Hedgefonds

Hedgefonds (vun engl. to hedge, afsekern), up Engelsch hedge fund, sund en sunnerliche Aart vun Investmentfonds. Se leggt dat Geld, över dat se verfögen doot, mit en hoget Risiko an. Grundlaag für ehre Anlagestrategie is de Spekulatschoon. Bi Hedgefonds gifft dat Chancen up bannig hoge Renditen, man ok de Gefohr, dat all Geld verloren geiht.

To en Hedgefonds höört dat, dat mit Derivaten hannelt warrt un dat Kortverkööp begäng sünd. Dor kümmt ok de Naam vun her. Denn düsse Instrumenten weert nich bloß to’n Spikeleern, man ok to’n Afsekern (Hedging) bruukt. Dor kümmt noch to, dat Hedgefonds mit frömd Geld arbeiden doot un so en höger Egenkapitalrendiet tostanne kriegt (Hevel- oder Leverage-Effekt).

De meisten Hedgefonds sitt nich in Europa oder in de USA, man an so nömmte Offshore-Finanzplätz, tomeist lüttje Inseln, wo dat minne Upsicht över den Finanzmarkt gifft. Bekannte Hedgefonds sünd de Quantum Funds vun den Investmentbanker George Soros un de Fonds Long-Term Capital Management, de 1998 tohopenstört is. To dat Enne vun dat Johr 2006 hefft över de ganze Eer hen bi 1,6 Billionen US-Dollar in Hedgefonds steken.