Swellkörper

En Swellkörper is en Fattgeflecht, dat sik mit Blood füllen un dordör in’n Lief physioloogsch Opgaven övernehmen kann.

Swellkörper vun’n Pint

Dweersnitt vun’n Pint mit sien dree Swellkörpers

De dree Swellkörpers vun’n Pint

An’n bekannsten sünd de Swellkörpers bi’n Pint vun’n Mann as ok vun annere männliche Söögdeerten. Dor warrt dree Swellkörpers ünnerscheedt:

Corpus cavernosum penis

Dat Corpus cavernosum penis („Pintswellkörper“) hett sien Oorsprung poorwies in de Pintschenkels (Crura penis) un sitt fast an’t Sittbeen an. De beiden Swellkörperschenkels vereenigt sik in’t Rebeet vun’n Pintkörper to dat Corpus cavernosum. Bi eenige Söögdeerten warrt de anfänglich Poorigkeit noch dör en Septum andüüt.

De Swellkörper is in en dicke Kapsel vun Binngeweev (Tunica albuginea) inhüllt, de dorvör sorgt, dat de Pint bi en Erekschoon stief un länger warrt, un sik nich eenfach as en Ballon oppluustert. Vun disse Kapsel gaht Septen na binnen, de bi eenige Deeroorden as to’n Bispeel bi de Peerd ok gladde Muskulatur bargen doot.

Dat Corpus cavernosum penis is en arteriellen Swellkörper, de in’n slappen Pint leddig is. Bi en Erekschoon gaht de so nöömten Sparrarterien (Arteriae helicinae) apen un füllt den Swellkörper mit Blood. To glieken Tiet warrt de venöse Afloop ünnerbunnen, so dat sik dat Blood in’n Swellkörper opstaut.

Bi enige Söögdeeren (Primaten (ahn den Minsch), Fleeschfreter, Insektenfreter un Fledderbeester) is de Pintswellkörper to’n Penisknaken (Os penis) verknakend oder to en Knorpelröhr ümboot.

Corpus spongiosum penis

Dat Corpus spongiosum penis (ok Corpus cavernosum urethrae, „Miegröhrswellkörper“) is in’t Rebeet vun de Peniswörtel as’n Kolben opdreven (Bulbus penis). He liggt an de Ünnersiet vun’n Pint un ümslutt de Miegröhr. Disse Swellkörper is blots swack vun Binngeweev ümgeven.

De Miegröhrswellkörper is en venösen Schwellkörper, de ok vun Blood dörströömt warrt, wenn de Pint slapp is. In’n Gegendeel to’n Pintswellkörper is de Erekschoon swack un warrt dör dat Ünnerbinnen vun’t venösen Bloodaflopen tostannen bröcht.

Corpus spongiosum glandis

Dat Corpus spongiosum glandis („Ekelswellkörper“) is dat Swellgeweev vun de Ekel (Glans penis), wat de Verlängern vun den Harnröhrswellkörper op dat vördere Enn vun’n Pint is. De sorgt bi de Erekschoon dorför, dat de Ekel dicker warrt.

Bi de Hunnen is de Ekelswellkörper teemlich goot entwickelt. De füllt sik eerst na’t Inföhren vun’n Pint wiel’t Begatten. Disse Erekschoon blifft bit to 30 Minuuten na de Ejakulatschoon oprecht. In de Tiet „hangt“ de Rüüd an de Hunnsche. De beiden mit Gewalt uteneen to bringen is nich anbröcht, to’n een vun wegen de Gefahr vun Sehren un to’n annern, wieldat de Begatten al passeert is un’t Befruchten vun de Hunnsche dorüm nich mehr to beinflussen is.

Bi de Poorhover bargt de Ekel kuum Swellgeweev. Dor gifft dat blots lüttere Venengeflechten ünner de Sliemhuut.

Swellkörper vun de Klitoris

Schema vun de Klitoris. Dat düstere is de Swellkörper

Ok Fronslüüd hebbt en Swellkörper in’t Rebeet vun jemehr Puus. Dat is dat so nöömte Corpus cavernosum clitoridis, de en Deel vun de Klitoris is un sik verhollt jüst so as Pintswellkörper. Ok hier is de Swellkörper poorwies anleggt un vereenigt sik denn to dat Corpus clitoris.

Swellkörper vun’n Oors

Dat Corpus cavernosum recti (ok Plexus hämorrhoidalis internus) sitt an’n Oors un besteiht ut en Geflecht vun Sinusoiden, dat sünd Bloodfatten, de in’n Gegensatz to Venen keen muskulären Wandandeel hebbt. Dat Corpus warrt vun de Arteria rectalis superior spiest un deent to’n fienen afsluten vun’t Oorslock dör den Sluutmuskel.