Riksesniper

Riksesniper er tre artar vadefuglar i ein biologisk familie Rostratulidae. Utsjånaden deira kan likne på bekkasinar, men dei er rekna å vere nærast i slekt med bladhøns.

Riksesniper
Riksesnipe, Rostratula benghalensis Foto: J.M.Garg
Systematikk
Rike:	Dyr Animalia
Rekkje:	Ryggstrengdyr Chordata
Underrekkje:	Virveldyr Vertebrata
Klasse:	Fuglar Aves
Underklasse:	Neognathae
Overorden:	Neoaves
Orden:	Vade-, måse- og alkefuglar Charadriiformes
Familie:	Riksesniper Rostratulidae Ridgeway, 1919

Riksesnipene har korte bein, og har langt nebb med form som nebbet hos sniper, fjørdrakta vekkjer meir merksemd enn hos snipene. Dei syner kjønnsdimorfisme både i storleik og i fjørdrakta, og hannane er generelt meir avtona i fager og er mindre. Alle tre artar har store framratta auge, og dei er aktive i skymringa, jamvel nær nattlege i levesettet sitt.

Formeringsbiologien til riksesnipene er noko ulike i dei to slektene. Rostratula er generelt polyandriske, medan dvergriksesnipa er ein monogam art. Hofuglane i slekta Rostratula vil knyte seg til fleire hannar i paringstida, men så fort egga er lagt vil hannane ta seg av ruginga og omsorg av ungane. Reiret av begge artar i slekta er grunt koppforma, ofte bygd på ei plattform av vegetasjon. Kullet er på 2 til 4 egg, som vert klekt etter 15 til 21 dagar.

Alle riksesniper lever i sivsumpar og myrer, vanlegvis i låglandet. Utanfor hekkesesongen lever dei generelt einslege. Dei er altetande, tar fôr av virvellause dyr og frø. Byttedyr inkluderer leddormar, sniglar, akvatiske insekt og krepsdyr. Frøa av grasvekstar som hirse og ris kan òg danne ein vektig del av dietten til enkelte bestandar.

Artar

Bladhøns i rekkjefølgje etter Clementslista frå desember 2008 med norske namn etter Norske navn på verdens fugler.

• Riksesnipe, Rostratula benghalensis, lever på myr og marskland i Afrika, India og Søraust-Asia.
• Australriksesnipe, Rostratula australis, er ein sjeldan, nomadisk art med minkande populasjon, han finst berre i Australia.
• Dvergriksesnipe, Nycticryphes semicollaris, lever på grasland og marskland i sørlege Sør-Amerika.

Kjelder

• Denne artikkelen bygger dels på «Painted snipe» frå Wikipedia på engelsk, den 3. november 2009
• Syvertsen, P. O., Ree, V., Hansen, O. B., Syvertsen, Ø., Bergan, M., Kvam, H., Viker, M. & Axelsen, T. 2008. Virksomheten til Norsk navnekomité for fugl (NNKF) 1990-2008. Norske navn på verdens fugler. Norsk Ornitologisk Forening sin nettstad (publisert 22.5.2008)
• Clementslista frå desember 2008. Nedlasting av lista, lese 19. september 2009

Bakgrunnsstoff

Wikimedia Commons har multimedia som gjeld: Riksesniper