Guerra Cebil Chinesa
Guerra Cebil Chinesa (1927–37; 1946–9) ye l nome dado a ua série de cunflitos antre fuorças chinesas nacionalistas i quemunistas. La sue lhocalizaçon temporal ye çcutible, i de modo giral refire-se a la Guerra Cebil Chinesa solo cumo la fase final que acunteciu apuis de la fin de la Segunda Guerra Mundial; inda assi l cunflito remonta a la fin de la dinastie Qing, an 1911.
Las hostilidades eirrompírun an 1927, durante la spediçon de Chiang Kai-shek al norte, cul spurgo de antisquerdistas de l Kuomintang ("Partido Nacional de l Pobo", nacionalista, fundado pul médico Sun Yat-sen) i ua série de lhebantes quemunistas ourbanos fracassados. L poder quemunista fui anton melhor stabelecido na ária rural, i sous defensores outelizában táticas de guerrilha para neutralizar la fuorça nacionalista, que era superior. Apuis dua campanha de trés anhos, Chiang finalmente cunseguiu çtruir ls sobietes Jiangxi (bases rurales quemunistas) criados por Mao Tsé-Tung, mas apuis de la Grande Marcha (1934-1935), ls quemunistas cunseguírun reanstalar-se an Yan'an, ne l norte de l paíç.
Ls cunfrontos antre ls dous lhados reduziran-se cula ambason japonesa de 1937, i, até l final de la Segunda Guerra Mundial, an 1945, ua defícel trégua fui mantida, anquanto lhutaba-se contra un einemigo quemun. La bioléncia anterna eirrompiu lhougo apuis de l final de la guerra, ressurgindo nua base mui maior an abril de 1946 - depuis de l general norte-amaricano George Marshall tener fracassado an cunseguir un acordo stable.
Durante l purmeiro anho de l cunflito, las tropas nacionalistas oubtubírun ganhos territoriales, ancluindo la capital quemunista de Yan'an. Antretanto, lhougo a seguir, l moral de l Kuomitang ampeçou a çmoronar face a las bien-sucedidas ouperaçones melitares de l quemunistas, deminuindo la cunfiança an sue admenistraçon, i na final de 1947 ua bitoriosa contra-oufensiba quemunista staba a camino. An nobembre de 1948, Lin Piao cumpletou la cunquista de la Manchúria, adonde ls nacionalistas perdírun meio milhon de homes, muitos de ls quales zertórun pa l lhado quemunista. Na China Central, ls nacionalistas perdírun Xandong i an janeiro de 1949 fúrun derrotados na batailha de Huai-Huai (acerca de Xuzhou). Pequin caiu an janeiro, i Nanjing i Xangai an abril. La República Popular de la China fui porclamada (1 de outubre de 1949) i la bitória quemunista cumpletou-se quando l gobierno nacionalista fugiu de Chongqing para Taiwan, an dezembre daquel anho.