Beate Uhse

Beate Uhse-Köstlin (* 25. Oktober 1919 in Wargenau bi Cranz, Oostpreußen; † 16. Juli 2001 in St. Gallen, Swiez, an un for sik Beate Rotermund-Uhse, borene Köstlin) is en düütsche Unnernehmersche un Pilotsche ween. Se weer de eenzigste düütsche Stunt-Pilotsche un hett na den Tweeten Weltkrieg den eersten Sexshop in de ganze Welt grünnt. Hüdigendags is de Beate Uhse AG, de an de Böörs noteert is, de düütsche Nr. 1 up den „Erotikmarkt“. Se hett ehrn Naam ok an den Erotiksenner „Beate-Uhse.TV“ vun Sky Düütschland lehnt.

Leven

Beate Uhse is dat jungste vun dree Kinner vun den Grootbuern Otto Köstlin un siene Fro, de Doktersche Margarethe Köstlin-Räntsch (*1880) ween. Up’e Scholen is se ween in verscheden Internaten, unner annern an de Odenwooldscholen in Heppenheim un up Juist. De Ollern harrn de Kinner al fröh upkläärt un hefft mit jem freeweg over Sexualität snackt un over de Sexualhygiene, de dorbi nödig weer. Mit 15 Johren is Beate Meestersche vun Hessen in’n Speersmieten wurrn. Mit 16 Johren gung se na England un hett dor as Au-pair Engelsch lehrt. Achterna is se torüchgohn up dat Goot vun ehre Ollern un hett dor Huusweertschop lehrt. So harrn ehre Ollern dat wollt. An’n 28. September 1939 hett Beate Köstlin ehren Fleeglehrer Hans Jürgen Uhse heiraat. Dat weer en Kriegshochtied. 1943 is ehr Söhn Klaus boren wurrn. In’n Mai 1944 is ehr Mann to Dode kamen. In’n April 1945 is Beate Uhse vun brittsche Truppen achter Trallen sett wurrn. Nadem se free kamen weer ut de Gefangenschop hett se sik mit ehren Söhn in Flensborg daallaten. 1949 hett se den Koopmann Ernst-Walter Rotermund heiraat’. Den sien Ökelnaam weer „Ewe“. Mit em hett se noch en Söhn kregen, dat weer Ulrich. Düsse tweete Eh is an’n 9. Mai 1972 ut’neen gahn. 1983 keem rut, dat se Magenkrebs harr. Man se is wedder gesund wurrn. Mit 75 Johren hett se ehren Schien as Dükersche maakt. 1999 is se denn to’n Ehrenborger vun de Stadt Flensborg maakt wurrn. Beate Uhse is in’n Juli 2001 in en Sükenhuus in de Swiez sturven. Se harr en swaar Lungenfever harrt un is later up’n Karkhoff in Glücksborg inkuhlt wurrn. Dat ZDF hett dat 2011 unnernahmen, ehr Leven in en Film mit den Titel „Beate Uhse – Das Recht auf Liebe“ fast to holen. De düütsche Schauspelersche Franka Potente hett dor de Hööftrull bi speelt.

Literatur

• Elizabeth D. Heineman: Der Mythos Beate Uhse. Respektabilität, Geschichte und autobiographisches Marketing in der frühen Bundesrepublik. In: Werkstatt Geschichte. 40, 2006. (Vulltext as PDF)
• Jürgen Hobrecht: Beate Uhse. Chronik eines Lebens. Beate Uhse Holding, Flensborg 2003, ISBN 3-00-010643-X.
• Beate Uhse, Ulrich Pramann: Mit Lust und Liebe. Mein Leben. Ullstein, Frankfurt am Main/Berlin 1989, ISBN 3-550-06429-2.
• Beate Uhse, Ulrich Pramann: Ich will Freiheit für die Liebe – Beate Uhse. Die Autobiographie. Ullstein Taschenbuch, München 2001, ISBN 3-548-60049-2.
• Beate Uhse: Sex sells. Die Erfolgsstory von Europas größtem Erotik-Konzern. Knaur, München 2002, ISBN 3-426-77599-9.
• Uta van Steen: Liebesperlen – Beate Uhse. Eine deutsche Karriere. Europäische Verlagsanstalt, Hamburg 2003, ISBN 3-434-50548-2.

Filmografie (Utwahl)

• 2011: Beate Uhse - Das Recht auf Liebe.

Weblenken

• Foto Beate Uhse vor ihrem Versandhaus (1969) bei wdr.de
• Beate-Uhse.TV
• Beate-Uhse-Shop