Minnerheit

Ene Minnerheit dat is ene Grupp vun Minschen binnen ene Sellschop, de sik dör welk Kennteken vun de Mehrheit vun de Minschen in disse Sellschop ünnerscheden deit. To’n Bispeel dat se en annere Spraak snackt, en annere Religion hebbt, vun en annere Rass sünd oder eenfach en annere Mentalität oder annere Vörstellungen vun Moral hebbt. Twischen Minnerheit un Mehrheit gifft dat denn faken Vöroordelen un de Minnerheit versöcht sik vun de Mehrheit aftogrenzen oder warrt vun de Mehrheit utgrenzt. Disse Spannung twischen Minnerheit un Mehrheit kann sik in welk Fäll ok in apene Gewalt utdrücken.

En typischen Fall för dat Warrn vun Minnerheitensituatschonen is dat, wenn en Rebeet vun ene Kultur besiedelt warrt, de zivilisatoorsch höger steiht as de inheemsche Kultur. Dat Besiedeln vun Amerika is dor en Bispeel för. Amerika weer kumplett besiedelt, as de eersten Europäers dor ankemen. Aver de Europäers stünnen zivilisatoorsch höger, harrn betere Wapen un weren beter organiseert. Se kunnen licht de Macht in’t Land övernehmen un hebbt denn ok anfungen sik fast antosiedeln. Mit de Tiet kemen mehr un mehr Europäers un hebbt de Inheemschen trüchdrängt. De Inheemschen weren bald Minnerheit in jemehr Land. All Macht güng vun de Europäers ut. De Inheemschen harrn en legeren Status as de Europäers.

Mit Minnerheiten warrt ganz verscheden ümgahn. Dat reckt vun Versöök ganze Völker uttorotten (Holocaust) bet to Fäll, bi de Minnerheiten würklich aktiv stütt warrt (to’n Bispeel is de irische Spraak in Irland Natschonalspraak, ofschoonst weniger as twee Perzent vun de Inwahners vun Irland Irisch as jemehr eerste Spraak hebbt). De Ümgang hängt dor massiv vun af, wat de Mehrheit, aver ok wat de Minnerheit för ene Instellung to de Situatschoon hett.