Peter vun Wrangel
Peter von Wrangel, ok Pjotr Nikolajewitsch Wrangel, russisch Пётр Николаевич Врангель (* 15. August 1878 in Zarasai, Litauen, † 25. April 1928 in Brüssel).
He weer een Baron un hett de Witten in´n russischen Börgerkrieg anföhrt. 1917 weer he as Generalleutnant mit de Suldaten, de em ünnerstellt weren, in den Süden vun Russland togang. He stamm ut de bekannte baltendüütsche Familie Wrangel. 1901 treed he freewillig in een Kavallerieregiment in un 1902 is he al Offzier wurrn. Bi den Russisch-Japaanschen Krieg hett he mitmaakt. 1906 güng he ünner den General A.N.Orlow in dat Baltikum. Dor weer op Befehl vun den Zar een Straafexpeditschoon ansett. In den 1. Weltkrieg harr he den Befehl bi een Grupp vun de Kavallerie. Vunwegen de Oktoberrevolutschoon güng he na de Krim. Vun August 1918 an hett he dor mitmaakt bi de freewilligen Truppen vun de Witten. Bi de nee Armee vun de Witten hett he as Kummandeur een Kavalleriedivision övernahmen. In´n Vörjohr 1919 övernehm he dat Kummando öber de freewilligen Verbänne vun de Witten in den ganzen Kaukasus. Dor hett he de Grupp vun de Rode Armee tweislohn un de Sowjets böse tarrt.
Vunwegen een Striet mit General Denikin müss Wrangel för een korte Tiet in´t Exil. Op´n 4. April 1920 wurr he aver to´n böversten Befehlshebber vun de witten Truppen op de Krim utsöcht. Ut düsse Suldoten hett he de Witte Armee tohopenstellt.
Man gegen de Bolschewiken keem he nich gegenan. He verleer de Hälft vun sien Armee in den Krieg un müss de Krim verlaten. An´n 14. November 1920 hebbt de lesten witten Suldaten de Krim achter sik laten. He süms seh to, datt he över de Törkie un Tunesien na Jugoslawien keem. He versöch denn, vun dor ut den Striet gegen de Bolschewiken wieder to föhren. Bavenhen hett he noch siene Memoiren schreven. De sünd 1928 ünner den Nomen "Notizen" rutkomen.
An´n 25. April 1928 is Wrangel in Brüssel storven. He weer blots korte Tiet swoor krank ween. De Verwandschop weer later vermoden, datt een Broder vun sienen Butler em mit Gift umbröcht harr. Düsse Mann weer woll een sowjetsch Geheemagent. Ünner de Eer bröcht hefft se em in Serbien. Sien Graff is een de orthodoxe Karken vun den Oort Kalemegdan. In de Stadt Sremski Karlovsci hebbt siene Frünnen een Denkmal för em opstellt.