Star Trek

Star Trek is de tosamenfatende Bövertitel vun en Koppel vun Feernsehregen un Speelfilmen, tallriek Romanen, Reeknerspelen un annere Warken ut dat Science-Fiction-Genre. De speelt all vör den Achtergrund vun de glieken Welt, de sik Gene Roddenberry 1966 utdacht hett un op de eerste Feernsehreeg ünner den lieken Titel Star Trek baseert. Vundaag is Star Trek een vun de populärsten Naams in de Historie vun de Science-Fiction-Ünnerhollen un een vun de bekanntesten Franchises in de Historie vun’t Feernsehn. „Star Trek“ warrt as Phänomen jümmer wedder internatschonal in kulturelle, technische oder sellschoppliche Tosamenhäng anföhrt un ziteert. Opstunns sünd de Rechten an Star Trek opdeelt: De Filmrechten liggt bi Paramount Pictures, de Feernsehrechten hett de CBS-Corporation.

Översicht

Idee un Grundkonzept

Star Trek beschrifft en utopisch tokamen Tiet, in de de Minschheit bannig wiet vöran kamen sünd, wat de Technik angeiht un ok de Problemen in de Sellschop. In de Geschichten geiht dat üm de Krus vun Ruumscheep un -statschonen , sünners üm de Offizeren un reisende Gäst, vun de militärsch struktureerte aver wetenschopplich utrichte Steernflott, de sik as de Föderatschoon beteken deit. Vun Bedüden is dorbi vör allen dat Vermögen, sik mit Överlichtsnelligkeit dör dat Weltall to bewegen, wat de Grundlaag dorstellt, extraterrestrisch Leevwesen to drapen.

De Minschheit hett dat in de Welt vun Star Trek butendem torecht bröcht, hüütige Problemen as Rassismus, Armot, soziale Ungliekheit un Krieg to överwinnen. Kapitalismus un de Nödigkeit Saken to köpen un to betahlen gifft dat ok nich mehr, so dat de Minscheit to en global Eenheit tosamenwossen is un sik dorop konzentreeren kann, to forschen un de Welt to begriepen. Un dat nich blots op de Eer, man ok op annere Planeten, de all tohopen in de Steernflott organiseert sünd un dorbinnen in Freed mang de annern Leevformen leevt. In disse Vereenigten Föderatschoon vun de Planeten gifft dat en Veeltall vun ünnerscheedliche Spezies, wobi de Minschheit aver en sünnere högere Positschoon innimmt.

Ofschoonst de Steernflott militäärsch organiseert un föhrt is, is dat böverste Teel un Leitmotiv dat freedlich Utforschen vun’t Universum un all de frömden Welten mit jemehr Zivilisatschonen. Dorbi warrt de Minschen un de Föderatschoon aver vun annere, tomeist imperialistische utrichte Leevwesen as Konkurrenz ansehn, wat mitünner to ne’e Kriegen un Konflikten föhrt.

Utfinner un Ideengever weer Gene Roddenberry, de mit sien Hart för egalitäär Politik weer un sien Feernsehreeg faken dorför nütt hett, üm sien Visionen vun en Sellschop, de op disse Pirnzipien baseert, to transporteeren. De Idee to en Science-Fiction-Reeg harr Roddenberry in de fröhen 1960er Johren. De Grundsatz weer vör em dorbi, en Feernsehreeg in en Tokunft spelen to laten, de sik to’n Goden wieterentwickelt hett – wat vör den Achtergrund vun’n Kolen Krieg, de Kuba-Kries, de kort dorvör weer, un en to de Tiet goot möglichen Atomkrieg to sehn is.

Feernsehregen

Dat Medienprodukt Star Trek besteiht vör allen ut söss Feernsehregen, de twüschen 1966 un 2005 produzeert worrn sünd un in de nafolgend Afsnitten vörstellt warrn schüllt. De Regen sünd in’n Enkelten:

Star Trek (dt.: Raumschiff Enterprise; later ok as Star Trek: The Original Series (TOS) betekent) vun 1966 bit 1969 mit 3 Staffeln, 79 Folgen.
Star Trek: The Animated Series (dt.: Die Enterprise; TAS) Tekentrickreeg vun 1973 bit 1974 mit 2 Staffeln, 22 Folgen.
Star Trek: Phase Two (schüll de Nafolger vun TOS warrn, is aver nich produzeert worrn)
Star Trek: The Next Generation (dt.: Raumschiff Enterprise: Das nächste Jahrhundert; TNG) vun 1987 bit 1994 mit 7 Staffeln, 178 Folgen.
Star Trek: Deep Space Nine (dt.: Star Trek: Deep Space Nine; DS9/DSN) vun 1993 bit 1999 mit 7 Staffeln, 176 Folgen.
Star Trek: Voyager (dt.: Star Trek: Raumschiff Voyager; VOY) vun 1995 bit 2001 mit 7 Staffeln, 172 Folgen.
Star Trek: Enterprise (dt.: Star Trek: Enterprise; ENT) vun 2001 bit 2005 mit 4 Staffeln, 98 Folgen.
Star Trek: Discovery (dt.: Star Trek: Discovery) vun 2017 (Produkschoon nich afslaten).

Kinofilmen

De eersten söss Kinofilmen baseert op de Original-Feernsehreeg, wiel de Filmen 7-10 op Star Trek: The Next Generation opboot sünd, wobi de sövte Film en Övergang dorstellt, woneem sik beide Generatschonen drapen doot. De ölvte Film, de in’n Mai 2009 in de Kinos kamen is, is en Prequel to de Original-Reeg ut de 1960er Johren. Dorin warrt de Kru üm Kapitän Kirk an’n Anfang vun jemehr Loopbahn wiest. De enkelten Filmtitel sünd:

1979: Star Trek: The Motion Picture (dt.: Star Trek: Der Film)
1982: Star Trek II: The Wrath of Khan (dt.: Star Trek II: Der Zorn des Khan)
1984: Star Trek III: The Search for Spock (dt.: Star Trek III: Auf der Suche nach Mr. Spock)
1986: Star Trek IV: The Voyage Home (dt.: Star Trek IV: Zurück in die Gegenwart)
1989: Star Trek V: The Final Frontier (dt.: Star Trek V: Am Rande des Universums)
1991: Star Trek VI: The Undiscovered Country (dt.: Star Trek VI: Das unentdeckte Land)
1994: Star Trek: Generations (dt.: Star Trek: Treffen der Generationen)
1996: Star Trek: First Contact (dt.: Star Trek: Der erste Kontakt)
1998: Star Trek: Insurrection (dt.: Star Trek: Der Aufstand)
2002: Star Trek: Nemesis (dt.: Star Trek: Nemesis)
2009: Star Trek (dt.: Star Trek)
2013: Star Trek Into Darkness (dt.: Star Trek Into Darkness)
2016: Star Trek Beyond (dt.: Star Trek Beyond)

De Feernsehregen

Star Trek – The Original Series (TOS)

Mit disse Feernsehreeg hett Star Trek in de 1960er Johren sien Anfang nahmen. De Titel vun disse Feernsehreeg is later de Böverbegreep över all de Saken worrn, de mit disse fiktiven Welt to doon harrn. Dat een dor nich dör’n Tüdel kummt, is veel later de Binaam The Original Series dorto kamen, un de Afkörten TOS stünn nu för disse Feernsehreeg.

De eerste Pilotfilm

Gene Roddenberry kreeg 1964 de Möglichkeit, en Pilotfilm to de Feernsehreeg to dreihn. Disse Film harr den Titel The Cage (dt.: Der Käfig), man, de Feernsehsenner NBC hett em ut ünnerscheedlich Grünnen aflehnt. De Verantwoortlichen bi Paramount fünnen de Rullenverdelen to radikal. Dor geev dat een Fro as’n Eersten Offizeer un en Buteneerdisch Leevwesen, dat utseeg as de Düvel – dat müchen se jemehr Tokiekers nich andoon. Dorför weer de Tiet noch nich riep. Man, de Makers bi Paramount hebbt Roddenberry en tweete Möglichkeit tosekert, den Pilotfilm to dreihn, ünner de Vörutsetten, dat he de Saken ännern de, de jem nich gefallen hebbt.

Tweete Pilotfilm un de Eerste Feernsehreeg

Hööftartikel: Star Trek (Feernsehreeg)

Roddenberry hett also sien Ruumschippkru nee tohopenstellt un de Rullen ännert, man bleven is de vörher wie naher vun Leonard Nimoy speelte Wetenschapsoffizeer Spock. Mit dat Nee’verdelen vun de Figuren, güng toeerst mol de Infall vun en Fro in en Föhrenspositschoon wedder fleiten un is eerst wedder in een vun de latere Feernsehregen opgrepen worrn. De ne’e Pilotfilm harr den Titel Where No Man Has Gone Before (dt.: Die Spitze des Eisbergs) un weer nu vun den Senner annahmen. De eerste Staffel vun Star Trek künn nu dreiht warrn.

Fronslüüd un Minnerheiten in de eersten Feernsehreeg dortostellen weer för de dormolig Tiet teemlich waagt. So geev dat op de Brüch mit Lt. Uhura en bedüdend Kruliddmaat, wat en Fro weer un vun Nichelle Nichols dorstellt weer. Se weer een vun de eersten swarten Fronslüüd, de in’t amerikaansche Feernsehn en gröttere Rull spelen dröfft hett. Bito harr de Enterprise en japaanschen Offizeer, Hikaru Sulu (speelt vun George Takei), un dat blots twei Johrteihnten na dat Enn vun’n Tweeten Weltkrieg. In de tweeten Staffel keem denn sogor noch en russ’schen Offizeer, Pavel Chekov, dorto, de vun Walter Koenig speelt weer. Wieter hett Star Trek ok den eersten Söten twüschen en witte un en swarte Figur in’n Feernsehn wiest, ok wenn in’n letzten Ogenblick en Kopp den Kuss verdecken deit – wat to de Tiet aver nix sünners weer. Vun’t Küssen weern ok Szenen dreiht, wo allns op to sehn weer, man dat weer de Verantwoortlichen to groot Risiko, dat ok in’t Feernsehn to wiesen. Dormols hebbt vele US-amerikaansche Bundsstaaten verboden, disse Folg to sennen.

Dat bekanntste Grundprinzip vun de Vereenigte Föderatschoon vun de Planeten is de Böverste Direktive. Se bargt vör allen en strikt Verbott, sik in de binneren Angelegenheiten vun annere Zivilisatschonen intomischen, wat all technischen un nichtechnischen Saken insluten deit, de de natürliche Entwickeln vun disse Zivilisatschonen ännern künn – ok wenn dat mit de besten Afsichten oder heemlich passeren de. Verlööft sünd blots wetenschopplich Reisen un Ünnersöken in’n Sinn vun’t Utforschen vun Zivilisatschonen, de noch keen Ruumfohrt entwickelt hebbt, wobi dat Nichinmischen jümmer to achten is.

Liekers de Feernsehreeg al vele Frünnen un Fans wunnen harr, weer se 1969 opletzt instellt vun wegen de to sieten Inschalttallen, nadem en Breefkampagne vun de Fans vörher noch de drütte Staffel dörsett harr. An sik schüll de Reeg al na de tweeten Staffel wedder instellt warrn. De progressive Veranlagen vun de Feernsehreeg is aver ok bi de nafolgend Produkschonen behollen bleven.

Star Trek: The Animated Series (TAS)

Dat Konzept vun Star Trek is in de twüschen 1973 un 1974 produzeerten Tekentrickreeg Star Trek:The Animated Series (dt.: Die Enterprise) wietermaakt worrn. Bi de Serie hebbt vele vun de Schauspelers as Synchroonsnackers mitarbeit as ünner annern William Shatner un Leonard Nimoy. De Tekentrickreeg is 1975 mit en Emmy uttekent worrn. Gene Roddenberry weer aver mit de Qualität vun de Tekentrickreeg gor nich tofreden. He hett later mol togeven, dat he de Produkschoon vun de Tekentrickreeg blots tolaten hett vun wegen dat Geld.

Star Trek: The Next Generation (TNG)

In de 1980er Johren harrn de Kinofilmen vun Star Trek finanziellen Spood, wat de Grund weer, dat Paramount de Produkschoon von en ne’e Feernsehreeg beslaten hett. De harr den Titel Star Trek: The Next Generation (dt.: Raumschiff Enterprise: Das nächste Jahrhundert) un lööp an’n 18. September 1987 to’n eersten mol in’t Feernsehn.^[1] In disse Reeg geev dat en poor Ännern: Tonächst mol, speel disse Serie ruchweg Hunnert Johr later as de eerste Feernsehreeg. Ut bekannte un unbekannte Schauspeler weer en komplett ne’e Kru tosamenstellt, un dat ne’e Ruumschipp, de USS Enterprise NCC 1701-D, weer grötter, starker un moderner as dat vörherige. Mit moderne Tricktechnik weern ok op dat technische Rebeet ne’e Standards för de lateren Produkschonen sett.

Mit de Feernsehreeg geev dat ne’e Informatschonen över dat Star Trek-Universum. De Föderatschoon hett en Weertschap in Övermaat ahn Geld, de dör de Technologie mööglich warrt. Mit Energie künnt Nehrmiddel, komplexe Konstrukschonen un elk Oort vun Materie ümwannelt warrn (Replikatertechnologie). Arbeit, Köpen un Verköpen sünd nich länger nödig, wieldat Armoot, de dör Mangel an Rohstoffen oder annere materiellen Saken enstahn künn, nich mehr vörkamen kann. Liekers gifft dat jümmer noch sünnere Stoffen, de roor sünd, to’n Bispeel de, de to dat Flegen mit Överlichtsnelligkeit bruukt warrt. Interstellar Hannel mit disse Göder is nich ungewöhnlich, man Gier un Afgunst hebbt in disse Sellschop kuum mehr Ruum. De Figuren in The Next Generation verklort faken, dat de Sinn vun de Föderatschoon un ehr Arbeit dat allgemene un dat persönliche Gootgahn is. Vele Folgen vun disse Reeg befaat sik mit philosophische Themen un Fragen, as to’n Bispeel de Folg The Measure of a Man (dt.: Wem gehört Data), wo doröver to Gericht seten warrt, wovun Rechten en Android hett. Sünners de pazifistische un tolerante Bott vun de Feernsehregen hett vele Fans antogen.

De grote Spood, den Paramount mit disse Feernsehreeg harr, hett dorto föhrt, dat bit 1994 söven Staffeln mit tosamen 178 Folgen dreiht worrn sünd. En achte Staffel is nich mehr produzeert worrn, dormit de Serienschauspelers ok op de Lienwand wesseln künnen. Aver noch bevör de Produkschoon vun TNG to Enn weer, güng dat al mit de nächsten Feernsehreeg Star Trek: Deep Space Nine (DS9) los.

Star Trek: Deep Space Nine (DS9)

Mit den Nafolger Star Trek: Deep Space Nine güng dat in de USA in’n Januar 1993 los. De Inholt vun de Geschicht löpt toeerst blangen de TNG-Feernsehreeg, blots dat de Folgen nich op’n Ruumschipp spelen deen, man op en Ruumstatschoon. Disse Statschoon – dat düüt de Beteken „Deep Space 9“ (vun’t eng.: „Deepe Ruum“) ok an – leeg an’n Rand vun dat Föderatschoonsrebeet un hett an strategisch Bedüden wunnen, nadem gliek in de Neeg en Wormlock opdeckt worrn weer, dat en Toor in den noch nich utforschten Gamma-Quadranten vun de Melkstraat dorstellen de. Mit de drütten Staffel weer denn dat op DS9 statschoneerte Kriegsschipp USS Defiant inföhrt, dat in’n Verloop vun de Serie jümmer wichtiger worrn is.

Gene Roddenberry is 1991 doodbleven, noch vördem dat Projekt DS9 ümsett worrn is. He harr an dat Konzept vun Deep Space Nine dorüm keen groten Andeel mehr. Sien Nafolger is Rick Bermann worrn. Mit disse Feernsehreeg hett sik Star Trek ’n beten wannelt. An de Steed vun en allto optimistische Welt weer nu en Welt dorstellt, wo nich allens goot löpt. Bibehollen weer aber de Uttuusch vun ethisch-moraalsche Gedanken un de na vörn wiesende Grundricht, wat sik ok al an’n Kaptein wiesen deit, de to’n eersten mol en Swarten is. Butendem warrt in Deep Space Nine en Söetn twüschen twee Fronslüüd wiest, wat för’t US-amerikaansche Feernseh ok teemlich ungewöhnlich weer. Tatsächlich weer disse Folg dorüm ok wedder in enige Bundslänner nich sennt.

De Feernsehreeg güng in’n Juni 1999 to Enn, nadem söven Staffeln mit tosamen 176 Folgen utstrahlt weern.

Star Trek: Voyager (VOY)

Mit dat Enn vun Star Trek: The Next Generation füngen de Makers vun Star Trek mit de Produkschoon vun en föfften Feernsehreeg an, de den Naam Star Trek: Voyager (dt.: Star Trek: Raumschiff Voyager). Dorin weer nu mit Cpt. Janeway (Kate Mulgrew) to’n eersten mol en Fro in de Hööftrull to sehn. Vun all Feernsehregen vun Star Trek speelt Star Trek: Voyager an’n wietsten in de Tokunft.

Dat Konzept vun VOY is ok wedder ’n annert. Dat Ruumschipp Voyager warrt dorin dör Frömdinwirken an en Steed in de Melkstraat bannig wiet weg vun de Eer verslahn. Dat se wedder na Huus kamt, dorvör bruukt dat Ruumschipp ruchweg 75 Johren. Bestimmt warrt de Serie also vun den Gedanken, en Weg to finnen, de gauer wedder torüch na de Eer föhrt. ehmols verfeendte Gruppen mööt dorbi tosamenwassen, üm gemeensom dat Teel to schapen. Anlopen is de Feernsehreeg an’n 16. Januar 1995. Ok vun Voyager geev dat söven Staffeln. Se harrn tosamen 172 Folgen.

Star Trek: Enterprise (ENT)

Vun’n 25. September 2001 an weer denn de sösste Feernsehreeg Star Trek:Enterprise produzeert. Se weer as Prequel anleggt un speelt ruchweg Hunnert Johren vör de Orignalreeg TOS. Dat bedüüt, dat de Feernsehreeg noch vör de Grünnen vun de Vereenigten Föderatschoon vun de Planeten speelt. De eersten dree Staffeln keem aver nich gott an. De Inschalttallen güngen jümmer wieter rünner un de Kritiken weern ok nich goot, so dat de Reeg vör de veerte Staffel noch mol düchtig ümkrempelt weer. Jüst so as bi de vörherigen Regen TNG, DS9 un VOY harr ok disse Serie de eersten Staffeln nödig, üm sik op en bestännige Grundlaag to finnen, wobi se sik vun’n Inholt her ok wiet vun de anfangs plaante Richt wegbewegt hett. Man, de Ännern an de Feernsehreeg hebbt nich veel an de slechten Inschalttallen doon, so dat in’n Februar 2005 verklort worrn is, dat de Serie mit Enn vun de veersten Staffel afsett warrt, ofschonst de Fans un de Kritikers to verstahn geven hebbt, dat en düchtige Verbetern to sehn weer.

Lüüd, de sik mit de Feersehreeg nauer uteneensett hebbt kemen gliekermaten to den Sluss, dat sik Star Trek:Enterprise vun de humanistischen Grundstimmung vun de Vörgängerregen afwennt harr^[2]. An de Steed vun diplomaatsch Middels warrt hier vör allen in de drütten Staffel Gewalt insett, üm to kriegen, wat’n hebben will^[3]. Kritikers seegen dorin de tietgenööss’sche Utwirken vun de Terroranslääg vun de 1990er Johren un vun’n 11. September 2001 as ok annere Saken, de de Amerikaners to de Tiet beschäftigen deen.

Speelfilmen

De US-Amerikaners weern 1969 all teemlich andoon vun de Ruumfohrt un den Weltruum vun wegen, dat se jüst de eersteMaandlanden mitkregen harrn. De fakenen Wedderhollen vun de Feernsehreeg meist Dag för Dag op öörtliche Feernsehsenners, de ungewöhnliche Oort, verpackt in Geschichten in de Tokunft Kritik an den Tostand vun de Sellschop to öven (Vietmankrieg, Rassendiskrimineeren usw.) un ok dat batze Intresse ann Weltruum hett Star Trek in de 1970er Johren düchtig populär maakt. Dat weer en Hööftgrund, worüm de NBC en tweete Feernsehreeg mit den Titel Star Trek: Phase Two' plaant hett. De Arbeit doran weer aver torüchstellt, as dat in’t Kino mit de Star Wars Filmen losgüng. In de Tiet dorna weern de Plaans jümmer wedder ümsmeten.

En Tiet lang hett dat jümmer mol wedder heten, dor schüll en Kinofilm dreiht warrn, annern Dags schüll dat doch wedder en Feernsehreeg warrn. Opletzt hett Paramount Pictures denn doch den Kinofilm beslaten, de ünner den Titel Star Trek: The Motion Picture (dt.: Star Trek: Der Film) an’n 6. Dezember 1979 in de Kinos keem. Finanziell weer de Film bannig spoodriek, man de Kritiken weern nich so goot. Siet den tweeten Film harr Roddenberry blots noch as Berader mit de Produkschoon to doon, wieldat Harve Bennett dat Regeer övernahmen hett. Dorna kemen de Speelfilmen Star Trek: The Wrath of Khan (dt.: Star Trek II: Der Zorn des Khan), de an’n 4. Juni 1982 anlopen is, Star Trek III: The Search for Spock (dt.: Star Trek III: Auf der Suche nach Mr. Spock) vun’n 1. Juni 1984 un Star Trek IV: The Voyage Home (dt.: Star Trek IV: Zurück in die Gegenwart), de an’n 26. September 1986 Premiere harr. In dissen Film weer de Deerschuul en Thema. An’n 9 Juni 1988 lööp Star Trek V: The Final Frontier (dt.: Star Trek V: Am Rande des Universums) an, de aver nich mehr so veel Spood harr as de Vörgängers. In Star Trek VI: The Undiscovered Country (dt.: Star Trek VI: Das unentdeckte Land) weer bannig düütlich Betog nahmen op den Kolen Krieg, as de Film, de 1991 rutkeem, dorüm geiht, dat feendlich Parteien na lange Tiet opletzt Freden sluten doot.

Nadem sik wiesen de, dat de ne’e Feernsehreeg The Next Generation goot bi de Fans ankeem, geev dat den Besluss, ok to de ne’e Serie en Kinofilm to dreihn. De lööp an’n 18. November 1994 in de Kinos an un hett en Brüch vun de een Serie to de annern slahn, as Capt. Picard ut de ne’e Reeg op Cpt. Kirk ut de Originalserie drapen deit. De Film mit den Titel Star Trek: Generations (dt.: Star Trek: Treffen der Generationen) weer bannig ünner Kritik, hett aver finanziell sien Opgaav doon. De achte Film Star Trek: First Contact (dt.: Star Trek: Der erste Kontakt) lööp an’n 22. November 1996 an un is de opstunns spoodriekste Star Trek-Film. Dormit hett sik de Kru üm Cpt. Picard in’t Kino ehr faste Steed sekert. De neegte Film weer Star Trek: Insurrection (dt.: Star Trek: Der Aufstand) vun’n 11. Dezember 1998, wo dat dorüm güng, dat sik Picard mit dien Lüüd gegen en Besluten vun de Steernflott stellt, wieldat se Bammel harrn, dat de Besluss de Grundrechten un -prinzipien vun de Steernflott ünnerwannert. De opstunns letzte Star Trek-Film güng an’n 12. Dezember 2002 in de US-amerikaanschen Kinos. Star Trek: Nemesis hannelt vun Shinzon, de en Klon is vun Cpt. Picard un mit en övermächtig Schipp versöcht den Planet Remus to befreen, wo de Inwahners vun’t Romulaansche Riek ünnerdrückt warrt. In de Kinos harr disse veerte Film mit de Kru üm Picard finanziell keen Spood un künn de Kosten eerst dör de DVDs wedder inspelen. Ok bi de Fans is de Film mit deelte Ansichten opfaat worrn.

Vermarkten

Weltwiet

In de letzten Johren sünd all Feernsehregen ni’t Feernsehn wedderhollt worrn. To glieken Tiet warrt de Produkschonen – sogor ok de Tekentrickreeg – siet 2002 op DVD verköfft. wobi Star Trek: The Next Generation de eerste op’n Markt weer. Vun de Speelfilmen keemen 2001 ne’e Verschonen („Special Editions“) rut. Star Trek I, II un VI hebbt dorbi sogor en poor Szenen dorto kregen. De Produkten wiest sik dorbi in en eenheitlich Bild un sünd mit digital överarbeit Toon- un Bildtechnik verbetert worrn. De ne’eren Speelfilmen kemen mit de Kru üm Cpt. Picard sünd af November 2004 in’n Hannel kamen. Butendem geev dat vun’n 8. September 2006 an to’n veertigsten Geboortsdag un Star Trek noch mol en kumplette Sammeln vun all Special Editions tohopen in een Kasten.

Siet den 16. September 2006 wiest CBS-Paramount all Folgen vun de Originalreeg ünner den Promo-Titel „Star Trek Remastered“ mit kumplett ne’e optische Effekten. An dat Projekt hebbt ü.a. Michael un Denise Okuda as ok Dave Rossi mitarbeit, de all lange Johren al Insichten in Star Trek hebbt.

Düütschland

Mit Utnahm vun de Kinofilmen is Star Trek in de düütschsprakigen Länenr jümmer ünner den Naam „Raumschiff Enterprise“ vermarkt’ worrn. Vun de Feernsehregen weer Star Trek:Deep Space Nine de eerste, de ünner den Originalnaam op’n Markt kamen is. Achteran hett sik denn aver doch de Begreep Star Trek dörsett un ok de Orignalfeernsehreeg warrt vundaag Star Trek nöömt.

In Düütschland is de eerste Feernsehreeg vun’t Johr 1972 an in’t ZDF ünner den Naam „Raumschiff Enterprise“ an Vöravend wiest worrn. Man dat geev blots 39 Folgen to sehn, dat sünd ruchweg de Hälft vun de helen produzeerten Folgen. De Senner hett de Serie dormols as’n Kinnerreeg ansehn un is ok so dor rangahn. Dormit de Gespreeken ok för Kinner dögen deen, sünd de Dialogen afwiekend vun’t Original anpasst un afännert worrn. Dordör gifft dat en Reeg vun Översetten, de den Sinn verkehrt maken deen. So is dat Pon Far, wat in de Welt vun Star Trek de „Brunfttiet“ vun de Vulkaniers is, de all söven Johren kummt, bi’t Översetten in „Weltruumfever“ ümwannelt worrn, dat man de Kinners nix von Sexualität to höörn kregen. Ok hele Szenen, de nix för Kinnerogen weern, sünd rutsneden worrn. Man, so oder so, weern de Folgen regelmatig körter maakt, wiel dat Format för Feernsehregen 45 Minuuten verlangt hett. För’t Privatfeernsehn sünd de Folgen noch mol wieter kört worrn, wobi vör allen de Afspann wegsneden worrn is.

As eersten Privatsenner hett in de 1980er Johren Sat.1 de Feernsehreeg in’t Programm nahmen. Dorbi sünd all fröhere Folgen vun’t ZDF wedderhollt worrn. Aver ok de restlichen, de dat ZDF nich wiest harr, sünd – sowiet dat möglich weer – mit de Originalsnackers synchrooniseert worrn. Man, Manfred Schott un Rosemarie Kirstein, de Dr. McCoy un Lt. Uhura snackt harrn, weern in de Twüschentiet doodbleven.

De Folg Patterns of Force (dt.: Schablonen der Gewalt) hett to sünnere Diskuschonen över de Feernsehreeg föhrt. Dorin lannt de Enterprise op en Planet, woneem sik en Nazi-Staat opboot hett. Vun wegen de Dorstellen vun de Nazi-Tekens is de Folg in düütschsparakigen Feernseh nienich utstrahlt worrn, tomindst nich in’n Rahmen vun de Feernsehreeg. Man, in’n Tosamenhang mit Themenavenden (bispeelwies Kunststücke in’t ORF) is se ok al in’t engelsche Original wiest worrn. Siet de 1990er Ohren is se aver ok in’n Hannel op Video to köpen, un in de Twüschentiet ok op DVD ünner den düütschen Titel Schablonen der Gewalt.

Ok de Tekentrickreeg is in’n düütschsprakigen Ruum wiest worrn. Achtteihn Folgen dorvun weern 1976 vun’t ZDF ünner den Naam Die Enterprise utstrahlt, man, bannig kört. Star Trek: The Animated Series gifft dat siet 2006 ok op DVD in vullstännige Faten un in de tweeten Synchroonisatschoon vun 1991 mit de Originalsnackers.

Produkten af vun Film un Feernsehn

Blangen de Film- un Feernsehnregen is Star Trek ok vele annere Oorden to Geld maakt worrn. To de Merchandisingprodukten tellt en Reeg vun Romanen (kiek ok bi Star-Trek-Romanen) to de Filmen und Serien, Comics, Magazinen, wieterföhrend Böker un ok Spelen, de in de Welt vun Star Trek verankert sünd. In dat Material warrt ü.a. de Technik vun Star Trek beschreven, Tietregen fastleggt. Serienfolgen besnackt, usw. Bito gifft dat Ruumschippmodellen to köpen as ok Figuren, Sammelkorten, Uniformen, Posters, Postkorten, Tassen un bannig veel mehr.

Spelen

Hööftartikel: Star-Trek-Spele

Fröher weern ok gau Spele utfunnen, de mit de Kru vun Captain Kirk speelt. Dat eerste sogor in de Tied, as de originale Reeg noch lopen hett.^[4]

Mit dat Upkamen vun de Reekners weern ok Spele dorför schreven. De eerste geev dat in de fröhen 1970er Johren (dat is later bekannt worrn ünner den Naam Super Star Trek) un dat weer noch vun Schölers schreven. Dat Speel is lang op vele Reekners lopen un in vele Reekner-Spraken översett un speelt.

In de 1980er Johren sünd tomeist Star-Trek-Spelen rutbrocht worrn, de nich sünners spektakulär weern un ok blots wenig Spood harrn. Dat eerste Speel, dat mit wohrhaftigen Opwand maakt worrn is, weer Star Trek: 25th Anniversary, dat 1992 för den Reekner op’n Markt kamen is. För de tweete Utgave weern de Schauspelers vun de Originalserie för de Stimmen verplicht worrn, doför mut dat Speel dann up an CD. Dat Speel harr groten Spood, so dat in de Johren dorna regelmatig ne’e Spelen mit lieken Opbo rutkamen sünd un deels glieks na en ne’en Film op’n Markt kemen oder mit de Krus vun de aktuellen Feernsehregen arbeiten deen. Mit Star Trek: Klingon Honor Guard geev dat 1998 to’n eersten mol en Speel, dat nich ut de Sicht vun de Steernflott spelen de.

De Besitter vun Star-Trek-Rechten, dat Medienünnernehmen Viacom, hett 1998 en Verdrag mit den Speleentwickler Activision afslaten, woneem bit 2005 en Reeg vun mehr oder minner spoodrieke Spelen rutkamen sünd, so to’n Bispeel de beiden Regen Star Trek: Starfleet Command 1-3 un Star Trek: Aramda 1-2. Den gröttsten Spood harrn aver de beiden Ego-Shooters Star Trek: Voyager Elite Force un Star Trek: Elite Force 2, de ok vun Lüüd geern speelt weern, de an sik mit Star Trek nix an’n Hoot harrn. Ungewöhnlich weer Star Trek: Bridge Commander, wat en Oort Flaagsimulatschoon in wohre Tiet dorstellen dee, wobi de Speler de Steed vun’n Kaptein övernimmt. Dat de Feernsehregen nich mehr so recht ankamen deen, hett sik aver ok op den Verkoop vun de Spelen utwirkt.

Enn vun’n Januar 2006 möök Bethesda Softworks en Lizenzverdrag för twee Spelen. Dat een weer för den Reekner un för de Xbox 360, dat in’n Dezember 2006 op’n Markt brocht worrn is. Enn vun’t Johr 2006 keem ok en Speel vun Quicksilver Software för de PSP un för Nintendo-DS rut. Dat tweete Bethesda-Speel is för de Plattformen PlayStation 2 un Wii utklamüstert. Dat Speel keem in’n November 2007 in de USA op’n Markt. Afsehn vun’t Speel för de neesten Filmen, is dat künnigste Speel to’t 50. Jubiläum Star Trek Online en MMORPG.

To’t 50. Jubiläum hett dat weniger ne’e Reeknerspelen geven, as to’t 25. mit Star Trek 25th Anniversary un de dorna kemen. Dorför geev dat wedder mehr Brettspelen. So sünd 2016 twee Star-Trek-Spelen up den Markt kamen, de nich blots Standard-Spelen mit Star Trek in’n Naam sünd.

Influss op de Sellschop

De Filmen un Feernsehregen vun Star Trek hebbt so vele Lüüd keken, dat vele Utdrück un Begrepen ut de Welt vun Star Trek Ingang in de Kultur funnen hebbt. As sünners dull warrt dat Inwirken vun Star Trek in de USA inschätzt, man ok in dat westliche Europa warrt Star Trek düchtig wohrnahmen.

De Fans betekent sik sülvst tomeist as Trekkers oder Trekkies. Fanclubs gifft dat weltwiet, de sik bit hüüt af un an op överregionale so nöömte Star-Trek-Conventions draapt. De Trekkies hebbt dorbi faken ok opwännig torecht maakte Kledaasch an, as man se ut de Feernsehregen kennt. Annere Fans snackt sogor klingonisch.

Vun de Fans weern ok al mol ruchweg 400.000 Brefen an de NASA schickt. Se wulln jem övertügen, dat se en Space Shuttle den Naam Enterprise geven schülln. Dat is 1976, as dat eerste Space Shuttler fardig weer, ok tatsächlich maakt. Disse Enterprise is aver nienich in’t Weltall flagen, man weer blots för Testflöög binn de Atmosphäär bruukt. Biller vun de Ruumfähr sünd ok in’n Vörspann vun de Serie Enterprise (ENT) wiest worrn.

En sünnern Aspekt bi Star Trek is dat Utklamüstern vun fiktive Technologie, Technologie also, de dat noch gor nicht gifft, oder tomindst nich geven hett, as de Dreihböker schreven weern. Jümmers warrt aver to disse Technologie ok versocht, ehr to verkloren. Utfinnen as den Warpandriev oder dat Beamen schüllt dordör beter natovulltehn wesen un in sik logisch opboot dorstellt warrn. Dat gifft woll ok en ganze Reeg vun Wetenschopplers, de jüst vun wegen disse logisch verklorte tokamen Technologie, geern de Feernsehregen keken hebbt. De beropen Physiker Stephen Hawking is to’n Bispeel en groten Fan vun Star Trek. He harr sogor en Gastoptritt in en Folg vun Star Trek: The Next Generation.

Zitaten ut Star Trek sünd ok al in bekannte Publikatschonen bruukt worrn. Ümkehrt is dat de US-amerikaansche Professer Lawrence M. Krauss 1995 in sien Book „The Physics of Star Trek“ angahn, wo binnen he na hütige Möglichkeiten socht, de Technologien vun Star Trek ümtosetten. In Düütschland befaat sik Metin Tolan vun de Technischen Universität Dortmund mit disse Saken.

Trekkies hebbt ok jümmers sülvst Geschichten schreven un de Legenn dormit utwiet. Vun eenfacke Texten bit hen to Filmen gifft dat en grote Mengde an Fan-Fiction. Mit tonehmen technische Möglichkeiten is dat jümmer beter worrn, bit dat Studio vun’t Original-Star-Trek de Fans vör Gericht bröcht hett.^[5] Nevenbi hett dat to de eersten Vörschriften för Fan-Filmen föhrt.^[6] Sowat harr dat bit dorhen nich geven.

Dat Star-Trek-Universum

De Weltruum, as de in de Star-Trek-Filmen un -Regen dorstellt warrt, hett sien Grundlaag in echte wetenschopplich Beobachten ut de Astronomie vun’t 20. un 21. Johrhunnert as ok in theoreetsch Annahmen över interstellare Objekten, vun de de moderne Physik vun’t late 20. Johrhunnert oder anfangen 21. Johrhunnert glöövt, dat dat de geven deit, man, de bit hüüt noch keeneen nawiesen künn.

In de Feernsehregen Star Trek: Deep Space Nine un Star Trek: Voyager warrt de Oorknall as de Anbeginn vun Tiet un Ruum ansehn^[7]. En Koppel vun genetisch övertüchte un hooch intelligente Minschen seht butendem dat Enn vun’t Weltall in ruchweg 60 bit 70 Millionen Johren un geiht dorvun ut, dat dat vun wegen sien egen Masse in sik sülvst tohopenfallt un en ne’en Oorknall utlösen warrt^[8].

Binnen dat Universum warrt in de Feernsehregen en grote Tall vun sünnerbore Saken, Anomalien un Vörgäng opdeckt, beobacht un utforscht, anfungen bi eenfache Singularitäten, över Rüüm, de afsluut leddig sünd, Wormlöcker bit hen to stellare Nevels ut Düstere Mateer, de fiktiv nawiest oder as bekannt vörutsett warrt. Deelwies sünd ok Objekten in de Star-Trek-Welt ansnackt worrn, de dat ok wirklich gifft, dormit dat all’ns ’n beten realitischer schient.

De Produkschonen speelt vör allen in’t 22., 23. un 24. Johrhunnert. In enige Folgen warrt mitünner aver ok in de Tiet torüch oder vörrut reist. In de Dialogen warrt ok jümmer mol wedder op Begeevnissen anspeelt oder Betog nahmen, de in fröhere Tieten un Epochen aflopen sünd. De nafolgend Tabell wiest groff, woans de Tietlien¹ bi Star Trek opboot is:

Johr	Reeg	Film
2063		Star Trek: First Contact (Hööftinholt)(1996)
2151-2155	Star Trek: Enterprise 1.-4. Staffel (2001-2005)
2233-2250		Star Trek¹ (2009)
2256-	Star Trek: Discovery (2017-)
2259		Star Trek Into Darkness¹ (2013)
2263		Star Trek Beyond¹ (2016)
2265-2269	Star Trek 1.-3. Staffel (1966-1969)
2269-2270	TAS 1./2. Staffel (1973-1974)
2273		Star Trek: The Motion Picture (1979)
2285		Star Trek: The Wrath of Khan (1982) Star Trek III: The Search for Spock (1984)
2286		Star Trek IV: The Voyage Home (1986)
2287		Star Trek V: The Final Frontier (1989)
2293		Star Trek VI: The Undiscovered Country (1991) Star Trek: Generations (Prolog) (1994)
2364-2368	TNG 1.-5. Staffel (1987-1991)
2369-2370	TNG 6.-7. Staffel (1992-1994) DS9 1.-2. Staffel (1993)
2371-2372	DS9 3.-4. Staffel (1994-1995) Voyager 1.-2. Staffel (1995)	Star Trek: Generations (1994)
2373-2374	DS9 5.-6. Staffel (1996-1997) Voyager 3.-4. Staffel (1996-1997)	Star Trek: First Contact (1996)
2375	DS9 7. Staffel (1998-1999) Voyager 5. Staffel (1998-1999)	Star Trek: Insurrection (1998)
2376-2378	Voyager 6.-7. Staffel (1999-2000)
2379		Star Trek: Nemesis (2002)

¹ Mit den Film Star Trek vun 2009 is de Tietlien ännert worrn. Die Film güng torüch in de Tiet, as de Kru vun de Originalreeg noch junge Bengels weern. In den Film passeert Saken, de den Afloop vun de Tiet düchtig verännert hebbt, so dat de Inholten vun all de Regen, de vörher produzeert weern aver later speelt hebbt, dörenanner bröcht worrn is.

In Star Trek sünd Ruumscheep dat Rüchgraat vun de Geschichten. De Ruumscheep künnt mit Överlichtsnelligkeit dör den Ruum neihn twüschen de Planeten vun de dicht bewahnte Glaxis dör. Een vun de bekannsten Utfinnen vun Star Trek is dat Beamen, also de Teleportatschoon in korte Tiet över grote Wieten. De Ruumscheep, de ünner de Flagg vun de Steernflott ünnerwegens sünd, drägt all de Beteken U.S.S., wat en Afkörten för „United Star Ship“ oder „United Space Ship“ is. De Scheep hebbt normalerwies achter dat U.S.S. as Naam en geograafsch Beteken as Städer, Strööm, Länner oder annere Öörd ut de Historie vun de Eer oder ok Beteken as se bi de US-Kriegsmarine begäng sünd, as „Enterprise“ oder „Constitution“.

In’t Weltall gifft dat bi Star Trek bannig vele bewahnte Planeten, wovun eenige ok en gröttere Rull spelen doot in de Feernsehregen oder Filmen. De bedüdenste Organisatschoon is in de Reeg de Vereenigte Föderatschoon vun de Planeten, de anfangs as Sellschop to’n Utforschen vun’t Weltall grünnt worrn is.

Kiek ok

Literatur

Hellmann, Kai-Uwe un Klein, Arne (Rtg.): „Unendliche Weiten ...“, Star Trek zwischen Unterhaltung und Utopie, Fischer Taschenbuch Verlag, 1997, ISBN 3-596-13579-6
Hoehl, Thomas un Hillenbrand, Mike: Dies sind die Abenteuer... – 40 Jahre Star Trek. HEEL-Verlag, 2006, ISBN 3-89880-668-5
Krauss, Lawrence M. : Jenseits von Star Trek. Heyne, 2002, ISBN 3-453-19670-8
Rogotzki, Nina u. a.: Faszinierend! Star Trek und die Wissenschaften. Ludwig, Kiel 2003 (2 Bännen), ISBN 3-933598-69-9
Sander, Ralph: Das Star Trek Universum Heyne, 1989-1998. 4 Bännen (in de letzten Oplaag vun 1998). ISBN 3-453-05553-5, ISBN 3-453-07759-8, ISBN 3-453-07760-1, ISBN 3-453-13370-6. Ümfatenste Tosamenstellen op düütsch
Thiesen, Stefan: Trek Science – mit Warpgeschwindigkeit in die Zukunft? MindQuest, Selm 2001, ISBN 3-934195-06-7 (Ok as E-Book to hebben.)

Websteden

Star Trek. Mehr Biller, Videos oder Audiodateien to’t Thema gifft dat bi Wikimedia Commons.

offiziell Websteed (dt.)
offiziell Websteed (eng.)
Allens över Star Trek in’t Star Trek-Wiki Memory Alpha (hdt.)

Borns

↑ startrek.com
↑ Analyys vun’n Medienwetenschoppler A. Trost in’n Afsnitt "Too close to home?"
↑ Narop to de Reeg, betogen op Överschrift 2. "Fragwürdige Entscheidungen"
↑ https://boardgamegeek.com/boardgame/21800/star-trek-game Star Trek Brettspel vun 1967, op Boardgamegeek(EN), afropen an’n 16. November 2016
↑ http://www.spiegel.de/panorama/star-trek-filmstudios-verklagen-macher-von-fanfilm-a-1082344.html Artikel över de Klage vun CBS/Paramount, Spiegel online, afropen an’n 16. November 2016
↑ http://www.startrek.com/fan-films De Star Trek Fanfilm Guidelines(EN), afropen an’n 16. November 2016
↑ Folg „Death Wish“ (dt.: Todessehnsucht) ut „Star Trek: Voyager“
↑ Folg „Chrysalis“ (dt.: Sarina) ut de Serie „Star Trek: Deep Space Nine“

[1] startrek.com

[2] Analyys vun’n Medienwetenschoppler A. Trost in’n Afsnitt "Too close to home?"

[3] Narop to de Reeg, betogen op Överschrift 2. "Fragwürdige Entscheidungen"

[4] ttps://boardgamegeek.com/boardgame/21800/star-trek-game Star Trek Brettspel vun 1967, op Boardgamegeek(EN), afropen an’n 16. November 2016

[5] ttp://www.spiegel.de/panorama/star-trek-filmstudios-verklagen-macher-von-fanfilm-a-1082344.html Artikel över de Klage vun CBS/Paramount, Spiegel online, afropen an’n 16. November 2016

[6] ttp://www.startrek.com/fan-films De Star Trek Fanfilm Guidelines(EN), afropen an’n 16. November 2016

[7] Folg „Death Wish“ (dt.: Todessehnsucht) ut „Star Trek: Voyager“

[8] Folg „Chrysalis“ (dt.: Sarina) ut de Serie „Star Trek: Deep Space Nine“

[1]

[2]

[3]

[4]

[5]

[6]

[7]

[8]