Algerye

Algerye, officieel de Demokratiske Volksrepublik Algerye is en land in de Maghreb-streake van Noordafrika. Wat uppervlak angeyt is et et gröätste land van Afrika en de arabiske wearld. Et grenst in et noordousten an Tunesie, up et ousten an Libie, up et süüdousten an Niger, up et süüdwesten an Mali, Mauritanie en de Westelike Sahara, up et westen an Marokko en up et noorden an de Middellandsken sey. Et land is halvverdröygd. Et meyste volk woant in et vrüchtbåre noorden. Et süden van et land ligt vöär en grout deyl in de Sahara. In Algerye woanet 44 miljoon lüde up ne uppervlakde van 2.381.741 kilometer in et veerkant. De gröätste stad is höyvdstad Algiers, wat by de Middellandsken sey an de küste ligt.

Demokratiske Volksrepublik Algerye الجمهورية الجزائرية الديمقراطية الشعبية (arabisk) al-Jumhūriyya al-Jazāʾiriyya ad-Dīmuqrāṭiyya aš-Šaʿbiyya République algérienne démocratique et populaire (fransk)
Vlagge van Algerye
Kaarte van Algerye
Informasie
Sproaken	arabisk (officieel), berber (officieel), fransk
Heufdstad	Algiers
Regeringsvörm	republik
Laand en inwonners
Oppervlakte - Water	2.381.741 km² 1,1%
Inwonners - Dichtheid	44.700.000 17,7 inw./km²
Koordinaten	36° 42′ N, 3° 13′ O
Oaverig
Volksleed	Kassaman ("Wy swearet")
Munteenheid	algerynsken dinar ((DZD))
Tiedzone	UTC+1 (CET))
Web | Kode | Tel.	.dz الجزائر. | DZ | 213

Vöär 1962 was Algerye et land van vöäle keiserryken en heyrskers, wåründer de numidianen. feniciers, kartagenen, romeinen, vandalen, bysantynen, umayyaden, abbasiden, rustamiden, idrisiden, aghlabiden, fatimiden, ziriden, hammadiden, almoraviden, almohaden, zayyaniden, spanjaarden, ottomanen en uutendelik et franske koloniale ryk. Et gröätste deyl van de inwoaners is berber en islamitisk. De officiele språken van et land sint arabisk en berber. In administrative saken en underwys is et fransk in bruuk. De meystspröäkene språke is algerynsk arabisk.

Algerye is ne halv-presidentiele republik. Der sint 58 provincys en 1541 gemeynskappen. In Noordafrika is Algerye nen groutmacht, up et wearldtoneyl van döärsneade bedüding. Et hevt de höygste Menskelike UntwikkelingsIndex van alle kontinentaal-afrikaanske landen en eyne van de gröätste ekonomyen van et wearlddeyl, vöär et gröätste deyl te danken an energyuutvoor. Up vyvteen landen nå hevt Algerye de gröätste öälyvöärråden van de wearld en de neagendegrötste natuurlike gasbel van de wearld. Sonatrach, et nationale öälybedryv, is et gröätste bedryv van Afrika. See leyveret groute gasvöärråden an Europa. Algerye hevt eyne van de gröätste leagers in Afrika en et gröätste defensybudget up et wearlddeyl. Et is lid van de Afrikaanske Uny, de Arabiske Liga, OPEC, de Vereynigde Natys. Et is meduprichter van de arabiske Maghreb-uny.

Dit artikel is eskreaven in et twentsk, in de Nysassiske Skryvwyse.