Dildo (Sexspeeltüüch)

En Dildo (wohrschienlich ut de Italieensche Spraak vun diletto „Vergnögen“) is en Sexspeeltüüch un lett in siene klassische Form un Grötte na en stieben Penis. Man in de lesten Johren gifft dat ok Dildos in annere Formen un Farven. Ok nee Materialien weert utprobeert. For Froenslüde gifft dat hüdigendags faken Dildos in bunte Klören un unverwachte Formen, wieldes Mannslüde sik faken an natürliche Phallusformen hoolt. De Dildo warrt bruukt to'n Rinsteken in de Puus oder in dat Morslock. Bi de Masturbatschoon schöllt bi Froenslüde de Klitoris un de G-Punkt targt weern, wieldes dat bi Mannslüde um de Prostata geiht. Bi dat Sexspeel warrt de Dildo ok to'n gegensiedigen Targen vun de Geslechtsdeele bruukt. Gegen den Vibrater over hett de Dildo keen Motor un mutt vun'n Minschen sülms hen un herröögt weern.

Dildo

Geschicht

Al vun de Antike ut dat 6. Johrhunnert v. Chr. her sünd Dildos bekannt. Dormols sünd se olisbos (pl. olisboi) nömmt wurrn. Dat lett so, as wenn düsse antiken Dildos nich bruukt wurrn sünd bi de Masturbatschoon, man ehrder, um den Partner bi dat Ankieken uptoprickeln un to targen (Voyeurismus). Dormols hett dat al tämlich veel Formen geven, unner annern is up en Vasenbild en twillden Dildo mit twee Ennen to sehn. Man de Wuddeln vun de Dildos gaht noch veel wieter torüch. In't Johr 2005 is in de Höhl Hohler Fels en Phallus ut Steen funnen wurrn, de weer 28.000 Johre oold. Man dat is nich kloor ut to maken, ob de Phallus as Dildo bruukt wurrn is, ob he bi'n Kultus en Rull speelt hett, oder ob he to'n Toneihn bruukt wurrn is. Ok de olen Ägypters wussen dor al wat vun af, datt en Dildo dor to helpen kann, bi'n Sex mehr Lust to spören un hefft Dildos ut Pottklei herstellt. In dat ole China sünd se ut Porzellan maakt wurrn. Ok ut Ledder, Holt, Wass un Glas hett dat Dildos geven. Hüdigendags weert düsse Sexspeeltüge sunnerlich ut Silikon, PVC, Acrylglas, Aluminium un Eddelstahl herstellt.

Dildo ut Acrylglas

Hannel

Dat is begäng, Dildos in Sexshops to kopen, man midderwielen gifft dat ok en Form vun Direkthannel, wo so nömmte Dildofeen na Huus kaamt un bi Veranstalten as Tupperparties Dildos un annere Erotikartikels wiest un vörstellt un verkoopt.

Weblenken

Dildos. Mehr Biller, Videos oder Audiodateien to’t Thema gifft dat bi Wikimedia Commons.

• Holten Dildo un Holten Vibrater