Umbriel (Maand)

Umbriel is een von de fief groten Maanden von den Planet Uranus. He is an'n 24. Oktober 1851 von den britschen Astronom William Lassell opdeckt worrn. Man de Naam wörr vörslaan von John Herschel, den Söhn von den Uranus-Opdecker Wilhelm Herschel. De groten Maanden heebt al Naamen kregen von Figuren ut de Warken von William Shakespeare oder Alexander Pope, so ok Umbriel, wat een unfründlichen Geist ut Popes „The rape of the lock“ (platt: De Lockenroof) is.

Ümlop

Umbriel is in't Middel so bi 266.300 km wiet von Uranus weg un ümkreist em eenmal in 4 Daag, 3 Stünnen und 27 Minuuten in een bunnen Rotatschoon. Dat heet, dat Jümmer de glieke Siet von den Maand no Uranus wiesen deit, as de Maand sik bi so een Ümlop ok jüst eenmal um sik sülbst dreiht.

De Baan von Umbriel is mit een Exzentrizität von 0,005 meist kreisrund un üm 0,4° gegen den Äquater von'n Uranus kippt.

Egenschoppen

In'n Januar 1986 is de Ruumsond Voyager 2 an den Uranus vörbiflogen un hett dorbi ok bannig veel Fotos von Umbriel maakt und den Maand vermeten. Umbriel hett een Dörmeter von 1169 km un een middlere Dicht von 1,4 g/cm³. De Maand is wohrschienlich gröttstendeels ut Wateries mit noch een Deel Silikat-Steen und Kohlenstoff-Verbinnen, wie t. B. Methan tohopensett.

Umbriel hett eene Albedo von 0,18. De Bavensiet is dormit een beten düsterer as de von de anneren groten Maanden. Se sütt old un verkrust ut un zeigt blots wenig Teken von geologsch Vörgäng. In de Nöög von den Umbriel-Äquater gifft dat een hellen Ring, von den man noch nich recht weet, wo de herkummt. De Wetenschopplers glövt ober, dat dor villicht Ies ut de Krust to'n Vörschien kommen is, as dat mol een Inslag von een annern Himmelskörper geven hett.

Maanden vun den Planeten Uranus

Kiek ok na bi: List vun de Uranusmaanden