Jack Nitzsche

Bernard Alfred «Jack» Nitzsche (22. april 1937–25. august 2000) var ein arrangør, produsent, låtskrivar og Oscarvinnande komponist av filmmusikk.

Jack Nitzsche
Foto: Brian Ashley White
Fødd	22. april 1937 Chicago i Illinois
Fødestad	Chicago
Død	25. august 2000 Hollywood i Los Angeles i California (63 år)
Dødsstad	Hollywood
Fødenamn	Bernard Alfred Nitzsche
Alias	Jack Nitzsche
Opphav	USA
Aktiv	1955-2000
Sjanger	Rock, jazz, klassisk
Instrument	Saksophone, piano
Tilknytte artistar	Sonny Bono, Phil Spector, The Wrecking Crew, Neil Young og Crazy Horse, The Rolling Stones, Willy DeVille
Verka som	Komponist, arrangør, studiomusikar, plateprodusent
Gift med	Buffy Sainte-Marie

Han vart fødd i Chicago i Illinois og flytta til Los Angeles i 1955 med ambisjonar om å verte ein jazzsaksofonist. Han starta å jobbe med å kopiere notar då han møtte Sonny Bono, som han skreiv songen «Needles and Pins» med for Jackie DeShannon, seinare spelt av Cher, The Searchers, The Ramones og Crack the Sky.

Han vart etter kvart ein arrangør og dirigent for den viktige produsenten Phil Spector og gjorde instrumentering på songen «River Deep, Mountain High» av Ike and Tina Turner.

Utanom Spector arbeidde han nært med vestkystartistar som Leon Russell, Glen Campbell, Carol Kaye og Hal Blaine i ei gruppe kalla The Wrecking Crew. Dei fungerte som støtteband for mange popinnspelingar på 60-talet, mellom anna for The Beach Boys og The Monkees.

Då han organiserte musikk for fjernsynsprogrammet The T.A.M.I. Show i 1964 møtte han The Rolling Stones og medverka med piano på albuma The Rolling Stones, Now! (eller The Rolling Stones No. 2 i Europa), Out of Our Heads, Aftermath og Between the Buttons samt hitsinglane «Paint It Black» og «Let’s Spend the Night Together», og korarrangement for «You Can’t Always Get What You Want». I 1968 introduserte Nitzsche bandet for slidegitaristen Ry Cooder som fekk stor innverknad på stilen til bandet i perioden 1969-1973.

Nitzsche jobba mykje med Neil Young, første gong som produsent og arrangør på Buffalo Springfield sin «Expecting To Fly», som av mange kritikarar vert rekna som ein milepåle i den psykedeliske perioden. I 1968 produserte han Young sitt sjølvtitulerte debutalbum i lag med David Briggs. Sjølv om Young varierte kraftig i stil, heldt han fram å samarbeide med Nitzsche på nokre av hans mest kommersielt suksessrike album, som Harvest. Nitzsche spelte òg elektrisk piano med Crazy Horse i 1970 og produserte debutalbumet deira (utan Young) eitt år seinare.

Sjølv om han hadde stor suksess starta han å lide av depresjonar og problem knytt til narkotikabruk. Etter han kom med skarp kritikk av Young i eit intervju i 1974, der han møtte full, vart forholdet dei to i mellom dårleg og dei samarbeidde berre sporadisk i tida etter. I 1979 vart han arrestert for vald mot kjærasten Carrie Snodgress.

Rundt same tida produserte han album for Graham Parker og Willy DeVille, og starta å konsertere seg meir om filmmusikk enn popmusikk. Etter kvart vart han ein av dei mest framtredande filmmusikkomponistane i Hollywood og vann ein Oscar i lag med Buffy Sainte-Marie for «Up Where We Belong» frå An Officer and a Gentleman frå 1982.

Han døydde i Hollywood i 2000 av hjartestans etter å hatt periodisk bronkitt.

Diskografi

• 1972 : St. Giles Cripplegate
• 1978 : OSR Blue Collar
• 1984 : OSR The Razor's Edge
• 1991 : OSR The Indian Runner med David Lindley
• 2007 : OSR Quentin Tarantino sin Death Proof

Filmmusikk

• Village of the Giants (1965)
• Performance (1970)
• Greaser’s Palace (1972)
• Sticks and Bones (1973)
• Moment to Moment (1975)
• One Flew Over the Cuckoo's Nest (1975)
• Heroes (1977)
• Blue Collar (1978)
• Hardcore (1979)
• When You Comin’ Back, Red Ryder? (1979)
• Cruising (1980)
• Heart Beat (1980)
• Personal Best (1982)
• Cannery Row (1982)
• An Officer and a Gentleman (1982)
• Without a Trace (1983)
• Breathless (1983)
• Windy City (1984)
• The Razor's Edge (1984)
• Starman (1984)
• The Jewel of the Nile (1985)
• Stripper (1986)
• 9½ Weeks (1986)
• Stand by Me (1986)
• The Whoopee Boys (1986)
• Streets of Gold (1986)
• The Seventh Sign (1988)
• Next of Kin (1989)
• Revenge (1990)
• The Last of the Finest (1990)
• The Hot Spot (1990)
• Mermaids (1990)
• The Indian Runner (1991)
• Blue Sky (1994)
• The Crossing Guard (1995)

Bakgrunnsstoff

• The Sorcerer's Apprentice, fanside
• Jack Nitzsche diskografi
• Nitzsche på Spectropop

Kjelder

• Denne artikkelen bygger på «Jack Nitzsche» frå Wikipedia på engelsk, den 24. februar 2009.