Boddenopweken
Boddenopweken (in de Fackspraak ok Liquefakschoon) is en Vörgang, bi dat waterrieke sandige Boddenschichten dör stark Schuckeln fletig warrt. So en Vörgang kann to’n Bispeel bi Eerdbeven beobacht warrn un dorbi ok to Schadens an de Infrastruktur föhren. Sünners Schichten mit fienen Sand un siete Waterpermeabilität – dat Dörlaten vun Water – sünd dörfor anfallig. Dorbi wirkt en Druck (dynamische Last), de sik na all Sieten hen foortsetten deit, op dat Water, dat sik kuum tosamenpressen lett. Dat Water weer vörher twüschen de fienen Sandkoorns, de tosamen en faste Föög billt hebbt. En Ströömdruckgefäll, wat ok as Porenwateröverdruck betekent warrt, boet sik dordör in de Sandschicht op. De Koornföög warrt dorbi verdicht un verlütt dorbi sien Scheerfastigkeit. So warrt de Sandschicht to en fleten Sand-Water-Bree, wobi Rebeten vun’n Ünnergrund rutpresst warrn künnt. Op disse Wies warrt de hele Schicht instabil, so dat dor sogors Hüüs in versacken künnt. In’t Watt oder an’n natten Sandstrand kann een den Effekt ok beobachten, wenn de natte Sand bi’t Oppedden üm den Foot rüm hoochquellt.
Weblenken
ännern
- Bodenverflüssigung (YouTube-Video)
- Soil Liquefaction Web Site (engelsch)