Elve
De Elve (Duuts: Elbe, Tsjechies: Labe) is mit n lengte van 1164 km en n strulgebied van 144.000 km² ain van de wichtegste revieren van Midden Uropa. De Elve ontspringt ien t Reuzenbaargte en mondt oet ien de Noordzee. Heur grootste ziedrevieren binnen de Moldau en de Saale. Vrouger haitte dizze revier ien hail Nederlaand Elve, ien tieds dat tegenswoordeg de Duutse noam ien broeken is.
Run van de revier
bewarkDe Elve ontspringt ien t Reuzenbaargte ien Tzjechie. Via Pardubice en Ústí nad Labem runt de revier noar t westen tou en komt zuudoostlk van Dreesden Duutslaand (dailstoat Saksen) binnen. t Baargerg gebied tou Dresden tou hait de Sächsische Schweiz (Saksische Swits). Van Riesa ôf aan beriekt de Elve t leeglaand en begunt de middenrun van de revier.
Via Dessum en Moagdenbörg runt de Elve wieder ien noordwestelke richten. Bie t stadje Laauwenbörg begunt t Elve-Lubekknoal, dat de revier sunt 1900 mit de Oostzee verbint. Wat wieder stullensôfwoarts is der bie Geesthacht n staauw: van doar ôf aan is der getaaiwaarken en begunt de onderrun van de revier.
Aan de onderrun overheerst de stad Hambörg, de grootste stad aan de Elve. De Elve dailt heur hier't ien twij stôkken op: de Noorderelve en de Zuderelve, dij of loater weer bie ainander kommen. t Paart van de onderrun van Hambörg tou de Noordzee tou is bekend as de Nederelve.
De Elve mondt bie Koxhoaven via n estewoariom oet ien de Noordzee. t Estewoariom beriekt bie Koxhaven zien grootste bredte: 15 km. De deurzetten van de Elve ien de Waddenzee hait de Boetenelve (Außenelbe).
Ien augustes 2002 haren grote dailen van t strulgebied van de Elve as gevôlg van overvloedege regenvaal te doun mit eernsege overswimmens.