The New Avengers
| Daten vun de Reeg | |
|---|---|
| Plattdüütsche Titel: | — |
| Düütsche Titel: | Mit Schirm, Charme und Melone |
| Originaltitel: | The New Avengers |
| Produkschoonsland: | Grootbritannien |
| Produkschoonsjohr(en): | 1976–1977 |
| Produzent(en): |
Brian Clemens |
| Episodenläng: | 50 Minuuten |
| Episodentall: | 26 in 2 Staffeln |
| Originalspraak: | |
| Musik: | |
| Genre: | |
| Eerst Sennen: | 22. Oktober 1976 op ITV |
| Eerst Sennen (D): | 12. Januar 1978[1] op ARD[1] |
| Dorsteller | |
| |
The New Avengers (op Platt so veel as „De ne’en Afrekers“, dt. Titel: Mit Schirm, Charme un Melone) weer de Titel vun en britisch Feernsehreeg, in de dat üm britische Geheemagenten geiht. Dat is en Reeg wesen, de an en fröhere Feernsehreeg, de in de 1960er Johren ünner den Titel The Avengers wiest worrn is, anknütten de. En vun de Hööftrullen is John Steed, de ok de Hööftfigur vun de eersten Reeg wesen is. Vun The New Avengers gifft dat twee Staffeln, de tosamen 26 Folgen hebbt. Se sünd jüst so opmaakt as dat bi de Originalreeg wesen is, man allgemeen is disse Reeg wat spannender anleggt un bargt mehr Actionelementen.
Grundkunzept
ännernDe Feernsehreeg is jüst so anleggt wesen, as ehr Vörgänger The Avengers: To Anfang paseert wat gresig’t, wat den Insatz vun’n Geheemdeenst nödig maakt, de sik den op de Söök na Sporen un na den Bösen maakt. De Kru üm John Steed warrt dorvun wies un maakt sik an de Arbeit, wobi sik de dree faken opdeelt un jeedeen sien Deel to’n Opkloren vun den Fall bidrägen deit, wobi dat an’t Enn tomeist denn all dree wedder tohopen föhr un se gemeensom de Bösen fastnehmt oder utschalt.
Produkschoonshistorie
ännernVörloop
ännernDe Originalreeg weer 1969 teemlich gau to Enn gahn, as sik för wietere Produkschonen nümms mehr finnen de, de dat Geld dorför investeeren wull oder de toseggen de, de fardige Reeg dorna denn ok intoköpen. Dat seeg nich so ut, as wenn dat noch mol wietergahn schüll mit The Avengers, bit söss Johren later de franzöösche Film- un Feernsehproduzent Rudolph Roffi an Brian Clemens de Fraag stellt hett, wat nich Linda Thorson in ehr Rull as Tara King in en Warffilm för Champagner mitmaken künn. Ok Patrick Macnee weer dorin as John Steed to sehn, as de beiden na en klassische Kampszeen tosamen en Sluck Champagner drinken deen. Dat seeg ut, as harr Roffi de söss Johren dör noch nich markt, dat de Reeg nich mehr lööp. He wull vun Clemens weten, worüm dat so weer. As he dorvun höör, dat dat keen Geldgevers geev, füng Roffi dat Söken an un rööp Clemens en poor Weken later wedder an, dat he nu dat Geld bisomen harr, un wat dat nu losgahn künn.[2].
De beiden Produzenten Brian Clemens un Albert Fennell hebbt denn in dree Maanden mit den Filmusiker Laurie Johnson en Produkschoonsfirma grünnt. Patrick Macnee wull dor toeerst nich recht wat vun weten, hett ut Neeschier denn doch toseggt, ü.a. ok, as he Clemens un Fennell dorbi wüss, de he respekteeren de. As ne’e Fronsrull an de Siet vun Steed sett sik Joanna Lumley ünner dreehunnert Bewarvers dör. Se harr vörher al mol en lütte Rull in en James-Bond-Film un is dormit de eenzige vun de Schauspelers, de in en Bond-Film to sehn weer, vördem se bi The Avengers mitspeelt hett. Man, de Verantwoortlichen hebbt seggt, dat schüll noch en annern Mann in de Reeg geven, de denn mehr de dulleren Saken övernehmken schüll, vun wegen dat Macnee nich mehr ganz so rüstig weer as fröher[2].
1. Staffel
ännernDe Produkschoon güng in Grootbritannien in’n April 1976 los. Jüst as bi de Originalreeg geev dat ok hier Problemen bi de Produkschoon. So gifft dat ü.a. twee verschedene Anfangssequenzen to de Episoden. Bi de dat toeerst heten hett, dat de Live-Tosamenstellen för den amerikaanschen Markt dacht weern an Steed vun de Reekneranimeerte Sequenz vun’t Original. Bi de Live-Biller shüllt ok en poor vun Joanna Lumleys Bildschirmproven dorbi wesen. Annere Borns seegt, dat de an’n Reekner animeerte Vörspann nich rechttietig fardig worrn is to den plaanten Sennentermin un de Live-Biller dorüm gau even tosamenschoostert worrn sünd[2]. Macnee hett dat gau beduert, dat he toseggt harr mittomaken, man liekers hett de Feernsehreeg ok ehr goden Sieten wiest. Dat Agentenpoor Purdey & Gambit hett goot mitenanner speelt un harr meist noch wat mehr utfielt warrn künnt. Steed dorgegen kummt in de Reeg nich mehr so to Gellen un weer villicht beter as’n Oort ne’e „Mudder“ (dat is de Geheemdeenstbaas) anleggt worrn, an Steed dat he jümmers versöcht mit sien jöögdhaften Kollegen Schritt to hollen.
Bi de Produkschoon weer ok wedder vele vun de Speelbasen dorbi, de all för de Originalreeg arbeit harr. Un in de Episood To Catch a Rat hett man sogor’n Bagen slahn torüch to de Anfäng, as neemlich Ian Hendry – de in de eersten Staffel 1961 noch de Hööftfigur vun de Reeg speelt harr – as Gast in en Hööftrull to sehn weer. Vun de Maakoort slutt de Reeg an de letzte Staffel vun’t Original an un hett jüst so noch de Kummedie-Elementen un ok de sünnerboren Figuren as fröher. Man, de Geschichten sünd harder un luder worrn mit mehr Action un mit mehr Insatz vun Füerwapen un doröfr ahn de albernen elementen, de to’n Bispeel vörher veel dör „Mudder“ maakt woorn sünd.
Na dörteihn Episoden – wat normalerwies blots en halve Staffel is – hebbt de Produzenten de Reeg ünnerbroken, üm sik nee to arrangeeren. De Folgen weern:
|
|
2. Staffel
ännernNa de eersten Staffel güng dat mit The New Avengers jüst so los, as dat bi de letzten Staffel vun dat Original wesen is: De utlännschen Geldgevers wulln jümmer mehr mitsnacken un Influss nehmen op den Inholt vun de Feernsehreeg. So wulln de Franzosen dörsetten, dat Purdey noch mehr Sex-Appeal kriegen schüll, wiel de Kanadiers nu ok Folgen in jemehr egen Land hebben wulln. An’n de Figur Purdey is opletzt nich veel ännert worrn, man se kreeg mehr Andeel un weer mit ehr Geföhlen mehr in de Geschichten inbunnen. Butendem hett se ne’e franzöösche Kledaasch kregen. De Öörd, an de de Episoden spelen deen hett sik in de tweeten Staffel ännert: Veer vun de Folgen sünd an in Kanada un dree in Frankriek dreiht worrn[3].
In Grootbritannien harr dat ITV Nettwark en Problem, sik eens to warrn, wanneer de Reeg utstrahlt warrn schüll. Se hebbt sik an’t Enn op dree Termienn in de Nacht eenig, de aver all nich to best weern. In de USA weer de CBS de Ansicht, dat de Reeg to brutal weer un hett ehr eerst half twölf in de Nacht utstrahlt. Un so weern de Makers al wedder to de Hälft vun de tweeten Staffel in Geldnoot, liekers, dat de Feernsehreeg groten Spood hebben künnt harr. Mit Help vun de Kanadiers is de tweete Staffel över de Runnen bröcht worrn, man to glieken Tiet güng mit de Utlagern vun de Dreihöörd na Kanada ok en groten Deel vun de Kontroll verloren, un de Gööd vun de Episoden leet na. Dat geev nu woll noch Bestellen vun The New Avengers ut de helen Welt, man för en wietere Staffel weer nich noog Swung in de Saak kamen, as dat de Verantwortlichen dormit wieter maken wullen. So bleev dat bi wietere dörteihn Folgen[3]:
|
|
Hööftfiguren
ännernJohn Steed
ännernJohn Steed (dorstellt vun Patrick Macnee) is in disse Feernsehreeg al dat Öller antomarken, as bi de Produkschoon de eersten Folgen vun de Originalreeg The Avengers al föffteihn Johren torüch legen hebbt. De Charakter vun Steed hett sik in’n Grunnen nich ännert in’n Vergliek to de fröhere Reeg. He is jümmer noch de Gentleman-Tyyp, de mehr mit sien Kopp arbeiten deit as mit sien Füüst oder mit Füerwapen. Man, as Folg vun sien Öller is Steed nu ok nich mehr direkt mit de Gegners befaat – dorför sünd nu de jüngeren Agenten Purdey un Gambit tostännig. Steed stellt mehr den Kopp vun de Dreeergrupp dor, bi den de Fadens tosamenloopt. Wenn he de annern vertellt, wat se doon schüllt, denn warrt dor nich lang na fraagt. He sülvst hett blots af un to noch sülvst mit de Gegners to doon, liekers kummt dat fakener mol vör, dat Steed an’t Enn as de letzte Noothelp ingrippt, wenn Purdey un Gambit denn doch mol in Gefohr kamt.
Purdey
ännernPurdey is de Fronshööftrull in de ne’en Avengers-Reeg, woans de Figur vullstännig heet, warrt in de Reeg nie vertellt. Oorsprünglich weer de Naam Charlie vörsehn[2]. Speelt weer de Rull vun Joanna Lumley, de sik ünner 300 Bewarvers op de Rull dörsett hett. Mit Purdey weer in de Rull wedder en Fro togang, de sik to helpen weet un ok in’n Kamp gegen Mannslüüd bestahn kann. Ehr sünneret Markmol is ehr bannige Beweglichkeit in de Been, mit de se ut’n Stand bit in Kopphööch pedden kann. Disse Anlaag hett se ut ehrn vörmoligen Beroop motbröcht, as se in’t Ballett danst hett, bit man ehr dor rutsmeten hett, vun wegen dat so to groot weer. Op disse Tiet warrt in de Episode 19 („Obsession“) in en Torüchblennen ingahn, as Purdey kort dorvör stünn, mit ehrn dormoligen Levenspartner en gemeensome Tokumst optoboen.
Purdea warrt in de helen Feernsehreeg vör allen dör de Anmarken vun Steed un Gambit as en vullkamen sünnern Minschen dorsteelt un meist anhimmelt. Dat gifft ehr en Oort vun Aura un stellt ehr as’n Lichtgestalt dor. Dorbi kann se aver afsluut sülvst op sik oppassen un is prägt vun en bannige Starkmödigkeit. Liekers bringt se aver ok Geföhl in de Reeg mit rin.
Mike Gambit
ännernMit Mike Gambit warrt in The New Avengers en kumplett ne’en Tyyp Mann in de Reeg inbröcht, de sik düchtig ünnerscheedt vun den britischen Gentleman, as Steed een dorstellt. Speelt warrt de Rull vun Gareth Hunt. De Rull Mike Gambit is as en Mischen ut Sladoot un Sunnyboy anleggt. He weet jümmer un in jede Situatschoon wat wedder to seggen, un hett jümmer en lockeren meist frechen Spröök praat. As em tyypsch Markmol is em en Oort vun Sexismus to egen, to’n annern warrt he in de Episoden faken as Neegkämper dorstellt, de meist nich ünnertokriegen is. Butendem is Gambit ’n groten Fründ vun Scheetwapen.
De Achtergrund vun de Person Gambit warrt in de Reeg nich opdeckt. Man, in sien Beroop is he meist de harde Hund, de an sik blots een eenzigen wunnen Punkt hett, neemlich ween een sien Partnersche Purdey to dicht an’n Lief rückt. Mit ehr versöcht he jümmer wedder antobanneln, hett dormit ave keen Spood. Liekers sünd se beide över en deepe Fründschap verbunnen.
Verbinnen to The Professionals
ännernDe Produkschoon to de Feernsehreeg The Professionals is 1977 anlopen. Se slutt dormit vun de Tiet her dicht an den Avengers-Nafolger an. Wohrhaftig sünd sik de beiden Regen in eenige Saken teemlich gliek, wat nich toletzt doran liggt, dat Mark One Productions de Produkschoonsfirma weer, de beide Reegen produzeert hett. Se höör to glieke Delen Laurie Johnson, Brian Clemens un Albert Fennell, de vörher al groten Andeel an den Spood vun „The Avengers“ harrn.
De beiden Staffeln vun The New Avengers schient en Oort Övergang dortostellen twüschen de beiden Produkschonen. To’n een övernehm se den egenen Humor vun de fröheren Avengers-Staffeln, wies sik to’n annern aver al düütlich gewaltbestimmter, so as „The Professionals“. De Verknütten harr ehrn Hööchpunkt in de Episood Obsession, wo de beiden lateren Hööftdorsteller vun „The Professionals“, Martin Shaw un Lewis Collins, mitspeelt hebbt. Collins verafscheedt sik in de Folg intressanterwies mit de Wöör „We should work together again – good team“. To de Tiet weer aver dat Casting to „The Professionals“ noch gor nich afslaten[4].
Borns
ännernLiteratur
ännern- Franziska Fischer: Msr. Peel, wir werden gebraucht! Mit Schirm, Charme und Melone. Das Buch zur Serie, Bertz + Fischer Verlag, 3. Oplaag, Berlin 2006, ISBN 3865051596
Weblenken
ännern- The New Avengers in de Internet Movie Database (engelsch)