Jumanji (Film)
Jumanji is de Titel vun en US-amerikaanschen Fantasy-Aventüerfilm ut dat Johr 1995. De Speelbaas vun de Filmkummedie weer Joe Johnston, de Hööftrullen speel Robin Williams. Dat Dreihbook is na dat Kinnerbook Jumanji vun Chris Van Allsburg ut dat Johr 1981 schreven worrn. Dat Book is later mit de Caldecott Medaille uttekent worrn. De Vörlaag för dat fiktive Speel Jumanji in dat Book un in’n Film is möglicherwies dat bekannte Brettspeel Parcheesi wesen.
| Filmdaten | |
|---|---|
| Plattdüütsch Titel: | — |
| Originaltitel: | Jumanji |
| Düütsch Titel: | Jumanji |
| Produkschoonsland: | Vereenigte Staten |
| Johr vun’t Rutkamen: | 1995 |
| Läng: | 101 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Joe Johnston |
| Dreihbook: | Greg Taylor, Jim Strain Chris Van Allsburg Jonathan Hensleigh |
| Produkschoon: | Scott Kroopf, William Teitler |
| Musik: | James Horner |
| Kamera: | Thomas E. Ackerman |
| Snitt: | Robert Dalva |
| Szenenbild: | James D. Bissell |
| Kledaasch: | Martha Wynne Snetsinger |
| Dorstellers | |
| |
Inholt
ännernIn’t Johr 1869 föhrt twee Jungs in de Nacht in en düsteren Woold – ruchweg een Kilometer vun den nächsten Oort weg – un hebbt vör, dor en Kist mit swore iesern Keden to vergraven. Se sünd bang bit op de Knaken, vunwegen dat in de Kist ogenschienlich wat bannig gefährlichet is. De Film blennt wieter in dat Johr 1969: De Oort is intwüschen wossen un de Steed, woneem de Kist vergraven is, is nu en Bosteed dicht bi de Schoh-Fabrik vun Sam Parrish. Den sien Söhn Alan warrt vun en Koppel vun droke Jungs schikaneert un verhaut. Bi den Vörfall höört he Trummeln un finnt so de olle Kist. He maakt de Kist apen un finnt dor binnen en oolt Brettspeel mit den Naam Jumanji. As sien Fründin Sarah Whittle vörbikummt, fangt se an to spelen. Man, gau stellt sik rut, dat dat en groten Fehler weer. Wenn dat Speel inst anfungen is, mutt dat ok toenn speelt warrn, man, mit jeedeen Wörpelworp kummt en nee Hinnern in’t Speel, dat jem dorvun afhollen deit, dat Speel toenn to bringen. Dat sünd Eerdbeven, Beester (as Moskitos, Apen, Löwen…), un annere Gefohren ut’n Dschungel (as Stampede, Driefsand, Monsunregen…). Bi’n eersten Tog kummt ut’n Schorsteen en groten Swarm afrikaansche Fleddermüüs, de över Sarah herfallt, man bi’n tweeten Tog warrt Alan in dat Speel „sogen“ un blifft dor fangen.
Sössuntwintig Johren later teht de Wesenkinner Judy un Peter Sheperd mit jemehr Tante Nora in dat grote aver leddige Huus in, dat fröher Alan sien Öllern tohöört hett. Ok de beiden finnt na korte Tiet dat Speel un maakt de Partie wieter. Dorbi kriegt se Alan ut dat Speel free. De is intwüschen 26 Johren öller worrn un hett de verleden Tiet in’n Dschungel tobröcht. Üm dat Speel toenn to bringen un so de Gefohr vun dat Speel tonichten to maken, söökt se Sarah, de vun den Vörfall dormols noch bannig mitnahmen un licht hysterisch is. Opletzt bringt se ehr dorto, wieter deeltonehmen, dat de Spöök vun Jumanji dörbroken warrn kann. In’n Verloop vun’t Speel kriegt se dat mit allerhand Aventüren to doon, de jem vun een Gefohr in de nächste bringen deit.
Opletzt kriegt se dat Speel fardig un de Tiet dreiht sik torüch to de Tiet, as Sarah un Alan dat Speel anfungen hebbt. Se beide sünd wedder de Kinner vun dormols. Alan verdriggt sik wedder mit sien Vadder, mit den he sik kort vör dat Speel noch in de Wull kregen harr. Alan un Sarah blieft tosamen un gaht gemeensom dör’t Leven. Tosamen künnt se dorför sorgen, dat de Öllern vun Judy un Peter nich den Unfall hebbt, de de Kinner to Wesen maakt harr. An dat Speel binnt se Stenen fast un smiet dat in en Stroom, woneem dat ünnergeiht un wegspöölt warrt. In de letzten Szeen is aver to sehn, woans dat Speel an en Strand anspöölt worrn is un Minschen vun de Trummeln vun Jumanji anlockt warrt.
Kritik
ännernDat Lexikon vun’n internatschonalen Film meen to den Film, dat dat en in de Actionszenen rasant inszeneert Fantasy-Aventüer weer, dat mehr op Horroreffekten sett as op Humor un Poesie. Ok weer op de animeerten Tricks mehr Weert leggt as op dat Entwickeln vun de Geschicht un dat Dörteken vun de Figuren. Wegen de Effekten, de deelwies teemlich bang maken künnen, weer dat keen Film för jüngere Tokiekers.[1]
Utteken
ännernDe Film Jumanji weer alltohopen för twölf Filmpriesen vörslahn, vun de he veer winnen künn:
- 1996: den Saturn-Pries in de Kategorie Best Nevendorstellersche för Bonnie Hunt
- 1996: den Saturn-Pries in de Kategorie Best Trickeffekten för Stan Parks, Industrial Light & Magic un Amalgamated Dynamics
- 1996: den Young Artist Award in de Kategorie Best Familienfilm – Action-Aventüer
- 1997: den Huabiao Film Award in de Kategorie Rutragen översett utlännschen Film
Borns
ännern- ↑ Filmkritik in’t Lexikon vun’n internatschonalen Film
Weblenken
ännern- Jumanji in de Internet Movie Database (engelsch)
- Kritiken to Jumanji op Rotten Tomatoes