Ел Сид (филм)

„Ел Сид“ (шпански: El Cid) — американско-италијански филм од 1961 година, во режија на Ентони Мен (Anthony Mann). Главните улоги ги играат: Чарлтон Хестон (Charlton Heston), Софија Лорен (Sophia Loren), Херберт Лом (Herbert Lom), Женевив Паж (Genevieve Page), Џон Фрејзер (John Fraser), Раф Валоне (Raf Vallone), Хурд Хетфилд (Hurd Hatfield) и Масимо Серато (Massimo Serato). Со цел да се постигне автентичност, режисерот инсистирал филмот да биде снимен во Европа, каде биле искористени средновековните дворци. Филмот се одликува со богата костимографија и сценографија, како и со одличната фотографија на Роберт Краскер. Сепак, тој бил номиниран за наградата „Оскар“ само во една категорија - за песната „Соколот и гулабот“ (англиски: Falcon and the Dove), дело на композиторот Миклош Роса (Miklos Rosza) и на текстописецот Пол Френсес Вебстер (Paul Frances Webster).

Синопсис

Дејствието на филмот се одвива во 1080 година. Шпанскиот витез Родриго Дијас де Вивар (го игра Хестон) успева да ги обедини двата дела на Шпанија - христијанската и маварската - во борбата против заедничкиот непријател, арапскиот емир Бен Јусеф (го игра Лом), кој настојува да завладее со Пиринејскиот Полуостров...