Agnolo Bronzino

Agnolo di Cosimo (17. november 1503–23. november 1572) vanlegvis kjend som Il Bronzino eller Agnolo Bronzino, var ein italiensk manieristmålar frå Firenze. Han er kjend både som målar av portrett og av religiøse motiv.

Agnolo Bronzino
Statsborgarskap	Italia
Fødd	17. november 1503 Firenze
Død	23. november 1572 (69 år) Firenze
Yrke	kunstmålar, lyrikar, bygningstegner
Språk	italiensk
Medlem av	Accademia delle Arti del Disegno
Agnolo Bronzino på Commons

Ein allegori over Venus og Cupido, 1540-45

Eleonora di Toledo og sonen Giovanni, 1544-45

Liv og gjerning

Bronzino var fødd i Firenze, og var først elev av Raffaellino del Garbo. Seinare gjekk han i lære hos Jacopo da Pontormo og vart mykje påverka av hans målestil.

Bronzino fekk i 1539 sitt fyrste oppdrag frå Medici-hoffet. Han vart sett til å lage dekorasjonar til bryllaupet mellom greven Cosimo I de' Medici og den rike Eleonora di Toledo, dottera til visekongen av Napoli. Ganske snart vart han hoffmålar for greven, noko han var det meste av si seinare levetid. Han spela elles ei viktig rolle i aktivitetane til Accademia del Disegno i Firenze, der han var stiftande medlem i 1563.

Bronzino måla portrettfigurar som kom til å ha innverknad på europeisk hoffportrettering i eit hundreår. I tillegg måla han også idealiserte portrett av fortidige poetar som Dante og Francesco Petrarca. Hans kanskje mest kjende verk er rekka av portrett av Cosimo I de' Medici, Eleonora og folk frå hoffet, som til dømes Bartolomeo Panciatichi og kona hans. Portretta av den genovesiske admiralen Andrea Doria, samt det mindre typiske måleriet av guden Neptun er også mellom hans fremste verk.

Gjennom to år, 1546-48, i Roma laga Bronzino ei rad religiøse måleri, så som Jomfru Marias oppstode. I ein del av hans religiøse måleri syner særleg elegante former, til dømes i Laurentius martyrium frå 1569. Alle dei usedvanleg forvrengte positurane i biletet kan sporast tilbake til Rafael eller Michelangelo, to målarar som Bronzino ver mykje inspirert av.

Målaren Alessandro Allori var favoritteleven hans, og Bronzino budde i Allori-familien sitt hus då han døydde i Firenze i 1572.

Bilde av Bronzino

• 
  Portrett av ei kvinne med skjødehund (1530-åra).
• 
  Portrett av ein ung mann (1530-åra).
• 
  Eleonora av Toledo (1543)
• 
  Den heilage familien og heilage Anna med Johannes (ca. 1550)

Kjelder

• Denne artikkelen bygger på «Agnolo Bronzino» frå Wikipedia på bokmål, den 15. mars 2013.