Adolf Anderssen
Karl Ernst Adolf Anderssen (* 6. Juli 1818 in Breslau; † 13. März 1879 ok dor), weer een düütschen Schachmeester.
As he negen Johr old weer, hett he dat Schachspeel van sien Vader lehrt, he weer denn in sien Jöögd een temelk goden Speler, aber he hett eerst 1837 sien Abitur makt un denn Mathematik un Philosophie studeert.
Nahdem he sien Staatsexamens afleggt harr, gung he 1848 nah een Probejohr an dat Friedrichs-Gymnasium in Breslau, as Huus-Schoolmeester nah Pommern. Van dor ut gung he faken nah Berlin, üm dor Schach to spelen. Dor lehr he de good Spelers kennen. De Berliner Schachsellschop hett hüm denn bold ok noch de Redaktschoon van de "Schachzeitung" up'd Oog drückt, de 1871 in "Düütsche Schachzeitung" umnömmt wurrn is und hüdtodag noch besteiht.
Mit sien Schachkarriere gung dat ober all 1848 los, as he tegen Daniel Harrwitz unentscheden speelt hett. 1851 hett he an dat eerste Turnier van de nee Schachgeschichte in London deelnommen - un wunnen. Howard Staunton un Lionel Kieseritzky hörrn to de Spelers, de achter hüm liggen. In dat glieker Johr hett he Johann Jacob Löwenthal in en Wettstriet mit 5:2 slahn.
Denn geev dat 1858 in Paris de inoffizielle Weltmeesterschapskamp tegen Paul Morphy. De hett he denn aber doch düütlich verloren. Twee Partien kunn he gewinnen un twee Remis hollen, aber Morphy wunn söben. Aber Anderssen bleev wiederheen een starken Speler. 1862 in London wurr he weer Eerster. Louis Paulsen, Wilhelm Steinitz, Joseph Henry Blackburne un annern bleven achter hüm.
To de Tiet wurrn noch veel Tweekampen utspeelt. Tegen Ignaz von Kolisch hett he 1863 eenmal unentscheeden speelt un eenmal wunnen. Dree Johr later versöch he nochmals een Weltmeesterschapskamp, dit Mal tegen Wilhelm Steinitz, aber dat hett he ok verloren. Steinitz wunn acht Partien, Anderssen blots veer.
1868 hett he in Aken een Turnier vör Max Lange un Johannes Hermann Zukertort wunnen. Zukertort weer sien Schöler, mit de he Duusende van Partien speelt hemm sall. Ok 1869 bleev he Eerster in Barmen vör Johannes Minckwitz un Zukertort. Den letzten grooten Erfolg kunn he 1870 in Baden-Baden fiern. Steinitz, Blackburne, Neumann, Louis Paulsen, Cecil De Vere, Simon Winawer, Minckwitz un annern leegen achter hüm.
Aber dornah gung dat so sacht mit hüm bargaf. He hett aber noch bit 1878 an Turnieren deelnommen.
Nah hüm sünd een paar Schachvarianten nömmt wurrn. Bekannt wurrn is he aber ok dör sien Unsterbliche Partie tegen Lionel Kieseritzky, de hüm meest all Figuren afnommen harr, aber mit een ganz eenfachen Buerntoog is de Stellung vun Kieseritzky vullkommen tosommenbraken un Anderssen, de dat all in't Kopp vörutsehn harr, wunn de Partie doch noch.
Anderssen harr een historsch Elo-Tall van 2690.