Interslavum

Interslavum (medžuslovjansky, меджусловјанскы) es konstrukteti slavi helpolingue, kel ha bli krea depos 2006 da grupe de linguistes ek diversi landes kun li eme ye kreo simpli e reglari lingue, kel Slaves de irgi nationalitate povud komprenda sin preparatione. Lun vordaro e gramatike es konstruktet taliman, ke toti formes exista ye toti o aminim ye li majoritate del slavi lingues. Dunke li lingue es helpiv non solim por Slaves, ma anke por turistes voyajanti tra li slavi landes.

Interslavum Li flage del interslavum
Propri nome	medžuslovjansky меджусловјанскы
Informatione
Parlat	Esti Europe
Ofisial lingue	nulilok
Parleres	200-500
Range	non in 100 maxim grandi
Alfabete	latini kun kelki modifikationes, sirili
Akademie del lingue	nuli
Linguistikal klasifikatione
Lingual familie	konstrukteti lingue
Lingual grupe	international auxiliari lingue
Kodes del lingue
ISO 639-1
ISO 639-2
ISO 639-3	isv
SIL	[1]

Križanićen «Gramatično izkazanje ob ruskom jeziku»

Li idee de panslavi lingue ha exista durant kelki sekles. On pove dikte, ke interslavum es maxim oldi konstruktet auxiliari lingue, kreat plu kam du sent yares ante Volapük e Esperanto. Li unesmi gramatike esed skriptet dal kroati prestro Juraj Križanić ye 1665 sub li title Gramatično izkazanje ob ruskom jeziku ("Gramatikal explikatione pri li rusi lingue"); lo elekted li nome "rusum" pragmatim por pleda li tsar, ma faktim disi lingue esed basat plu sur kirkeslavum e lon propri dialekte de kroatum. After Križanić anke multi altres ha krea projektes por panslavi o interslavi lingue, maxim ye li 19esmi e 20esmi sekle, inter keles li famos panslavistes Jan Herkeľ e Matija Majar e li cheki novialiste Ladislav Podmele. Malgre ke omni disi projektes ne es identi, lus es tantim simil a mutu, ke evidentim on mus konsidera lus kom uni e li sami lingue.

Nunitem li interslavi lingue konsista ek du projektes: Slovianski (plu basat sur li moderni slavi lingues) e Novoslověnsky (plu basat sur oldi kirkeslavum). Kunu lus have sirk 200-500 useres.

Alfabete

Pro ke interslavum es sonal insted national lingue, li latini e sirili alfabetes bli usa egalim.

Li basal latini alfabete konsista ek li sekuent literes: A B C Č D E F G H I J K L M N O P R S Š T U V Y Z Ž. Optionalim on pove anke usa kelki aditional literes, kel kontine informatione pri etimologia e pronuntiatione: Å Ć Ď Đ Ě Ę Ľ Ń Ò Ŕ Ś Ť Ų Ź.

Interslavun sirili alfabeti konsista ek li sekuent literes: А Б В Г Д Е Ж З И Ј К Л М Н О П Р С Т У Ф Х Ц Ч Ш Ь. Anke hir on pove renkontra altri literes (Ъ Ѣ Ѧ Ѫ) i ligatures kom Я Ю Є e set.

Gramatike

Kom li slavi natur-lingues interslavum have richi sisteme de inflektiones. Es tri genus (maskulinum, femininum e neutrum) e du numeres (singulare e plurale). Substantives, adjektives e pronomines in interslavum have six kasus: li nominative, genitive, dative, akusative, instrumentale e lokative. Substantives pove anke have li vokative. Interslavun substantives bli deklina segun quar deklinationes:

• maskulin substantives e neutri substantives kun li finale -o/-e
• feminin (e kelki maskulin) substantives kun li finale -a
• feminin substantives ku mol final konsonante
• optional atemati deklinatione, primim kontinenti neutri substantives kun li finale -ę e feminin substantives kun li finale -ov

Li unesmi e duesmi deklinationes have hardi i moli subdeklinatione.

Anke le verbes have pleni flektione. Maximi verbes exista in du versiones: perfektiv aspekte e imperfektiv aspekte. Es tri modes (indikativ, konditional, imperativ) e tri tempus (presente, perfektum, futurum; optionalim exista anke simpli preterite e plukamperfektum). Seterim es aktivi i pasivi partisipes. Verbes bli konjuga segun du konjugationes.

Malgre ke interslavun gramatike es plu komplexi kam li gramatikes de tipi helpolingues, li lingue es min desfasil kam li slavi natur-lingues, pro ke es tre poki nonreglari formes.

Extri linkes

• Li chef-pagine de interslavum
• Internet-jurnale in interslavum
• Interslavi lexike
• Grupe che Facebook