Grönnens Laid
t Grönnens Laid is t volkslaid van de provìnzie Grönnen. t Wuir schreven deur Geert Teis Pzn. uut Knoal. t Verscheen as eerst ien t Moanblad ''Groningen'' ien t veurjoar van 1919. As t volkslaid zongen wordt, heurt elkenain op te stoan. Blieven zitten tiedens t zingen van t Grönnens laid wordt zain as hail onbeleefd.
Van Lauwerzee tot Dollard tou,
van Drenthe tot aan t Wad,
Doar gruit, doar bluit ain wonderlaand.
Rondom ain wondre stad.
Ain Pronkjewail in golden raand
is Grönnen, Stad en Ommelaand;
Ain Pronkjewail in golden raand
is Stad en Ommelaand!
Doar broest de zee, doar hoelt de wind,
doar soest 't aan diek en wad,
Mor rusteg waarkt en wuilt het volk,
het volk van Loug en Stad.
Ain Pronkjewail in golden raand
is Grönnen, Stad en Ommelaand;
Ain Pronkjewail in golden raand
is Stad en Ommelaand!
Doar woont de dege degelkhaid,
de wille, vast as stoal
Doar vuilt het haart, wat tonge sprekt,
in richt- en slichte toal.
Ain Pronkjewail in golden raand
is Grönnen, Stad en Ommelaand;
Ain Pronkjewail in golden raand
is Stad en Ommelaand!