Yoga

Yoga (Sanskriet: योग, 'juk' of 'verbiending') is iene van de zes orthodoxe wiesgerige schoelen (darsana's) van 't hindoeïsme. Daorbuten wördt een op lichemsbeweging erichte takke van de yoga bried beoefend veur ontspanning en gezondheidsbevördering.

Een 10de-ieuws bieldtien uut Tamil Nadu, India, van een yogini in een meditatieholding of asana

Yoga in 't hindoeïsme

De bedoeling van yoga is beheersing van giest, gevuul en lief, zodej ienwörding mit de godheid bereiken kunt. De jivatma, oen eigen ziel of bewustzijn, is een onderdiel van paramatma: de baovenziel, goddelijke warkelijkheid, Brahman. Deur yoga wördt de beiden weer mit menare verienigd. Meditatie nemp vake een belangrieke plaatse in binnen de yoga-beoefening.

Iene die an yoga döt wördt een yogi (kerels) of yogini (vrouwlu) enuumd. Volgens de yogalere kuj mit yoga speciale krachten verkriegen, siddhi's. Een meister in de siddhi's wördt een siddha enuumd.

Yoga buten 't hindoeïsme

Buten 't hindoeïsme, veural in de westerse wereld vandage de dag, wördt mit yoga miest hathayoga bedoeld: een op de gezondheid erichte takke van yoga die bestiet uut een vluiende opienvolging van lichemsholdingen (asana's). Ok aosemhalingsverroeming (pranayama) doet ze an binnen de hathayoga. In de westerse wereld wördt veule an hathayoga edaone um kalmer an te doen en stress kwiet te wörden. Wieder mient ze dej van yoga smeuer wördt en det 't goed is veur 't zenuwstelsel, de klieren en aandere belangrieke organen.

Dit artikel is eschreven in 't Zuudwest-Drèents.