Greeksche Mythologie
De Greeksche Mythologie is, wöörtlich verstahn, de Lehr vun de greekschen Mythen un Sagen. Dor weert Vertellsels un Döntjes över Gödder un Halfgödder in vertellt, un wat düsse Gödder un Halfgödder mit de Minschen to kriegen hefft.
Wo dat üm geiht
ännernDe Mythologie verklaart, wie de Welt tostanne kamen is un wie dat ween is, as Steerns, Planeten, Minschen, Gödder, dat Böse un de Süken upkamen sünd. Ok Saken, de in de Natur passeert, weert verklaart.
Wie an de Mythen rummuddelt wurrn is
ännernDe Greeksche Mythologie weer de Grundlaag för den Gloven un för dat Denken vun de olen Greken. Mit de Tied hefft de olen Greken nich bloß jem ehre egen olen Mythen tohopenstellt un in en System bröcht, man se hefft dor ok jummers an rummuddelt un wat Ne'et toföögt. Stammbööme vun bekannte Gödder un mythische Wesen sünd upstellt wurrn, öllere Gödder sünd in de Greeksche Mythologie upnahmen wurrn, ofschoonst se an un for sik ut ganz annere Ecken vun de Welt kerkamen weern, as ut Anatolien, Mesopotamien oder ut dat ole Ägypten. Dor sünd ok nee Mythen bi tostanne kamen, de denn verklaren schollen, wo so en „ne'en“ Gott miteens herkamen is. Ok, wat in de Historie vör lange Tied passeert weer un meist al ganz vergeten weer, is ummuddelt un hooch böört wurrn to en Mythos. So passeer dat bi de Saken rund üm Troja to, de Homer upschreven hett, oder bi de Geschicht vun de Amazonen. Up düsse Aart is de greeksche Mythologie mit de Tied jummers mehr utbreedt wurrn. Amenne is dat swaar, dor richtig dör to finnen.