Westnedderdüütsch

Westnedderdüütsch Neddersassisch, Nedersaksisch, Westneddersassisch
Snackt in	Düütschland Düütschland Nedderlannen (Europa) Nedderlannen Danemark Däänmark
Klassifikatschoon	Germaansch Westgermaansch Noordseegermaansch Plattdüütsch Westnedderdüütsch
Spraakkoods
ISO 639-3	nds Oostfreesch: frs Westföölsch: wep Plautdietsch: pdt Achterhooksch: act, Groningsch: gos, Twentsch: twd

Westnedderdüütsch oder ook Neddersassisch (hoochdüütsch Westniederdeutsch oder Niedersächsisch, nedderlandsch Nedersaksisch) betekent de plattdüütschen Dialekte in Noordwestdüütschland un Oostnedderland un is mit dat Oostnedderdüütsche ene van den twee traditschonellen Unnergruppen för de plattdüütschen Dialekten in de Dialektologie.

Westnedderdüütsch Gebeed

De Grenze na dat Oostnedderdüütsche is de Isoglosse för den Eenheidspluraal. Dat Oostnedderdüütsche bruukt -en, so as wi maken, dat Westnedderdüütsche bruukt to’n gröttsten Deel -(e)t, so as in wi maket/maakt.

Dat Westnedderdüütsche deelt sik in de groten Dialektrüme: Westföölsch, Oostföölsch un Noordneddersassisch.

De westnedderdüütschen Dialekte sind – uutbenomen Sleswig, Oostfreesland un Grönnen – de Dialekte van dat ole sassische Stammland, de oostnedderdüütschen Dialekte de Mundaarden in dat vöörmaals slaawsche „Nieland“, in dat Nedderdüütsche mit de Oostkolonisatschoon in’n Middelöller trocken sind.

Niegeren Unnersöök, de den Spraakafstand twischen Dialekten meten deit, stellt man de traditschonele Aard de plattdüütschen Dialekte in West- un Oostnedderdüütsch to delen in Fraag. Vanwegen dat’t oostnedderdüütsche Mäkelborger Platt dichter bi dat westnedderdüütsche Noordneddersassisch steit, as bi dat even so oostnedderdüütsche Brannenborgsch, is dat villicht sinniger de plattdüütschen Dialekte in ene noordnedderdüütsche un süüdnedderdüütsche Gruppe to unnerdelen.

Literatuur

• Michael Elmentaler: Nordniederdeutsch, Ostfälisch, Westfälisch, Nordrheinmaasländisch. In: Joachim Herrgen, Jürgen Erich Schmidt: Sprache und Raum. Ein internationales Handbuch der Sprachvariation. Band 4: Deutsch (= Handbücher zur Sprach- und Kommunikationswissenschaft. Band 30.4). De Gruyter Mouton, Berlin/Boston 2019, ISBN 978-3-11-018003-9, S. 550–590.