Divine Secrets of the Ya-Ya Sisterhood (Film)
Divine Secrets of the Ya-Ya Sisterhood (op plattdüütsch so veel as „Göttliche Geheemnissen vun de Ya-Ya-Süsterschop“; dt.: Titel: Die göttlichen Geheimnisse der Ya-Ya-Schwestern) is de Titel vun en Filmdrama vun Callie Khouri ut dat Johr 2002. Dat Dreihbook baseert op den Roman Divine Secrets of the Ya-Ya Sisterhood vun Rebecca Wells ut dat Johr 1996.
| Filmdaten | |
|---|---|
| Plattdüütsch Titel: | — |
| Originaltitel: | Divine Secrets of the Ya-Ya Sisterhood |
| Düütsch Titel: | Die göttlichen Geheimnisse der Ya-Ya-Schwestern |
| Produkschoonsland: | USA |
| Johr vun’t Rutkamen: | 2002 |
| Läng: | 112 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Callie Khouri |
| Dreihbook: | Mark Andrus Callie Khouri |
| Produkschoon: | Bonnie Bruckheimer Hunt Lowry |
| Musik: | T Bone Burnett David Mansfield |
| Kamera: | John Bailey |
| Snitt: | Andrew Marcus |
| Szenenbild: | David J. Bomba |
| Kledaasch: | Gary Jones |
| Dorstellers | |
| |
Inholt
ännernDe veer Fründinnen Vivi, Teensy, Caro und Necie leevt in Louisiana un swöört sik een Nacht op en Karkhoff in en Ritual duersome Tro. So warrt de geheeme Gemeenschop vun de ‚Ya-Ya-Süsters‘ boren.
Johrteihnten later is Vivianes öllste Dochter Siddalee ‚Sidda‘ Walker al utwossen. Se schrifft Theaterstücken un verraat in en Interview, dass se wegen ehr Mudder en swore Kindheit hatt hett. Vivi geiht dorophen in de Luft un föhlt sik apentlich as slechte Mudder dorstellt. De beiden kriegt sik över Telefon düchtig in de Wull. Opletzt is Sidda so in de Brass, dat se ehr Mudder vun ehr de Hochtiet mit ehrn langjohrigen Fründ Connor utladen deit.
Ahn Vivi ehr Weten besöökt ehr Fründinnen Sidda. Man de stellt sik stur un will nich över ehr Mudder snacken un sik vör allen nich mit ehr versöhnen. De Fronslüüd doot so as wenn so opgeven un sik nich wieter inmischen doot. Se laadt Sidda to’n Eten in en Restaurant in, woneem se ehr wat in ehr Drinken doot. Sidda fallt dorop rin un warrt ahn Besinnen na Louisiana bröcht, woneem se in en Huus wiet af de Levensgeschichte vun ehr Mudder höörn schall.
Vivi harr dat sülvst nich licht in ehr Kindheit. Ehr egen Mudder, de psychisch unbestännig weer, künn ehr nich lieden: se weer bang för Vivi ehr Wehl un togliek ok ieversüchtig dorop, dat ehr Vadder ehr so todoon weer, wiel se sülvst slecht behannelt weer. Vivi wull en jungen Mann, den Broder vun Teensy, heiraten, man ehr grote Leevd is in’n Krieg doodbleven. Dorophen hett se Shep heiraat, de sik för dull in ehr verkeken harr. Man, se künn un wull dat nich tolaten, dat Shep ehr to nah kummt un füng mehr un mehr an to supen. Mehrmols hett se ehr Familie verlaten, vunwegen dat se free un ahn Binnen wesen wull. Man, jeedmol keem se wedder torüch ut Leevd to ehr Kinner. Wenn Vivi nich dor weer, hett Sidda as dat öllste Kind vele vun ehr Opgaven övernahmen. Opletzt hett Vivi versöcht ehr Superee to överwinnen, man ut egen Kraft hett se dat nich henkregen. So is se an en Dokter kamen, de ehr Pillen verschreven kregen. Man de hebbt ehrn geistigen Tostand noch slimmer maakt. Een Avend is Vivi nervlich tosamenbroken, hett ehr öllsten dree Kinner ut dat Huus in’n Regen dreven un jem mit’n Gördel verjackt, üm jem ‚rein to maken‘. Dorna is se in en psychiatrische Klinik inwiest worrn, woneem se en half Johr blieven müss. In de Tiet hett Sidda de Hööftlast dragen, de sik vör de Jüngeren verantwoortlich föhlt hett, op de annern Siet aver ok de Pien vun ehrn Vadder föhlen de.
Eerst dör Vivi ehr Ya-Ya-Fründinnen warrt Sidda gewohr, worüm ehr Mudder nich dor wesen is. Dordör, dat se den Achtergrund nu kennt, winnt se en ne’e Sichtwies op de Saken vun fröher. Un op eenmol kann se sik ok wedder op de velen schönen Momenten mit ehr Mudder torüch besinnen, ahn dat togliek ok de gresigen Saken wedder hooch kamt. Se versöhnt sik ok wedder mit Connor, mit den se wegen den Stress twüschendör Striet harr un den se meist de Hochtiet afseggt harr, vunwegen dat se Twievel kregen harr, goot noog för em to wesen. Un sogor mit ehr Mudder kummt se wedder kloor, de versöcht harr, Sidda to hassen – wat se aver nich künn. Vivi sütt in, dat Sidda al dat ümsett hett, wat se sülvst jümmer wullt hett. Un sogor ehr Eh mit Shep füllt sik nu mit nee Leven.
Toletzt beslutt Sidda, dat ehr Hochtiet in Louisiana stattfinnen schall. Ehr Mudder freit sik düchtig doröver. Butendem warrt se opletzt as föfft Liddmaat in de Gemeenschaft vun de Ya-Ya-Süsters opnahmen.
Kritik
ännern- F. X. Feeney schreev in de LA Weekly dat de Dorstellers stark weern un de Film mit Künnen Elementen vun en Farce mit de vun en intensiv Filmdrama verbinnen de.
- William Arnold meen in’n Seattle Post-Intelligencer, dat de Speelbaas’sche nich bang weer, de düsteren Siteen vun’t Leven to wiesen, de deelwies bannig düster weern. Se loov Bullock un Burstyn as ok de brillanten Navendorstellers Garner, Smith, Knight un Flanagan[1].
Utteken
ännernDe Film is vör dree Filmpriesen vörslahn wesen, neemlich för den Teen Choice Award, den Prism Award un den PFCS Award. Wunnen hett he aver keen dorvun.