Pandidikan di Finlandia
Pandidikan di Finlandia disabuik juo sabagai sistem pandidikan tabaiak di saluruah dunia. Sajak hasi ujian internasional Program Penilaian Pelajar Internasional (PISA) kalua pado tahun 2000, Finlandia mandapek pahatian khusus dari saluruah dunia. Remaja Finlandia bahasi manampati paringkek partamo basamo jo Korea Selatan jo Japang. Pado hasia tasabuik, Finlandia manampati paringkek partamo di Literasi Mambaco, kaampek di Matematika, jo katigo di Ilmu Alam.[1] Pandidikan bakualitas tasabuik bagantuang banyak pado kualitas jajaran pendidiknyo nan diagian kabebasan panuah dalam maramu kurikulum jo manantukan metode jo materi baraja-mangaja. Kaberhasilan tasabuik alah manarik sakitar 100 delegasi dari 40-45 negara di saluruah dunia untuak mangunjungi Kementerian Pendidikan Finlandia pado maso 2005-2011 dan mampalajari kunci sukses sistem pandidikan disinan.[2] Finlandia alah pulo malakuan ekspor sistem pandidikannyo ka negara-negara lainnyo.[3]
Sistem pandidikan di Finlandia indak mambalakukan parengkingan institusi pendidikan dan marupoan sistem inklusif dimano kasado siswa dianggap samo dalam haknyo untuak mandapekan pandidikan. Karanonyo, indak ada pambagian kelas manuruik kompetensi akademis maupun untuak anak-anak bakabutuahan khusus. Tahun palajaran sakolah dimulai pado bulan Agustus dan barakhia di bulan Juni dengan total 190 hari sakolah. Murid basakolah limao hari dalam saminggu dengan jumlah palajaran bakisar antaro 19-30 per minggunyo, tagantuang dari tingkek pambalajaran sarato jumlah kelas piliahan nan diambiak.[4]
Pandanaan pandidikan di Finlandia sangaik didukuang pamarintah dimano dana swasta jo parorangan sangaik randah; hanyo 4,1% dari total pangaluaran operasional pandidikan sacaro nasional pado tahun 2011. Angko iko jauah labiah randah dari pado rato-rato negara-negara OECD nan barado pado tingkek 32%. Budget pamarintah Finlandia untuak pos pandidikan per siswa adolah EUR 16.714 pado tahun 2011, labiah tinggi 23% dari pado budget rato-rato negara-negara OECD.[5] Mayoritas pamerintah daerah mampunyoi pulo otoritas untuak manantuan sakolah untuak satiok siswa nan barado dalam wilayahnyo, biasonyo sakolah tadakek rumah masiang-masiang siswa.
Sistem Pandidikan
suntiangPamarintah Finlandia mamastian kasado warga negara mandapek hak untuak mandapekan pandidikan nan samo. Mayoritas sakolah di Finlandia adolah sakolah negeri. Sakolah swasta indak banyak babeda sacara kualitas dan proses baraja-mangajarnyo dibandiangkan jo sakolah negeri. Kementerian Pendidikan Finlandia batangguang jawab dalam maramu karangko kabijakan sistem jo implementasi kapandidikan di Finlandia, sadangkan implementasinyo surang marupoan tangguang jawab dari Agensi Kependidikan Nasional Finlandia. Kaduo institusi tasabuik bakarajo sama dalam maramu tujuan pambalajaran, sarato isi jo metode pambalajaran untuak tingkek prasekolah hinggo manangah ateh jo pandidikan andragogi. Administrasi satiok sakolah marupoan tanggung jawab pamarintah daerah nan manantuan alokasi dana, kurikulum lokal, jo parekrutan staf pendidikan. Pamarintah daerah dipabuliahan untuak mandelegasikan tanggung jawab tasabuik ka masiang-masiang sakolah.[4]
Akses Marato ka Pandidikan
suntiangPandidikan formal di Finlandia sapanuahnyo diatur dek pamarintah dan disadioan sacaro gratis untuak kasado warga negara Finlandia sagalo umua jo tingkek pandidikan. Fasilitas gratis iko maliputi sarana jo prasarana baraja, makan harian di sekolah, sarato transportasi untuak murid nan tingga jauah dari lokasi sakolah. Pangacualian untuak murid-murid Pandidikan Manangah Ateh nan paralu mambali buku cetaknyo surang-surang dan bagi paserta Pandidikan Urang Dewasa (adult education) nan mungkin paralu mambayia makanannyo surang. Salain itu, siswa Manangah Ateh maupun mahasiswa dapek mangajuan bantuan dana kuliah malalui sistem beasiswa maupun pinjaman dana pandidikan.[4] Manuruik laporan OECD tahun 2013, sabanyak 84% panduduak Finlandia nan baumua 25-64 tahun satidaknyo lulus pandidikan manangah ateh. Angko iko jauah labiah tinggi dari pado rato-rato OECD (75%).[5] Finlandia mampunyoi pulo dua sistem pandidikan andragogi (pandidikan untuak urang dewasa): pandidikan basertifikat nan batujuan khusus untuak mambantu para tuna karya mandapekan karajo sarato sacaro umum maningkekan kualitas sumber daya manusia di lingkup karajo jo industri; sarato pandidikan non-formal nan batujuan untuak maningkekan katarampilan jo kualitas hiduik.
Dukuangan Panuah untuak Palajar
suntiangFinlandia bafokus pado optimalisasi kamampuan individu satiok palajar. Mereka mamastian iko malalui karangko Pambinaan jo Konseling nan batujuan untuak mandukuang, mambantu, jo mambina murid bia dapek mancapai kamampuan tabaiaknyo sacaro akademis maupun katarampilan hiduik, sarupo kamampuan bapikia panjang, kritis, sarato mambuat kaputusan. Satiok murid dibina untuak mancari caro baraja tabaiaknyo masiang-masiang. Satiok pangajar jo pandidiak batanggung jawab untuak mampalakuan satiok anak sacaro pasaurangan (indak malakuan stereotipe atau penggolongan).[4] Murid nan barado di bawah rato-rato sacaro akademis maupun nan bakabutuahan khusus berhak untuak mandapekan bantuan tambahan sacaro akademis maupun non-akademis agar mereka dapek mancapai tahap “asyik baraja” dan standar akademis masiang-masiang.
Otonomi Tinggi
suntiangSatiok institusi pandidikan mandapek kaleluasaan dalam manjalankan proses baraja-mangajarnyo, salamo mamanuahi karangko regulasi kapendidikan nan ditantuan dek Kementerian Pendidikan nan mampunyoi definisi umum tantang kualitas jo efektivitas pendidikan. Guru mandapekan kabebasan panuah dalam manantuan metode pangajaran sarato pamiliahan buku jo materi nan digunoan.[3] Universitas bahkan mandapekkan kabebasan nan labiah lueh lai; mereka dipabuliahan untuak manantuan surang karangko jo isi dari satiok program studi jo risetnyo masiang-masiang.[4]
Evaluasi Siswa jo Institusi Pandidikan
suntiangEvaluasi utamo siswa adolah evaluasi bakalanjutan dek guru takait salamo tahun ajaran balangsuang. Satiok siswa mandapekan laporan hasia baraja satidaknyo sakali dalam satu tahun akademis. Indak ado ujian banilai atau ujian nasional untuak siswa pandidikan dasa. Ujian nasional baru diadoan bagi siswa manangah ateh pado akhia tingkek pandidikan.
Inspeksi sakolah ditiadoan pado awa tahun 1990-an, dan diganti jo konsep pambagian informasi, pambarian dukuangan, sarato pandanaan nan dirangkum dalam legislasi kapandidikan, kurikulum nasional, jo standar kualifikasi pangajar.[4] Dengan demikian, kualitas program pandidikan di Finlandia bagantuang banyak pado kacakapan tim pangajar jo staf di satiok institusi pandidikan. Satiok institusi pandidikan batanggung jawab untuak malakukan evaluasi surang-surang dilua evaluasi nasional nan dilakukan malalui ujian nasional bakala di bidang studi nan babeda-beda satiok wakatunyo tagantuang kaputusan dari hasia evaluasi Kementerian Pendidikan dan Kebudayaan Finlandia. Mato palajaran nan diuji dapek jadi di bidang akademik (bahasa, sastra, matematika) atau non-akademik (kesenian, prakarya, atau pelajaran ekstrakurikuler). Hasia evaluasi nasional diagaian baliak ka masiang-masiang sakolah untuak manjadi bahan paningkatan mutu ka mungkonyo. Indak ado evaluasi nasional untuak universitas, karenanyo satiok universitas diwajibkan malakukan evaluasinyo masiang-masiang sacaro mandiri dan indak tadapek paringkek nasional universitas.[4] Evaluasi guru dilakuan malalui diskusi manganai evaluasi pribadi guru dengan jajaran pimpinan di institusi pandidikan takaik.[3]
Pandidikan Kabutuahan Khusus
suntiangSistem pandidikan di Finlandia bersipaik inklusif, yakni, indak ado pambedaan sistem pandidikan antaro pambalajar reguler jo pambalajar bakabutuahan khusus. Murid bakabutuahan khusus tetap basakolah di sekolah umum basamo jo siswa reguler dan berhak mandapekan bantuan jo dukuangan tambahan nan batujuan untuak mambukak paluang untuak siswa bakabutuahan khusus bia tabiaso dan mampu malanjuikan ka tingkek pandidikan manangah ateh. Di kelas manengah ateh, siswa bakabutuahan khusus tetap mandapekan dukuangan, misalnyo: sakolah vokasi akan manyadioan rencana pambelajaran kustom per individu bakabutuahan khusus.
Staf Kapandidikan Finlandia
suntiangGuru marupoan salah satu profesi populer dan elit di Finlandia. Pandidikan tinggi kaguruan di Finlandia sangaiklah selektif. Di bawah iko adolah tingkek panarimoan di masiang-masiang jurusan kaguruan di Finlandia:[4]
- Jurusan kaguruan umum: 10% dari pendaftar
- Jurusan kaguruan mato palajaran spesifik: 10-50% dari pandaftar
- Jurusan kaguruan vokasi: 30% dari pandaftar
Guru jo asisten pandidikan prasekolah biasonyo marupoan lulusan sarjana dengan rato-rato gaji sabanyak AS$ 29.125 per tahun (2011).[5] Guru pandidikan dasar hinggo manangah ateh diharuskan mampunyoi gala magister, sadangkan guru pandidikan vokasi wajib mampunyoi gala pandidikan nan labiah tinggi di bidang studi pangajarannyo. Tingginyo syaraik pangajar di Finlandia dikaranoan kasuksesan implementasi sistem pandidikan Finlandia sangaik bagantung pado satiok pangajarnyo dimano pangajar mandapek otonomi tinggi dalam malaksanakan proses baraja-mangajarnyo. Guru nan mangajar di anam tahun partamo pandidikan dasar biasonyo adolah lulusan jurusan kaguruan umum, sadangkan guru mato palajaran di tigo tahun tarakhia pandidikan dasar sarato guru manangah ateh adolah lulusan magister di bidang pedagogi dan area kaahlian mereka. Dosen universitas ilmu terapan harus mampunyoi gelar magister atau doktor dilua sertifikasi ilmu pedagogi.
Kapala sakolah biasonyo lulusan pandidikan tinggi sarato mampunyoi sertifikasi pangajar sarato sertifikasi administrasi kapandidikan (atau sajenisnyo). Mereka diwajibkan pulo mampunyoi pangalaman relevan. Rektor universitas umum harus bagala doktor atau profesor dan biasonyo dipiliah dek dewan dosen di satiok universitas. Rektor universitas ilmu terapan wajib bagalar doktor atau diploma magister dan mampunyoi pangalaman di area administrasi. Konselor di institusi pandidikan diharuskan lulusan magister dengan program konseling dan pambinaan. Guru untuak siswa bakabutuahan khusus diharuskan mampunyoi gelar magister di bidang pegagogi khusus dan/atau mampunyoi kualifikasi untuak pangajaran siswa bakabutuahan khusus.
Tingkek Pandidikan
suntiang
Pandidikan Prasekolah
suntiangPandidikan prasekolah di Finlandia tadiri dari duo jinih: Pandidikan Usia Dini (usia 0-5) nan basifaik piliahan jo Pandidikan Pradasar (umua 6 tahun) nan basifaik wajib. Kasado fasilitas sarupo buku sakolah, makanan harian, jo transportasi bagi murid nan tinggal jauah dari lokasi sakolah ditangguang dek pamearintah.
Pandidikan Usia Dini marupoan pandidikan manyaluruah nan tadiri dari pangasuahan, pandidikan, dan pangajaran kapado balita dengan tujuan mandidik mereka untuak mampunyoi katarampilan hiduik jo dasar akademis (bahituang jo mambaco) sarato mamastian pakambangan sasuai jo standar umua masiang-masiang. Pandidikan iko dapek balangsuang di sabuah taman kanak-kanak atau di grup panitipan anak (daycare) swasta nan acok manggunoan rumah-rumah pribadi.[4]
Pandidikan Pradasar balaku wajib untuak kasado anak baumua anam tahun. Siswa baraja katarampilan dasar dan pangatahuan umum babagai bidang nan disasuaikan jo umua dan kamampuan mereka. Proses beraja-mangajar mangutamoan metode “baraja malalui bamain” (play learning).[4]
Pandidikan Dasar
suntiangPandidikan Dasar di Finlandia marupoan fase wajib baraja sambilan tahun untuak satiok anak baumua 7-16 tahun. Satiok siswa masuak ka sakolah dakek rumah nan ditunjuak dek pamarintah daerahnyo, walaupun di babarapo kota gadang urang tuo dapek mamiliah sakolah untuak anaknyo dalam batasan tatantu.
Indak ado panggolongan kelas maupun panjurusan salamo tahap iko. Anam tahun partamo satiok guru kelas mangajar hampia kasado mata pelajaran. Baru di tigo tahun tarakhia tadapek guru-guru khusus untuak hampia satiok mato palajaran. Indak ado Ujian Nasional untuak tingkek pandidikan dasar. Evaluasi baraja siswa dilakuan sacaro bakalanjutan dek guru takaiik, dan laporan hasia baraja diagaian satidaknyo sakali dalam satu tahun akademis. Hasia evaluasi ikolah nan digunoan untuak manantuan arah pambalajaran siswa salanjuiknyo di tingkek manangah ateh. Evaluasi iko dimukasuikan pulo untuak manjadi bahan masiang-masiang siswa untuak mamahami area-area pangembangan dirinyo ka mungkonyo dan manumbuahkan minat pambalajaran mandiri. Sasudah manyalesaian Pandidikan Dasar 9 tahun, siswa mandapek sertifikat kalulusan.[4]
Pandidikan Manengah Ateh
suntiangPandidikan Manangah Ateh di Finlandia tadiri dari duo jinih: Pandidikan Umum jo Pandidikan Vokasi. Fasilitas umum (sakolah jo makan) disadioan gratis dek pamarintah, namun murid mungkin harus mambali buku sakolahnyo surang-surang. Proses panarimoan siswa di pandidikan manangah ateh bagantuang banyak pado hasia evaluasi siswa salamo di tingkek pandidikan dasa sarato nilai nan tacantum di sertifikat kalulusan pandidikan dasa. Lulusan pandidikan dasa nan ingin malanjuikan ka pandidikan vokasi biasonyo mancaliak pulo pangalaman karajo jo faktor pandukuang lainnyo sarupo hasia ujian masuak dan tes bakat. Labiah dari 90% lulusan pandidikan dasar di Finlandia mamiliah langsuang malanjuikan ka pandidikan manangah ateh. Lulusan kasado pandidikan manangah ateh –baiak pandidikan umum maupun vokasi– mandapekan kasempatan nan samo untuak malanjuikan ka pandidikan tinggi (universitas).[4]
Pandidikan Umum
suntiangAgensi Kapendidikan Nasional Finlandia manantuan sasaran jo _target pambalajaran sarato modul pambalajaran masiang-masiang mato palajaran. Dengan panduan dari karangko kurikulum nasional, masiang-masiang institusi pandidikan berhak maramu kurikulumnyo masiang-masiang. Silabus pandidikan umum dirancang untuak pambalajaran salamo tigo tahun, tatapi fleksibilitas sistem pambalajaran mamungkinkan silabus iko untuak disalasaikan dalam wakatu 2-4 tahun.[6]
Pambalajaran basifaik modular tanpa tingkek kelas sahinggo mamungkinkan siswa untuak mancampur mato palajaran dari pandidikan umum jo mato palajaran dari pandidikan vokasi. Siswa mamiliah surang jadwal pambalajarannyo sacaro bebas dan mandiri. Sasudah manyalasaikan kasado silabus, siswa mangikuti ujian matrikulasi nasional dan mandapekan sertifikat kalulusan. Mato palajaran nan diuji di ujian matrikulasi nasional adolah ampek mato palajaran wajib nan tadiri dari bahaso ibu jo piliahan dari tigo mato palajaran iko: bahaso nasional kaduo, bahaso asing, matematika, dan salah satu mato palajaran umum (humaniora atau ilmu alam). Siswa dipabuliahan pulo maambiak ujian tambahan dilua ujian wajib.[7]
Pandidikan Vokasi (Kejuruan)
suntiangPandidikan jo palatihan vokasi tadiri dari 8 bidang pandidikan nan maagia labiah dari 50 sertifikasi vokasi. Pandidikan vokasi tadiri dari tigo tahun pambalajaran nan mancakup panempatan karajo salamo minimal 1,5 tahun. Karangko kualifikasi pandidikan vokasi di Finlandia mangukuti kapado karangko nan alah ado sajak awa tahun 1990-an nan bagantuang banyak pado karajo samo dari pihak industri. Rencana pambalajaran basifaik unik dimano satiok siswa mampunyoi rencana pambalajarannyo masiang-masiang nan tadiri dari modul wajib jo modul piliahan. Evaluasi utamo dari para siswa pandidikan vokasi adolah katarampilan praktek vokasi mereka.[4]
Pandidikan Tinggi
suntiangFinlandia mampunyoi duo jinih universitas: universitas umum jo universitas ilimu terapan (applied sciences). Universitas umum mangedepankan riset jo instruksi ilmiah, sadangkan universitas ilmu terapan mamprioritaskan panarapan ilimu sacaro praktis. Jumlah kursi nan tasadio di pandidikan tinggi Finlandia indak mampu mamanuhi jumlah calon mahasiswa nan nio masuak sahinggo standar paarimoan mahasiswa di pendidikan tinggi Finlandia sangaik kompetitif. Pado tahun 2011, hanyo 68% dari pandaftar pandidikan tinggi nan ditarimo masuak.[5] Biasonyo calon mahasiswa universitas dinilai berdasarkan nilai ujian matrikulasi nasionalnyo dan hasia ujian masuak di institusi pandidikan tinggi takaiik, sadangkan calon mahasiswa universitas ilmu terapan biasonyo maminta standar nilai labiah tinggi dan mancaliak juo pangalaman karajo calon mahasiswa.[4]
Universitas di Finlandia marupoan organisasi mandiri nan diatur dek hukum. Satiok universitas bakarajo samo dengan Kementerian Pendidikan dan Kebudayaan untuak manantuan _target operasional dan kualitatif kabutuahan sumber daya satiok tigo tahun. Hasia pajanjian karajosamo iko manjalehan pulo bagaimano satiok _target akan dimonitor dan dievaluasi. Universitas mandapekan pandanaan dari pamarintah, tetapi diharapkan juo untuak mangumpuaan dananyo surang.[4]
Tingkat Kapendidikan Panduduak
suntiang84% panduduak Finlandia nan baumua 25-64 tahun lulus dari pandidikan manangah ateh. Angko iko labiah tinggi dari rato-rato tingkek kalulusan manangah ateh di negara-negara OECD (75%). Sadangkan sabanyak 39% panduduak Finlandia mampunyoi gala sarjana, labiah tinggi daripado rato-rato OECD nan barado di tingkek 32%. 46% padusi Finlandia mampunyoi gala sarjana, sadangkan hanyo 33% laki-laki Finlandia nan mampunyoi gala sarupo. Manuruik panalitian tahun 2011 nan dilakukan dek Kementerian Pendidikan dan Kebudayaan Finlandia basamo Agensi Kependidikan Nasional Finlandia, 96% panduduak baumua mudo pado tahun tasabuik dipakiroan lulus pandidikan manangah ateh, namun hanyo 47% nan dipakiroan akan mampunyoi gala sarjana pado maso hidupnyo.[5]
Parubahan Sistem Pandidikan
suntiangPado tahun 2015, Finlandia mangumumkan rencana parubahan sistem pandidikan mereka dimano indak akan ado lai satuan mato palajaran, namun hanyo ado palajaran tematik nan mangajarkan babarapo mato palajaran dalam satu tema nan saliang bakaitan. Guru akan bakarajo samo jo murid-muridnyo untuak manantukan palajaran tematik nan akan mereka palajari sahinggo diharapkan murid akan labiah bapartisipasi dalam proses baraja-mangajar karena mereka mamiliah tema-tema nan manarik untuak diri mereka surang.[8] Pado Agustus 2016, parubahan iko balaku wajib di kasado sakolah namun dibarlakukan sacaro batahap. Pado maso kini satiok sakolah hanyo paralu manyaratokan ciek proyek tematik dalam satu tahun ajaran.[9]
Rujuakan
suntiang- ↑ "Who's No. 1? Finland, Japan and Korea, Says OECD Education Study - Site Selection Online Insider". siteselection.com. Diakses tanggal 2017-09-30.
- ↑ Anderson, Jenny (2011-12-12). "From Finland, an Intriguing School-Reform Model". The New York Times (dalam bahasa Inggris). ISSN 0362-4331. Diakses tanggal 2017-09-30.
- ↑ a b c Hart, John (2017-08-09). "The big lesson from the world's best school system? Trust your teachers | John Hart". The Guardian (dalam bahasa Inggris). ISSN 0261-3077. Diakses tanggal 2017-09-30.
- ↑ a b c d e f g h i j k l m n o "Salinan arsip" (PDF). Diarsipkan dari versi asli (PDF) tanggal 2017-09-18. Diakses tanggal 2017-09-30.
- ↑ a b c d e https://www.oecd.org/edu/Finland_EAG2013%20Country%20Note.pdf
- ↑ Adiputri, Ratih D. (2023). Sistem Pendidikan Finlandia: Belajar Cara Mengajar. Jakarta: Kepustakaan Populer Gramedia. pp. 39. ISBN 978-602-481-932-3.
- ↑ Adiputri, Ratih D. (2023). Sistem Pendidikan Finlandia: Belajar Cara Mengajar. Jakarta: Kepustakaan Populer Gramedia. pp. 18. ISBN 978-602-481-932-3.
- ↑ Ehrenfreund, Max (2015-03-24). "Finland's new plan to change school means combining subjects". Washington Post (dalam bahasa Inggris). ISSN 0190-8286. Diakses tanggal 2017-09-30.
- ↑ Spiller, Penny (2017-05-29). "Could subjects soon be history in Finland?". BBC News (dalam bahasa Inggris). Diakses tanggal 2017-09-30.