Belize River
De Belize River (spaansch Río Belice) is en 228 Kilometer langen Stroom in dat Land Belize, de dör de Distrikte Cayo un Belize löppt un in de Karibische See münnt.
| Belize River | ||
|---|---|---|
| Laag | Belize | |
| ||
| Stroomsystem | Belize River | |
| Läng | 228 km | |
| Born | bi San Ignacio/Santa Elena ut Mopan un Macal | |
| Münn | bi Belize-Stadt in de Karibische See | |
| Koordinaten Münn: | Koordinaten:17° 32′ N, 88° 14′ W17° 32′ N, 88° 14′ W | |
| linke Blangenströöm | Billy White Creek, Tryntsje Strom, Iguana Creek, Quaco Creek, Saturday Creek, Labouring Creek, Black Creek, Mexico Creek | |
| rechte Blangenströöm | Red Creek, Garbut Creek, Barton Creek, Little Barton Creek, Warrie Head Creek, Teakettle Creek, Roaring Creek, Mount Pleasant Creek, Rock Dondo Creek, Beaver Dam Creek, Mussel Creek, Burrell Creek, Baboon Creek | |
 | ||
De Stroom billt sik twüschen San Ignacio/Santa Elena un Santa Familia (in’n Distrikt Cayo) dör dat Toohopfleten von Mopan River un Macal River.
De Mopan River is mit över 200 Kilometer de längere Arm. He hett sien Born in dat Municipio Dolores, Departamento Petén, Guatemala. De Macal is üm un bi 112 Kilometer lang un hett sien Born in en unbewahnten Deel von de Maya-Bargen von Belize.
Mopan un Belize River tohooprekent billt en över 400 Kilometer langen Stroom.
Verloop
ännernVon de Steed, an de Mopan un Macal tohoopfleet, flütt de Belize River na Noordoosten. Op dat linke Över doot de Öörd Billy White, Spanish Lookout, Iguana Creek un Valley of Peace liggen un op dat rechte Över de Öörd Esperanza, Central Farm, Georgeville, Unitedville, Blackman Eddy, Ontario, Teakettle, Camalote, Roaring Creek, Belmopan un More Tomorrow.
Dorbi nimmt de Stroom von rechts den Barton Creek, den Little Barton Creek, den Roaring Creek un den Beaver Dam Creek op. De Steed, an de von links de Labouring Creek in’n Belize River münnt, is ok de Steed, an de de Stroom för de nächsten 16,5 Kilometer de Grenz twüschen de Distrikte Cayo un Belize billt. Bi de Big Falls trennt sik Distriktsgrenz un Belize River wedder un de Stroom flütt för’n Rest von sien Loop dör’n Distrikt Belize.
Hier doot op dat linke Över de Öörd St. Paul’s Bank, Willows Bank, Double Head Cabbage, Bermudian Landing, Isabella Bank un May Pen liggen un op dat rechte Över Scotland Halfmoon un Flowers Bank.
Twüschen May Pen un Gardenia münnt von links de Black Creek in’n Belize River un op dat Över güntsied de Mussel Creek. Von hier an dreiht de Stroom op en Süüdoost-Kurs vörbi an de Dörper Gardenia, Grace Bank, Sand Hill, Maxboro, Gentleville, Lords Bank un Ladyville op dat linke Över un Buttercup un Burrell Boom op dat rechte. Bi Burrell Boom löppt de Burrell Boom Cutoff mit en Brügg över’n Stroom.
In’n Süüdoosten von Ladyville münnt de Stroom in de Karibische See. Fröher is de Stroom aver över’n Haulover Creek dör Belize-Stadt afflaten, de vondaag blots noch en Siedenarm billt. Bi’n Haulover Creek geiht ok de Philip Goldson Highway mit de Haulover Bridge över’n Belize River.
De Stroom un siene Övers höört deelwies to de Schuulrebeden von dat Labouring Creek Jaguar Corridor Wildlife Sanctuary un dat Community Baboon Sanctuary.
Historie
ännernDe Naam von’n Stroom kummt as Río Balís 1677 in en Reisbericht von José Delgado toeerst vör. Wo de Naam von afkummt, lett sik nich mehr seker seggen. Een Theorie is, dat dat von dat Maya-Woord belix kummt, dat „muddig, drööv Water“ bedüüdt.
De Stroom is fröher ok Old River nöömt worrn (de New River liggt wieder in’n Noorden in Belize). De Belize River weer för de Europäers de wichtigste Verkehrsweg, üm in dat Binnenland von Belize vörtodringen. De Baymen hebbt langs den Stroom en Reeg Lagers opslahn, över de Campecheholt un later Mahagoni slahn un den Stroom dal flött worrn is. Ok Chicle is langs den Stroom sammelt worrn. De Stroom is bet in dat 20. Johrhunnert de Levensader för dat Binnenland bleven. Eerst in de twete Hälft von dat 20. Johrhunnert weren de Straten (vör allen de Western Highway) so good utboot, dat de Verkehr jümmer mehr över de Straat lopen dee.
