mangingina.

      ¹⁵Nomeny azy ihany izay nangatahany,

fa nasiany fahiazana kosa izy ireo.

      ¹⁶Tao an-toby indray izy ireo nialona an'i Moizy,

sy Aarona ilay olo-masin'ny Tompo.

      ¹⁷Fa nisokatra ny tany, ka nitelina an'i Datana,

sy nikatona nanarona ny antokon'i Abirona.

      ¹⁸Nolevonin'ny afo ny antokon'izy ireo,

dia levon'ny lelafo ny ratsy fanahy.

      ¹⁹Nanao zanak'ombalahy izy teo an-tendrombohitra Horeba,

dia niankohoka teo anoloan'ny sarin-javatra anidina.

      ²⁰Ny voninahitr'izy ireo, dia natakalony

sarin'omby miraoka ahitra.

      ²¹Nohadinoiny Andriamanitra Mpamonjy azy,

izay nanao zava-dehibe tany Ejipta,

      ²²fahagagana tany amin'ny tanin'i Kama,

famantarana teo amin'ny ranomasina Mena.

      ²³Efa nolazainy haringana izy ireo;

raha tsy Moizy olom-boafidiny,

no nitsangana teo anatrehany

hisakana ny hatezerany tsy handringana azy.

      ²⁴Izy ireo nanamavo ny tanim-pahafinaretana

tsy nino ny tenin'ny Tompo.

      ²⁵Nimonomonona tao an-dainy,

ary naneky ny feony izy ireo,

      ²⁶ka dia nanainga ny tànana izy hamely azy ireo,

handringana azy any an'efitra:

      ²⁷hahavery ny taranany any amin'ny firenena,

ary hanely azy any an-tany hafa.

      ²⁸Niraikitra tamin'i Beelfegora izy ireo,

ka nihinana ny sorona natolotra ho an'ny maty.

      ²⁹Nampahatezitra an'ny Tompo tamin'ny nataony izy ireo,

dia nibosesehan'ny loza.

      ³⁰Nitsangana nanolotra fanonerana Finea,

dia nitsahatra ny loza.

      ³¹Notànana ho fahamarinana ho azy izany nataony izany,

hatramin'ny taona mifandimby mandrakizay.

      ³²Nampahatezitra an'ny Tompo izy ireo tao amin'ny ranon'i Meriba,

ary nozoim-pahoriana noho ny nataon'izy ireo Moizy;

      ³³fa nampahasosotra ny fanahiny izy ireo,

ka nahavoaka teny tsy voahevitra izy.

      ³⁴Tsy naringan'izy ireo ny firenena

nasain'ny Tompo naringany.

      ³⁵Fa niharo tamin'ny firenena izy,

nianatra ny asan'ireny.

      ³⁶Nanompo ny sampin'ireny,

izay tonga fandrika ho azy.

      ³⁷Nataony sorona ho an'ny demony,

ny zanany lahy aman-janany vavy.

      ³⁸Nandatsaka ny ra tsy manan-tsiny izy

dia ny ran'ireo zanany lahy aman-janany vavy,

nataony sorona tamin'ny sampin'i Kanaana,

ka ny tany voaloton'ny vonoan'olona.

      ³⁹Izy ireo nandoto tena tamin'ny asany,

ary nitolo-tena tamin'andriamani-kafa.

      ⁴⁰Dia nirehitra tamin'ny vahoakany ny fahatezeran'ny Tompo,

ary tonga tsy tiany mainty ny lovany.

      ⁴¹Natolony ho eo an-tànan'ny firenena izy ireo,

ka notapahin'ireo mankahala azy.

      ⁴²Nampahorian'ny fahavalony izy,

ary voaetry tambanin'ny tanan'ireny.

      ⁴³Nanafaka azy ireo matetika izy;

nefa niodina nanaraka ny fisainany izy ireo;

ka ny helony no nahaverezany ny tenany.

      ⁴⁴Nijery ny fahorian'izy ireo anefa izy,

nony nandre ny fitarainany.

      ⁴⁵Notsarovany, hitsimbinana azy, ny fanekeny;

namindra fo taminy araka ny hatsaram-pony lehibe izy;

      ⁴⁶ary nataony nahita famindram-po aminy izy ireo,

teo anatrehan'izay rehetra nitana azy ho babo.

      ⁴⁷Vonjeo izahay, ry Iaveh, Andriamanitray,

ka angony avy amin'ny firenena izahay,

mba hankalazanay ny anaranao masina,

ary hireharehanay amin'ny fiderana anao.

      ⁴⁸Isaorana anie Iaveh Andriamanitr'Israely,

hatramin'ny mandrakizay ka ho mandrakizay!

Ary aoka ny vahoaka rehetra hilaza hoe:

Amena! Aleloia!

Jereo koa

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.