Ostrava

Ostrava (tysk Ostrau, polsk Ostrawa) er den tredje største byen i Tsjekkia og det administrative senteret i regionen Mähren-Schlesien. Han ligg der elvane Ostravice, Oder og Opava renn i hop. Historia og veksten i byen har vore nært knytt til dei store førekomstane av svartkol av høg kvalitet i området rundt byen. Dette har gjeve byen utsjånad som ein industriby og kallenamnet «stålhjartet i republikken» under kommunisttida i Tsjekkoslovakia. Mange tungindustriselskap har i det siste anten vorte stengde eller omforma.