Belfast

Ch't' articl'ye fut c'menchie en Jèrriais

Belfast est eune ville en Irlande du Nord. D'pis la s'pathâtion d'l'Irlande en 1921, Belfast, la deuxième pus grande ville en Irlande auprès Dublîn, a 'té la capitale d'la pays dé l'Irlande du Nord.

Eune carte tchi mouontre où'est qu'est Belfast en Irlande du Nord

Histouaithe

Dans les touos vièrs temps, y'avait des câtchieaux d'l'Âge dé Bronze là sus les bords d'la riviéthe Farset. Lé nom Belfast veint dé l'Irlandais Béal Feirste tchi veurt dithe l'engoulême du Farset. La riviéthe Farset a dispathu souos la ville d'achteu et ch'est la riviéthe Lagan tch'a 'té împortante pouor lé conmèrce avaû les dreins siècl'yes.

Au 17^e siècl'ye la ville dé Belfast attriotchit des gens et la ville dévînt un centre dé l'îndustrie du lîn.

Pouor lé c'menchement du 20^e siècl'ye Belfast 'tait la pus grande ville en Irlande. Les chantchièrs dé Belfast bâtîdrent des navithes – lé Titanic fut bâti à Belfast en 1911.

Lé hèrtchîn entré les Belfastchais Catholiques et Protestants a mèrtchi la ville. Au jour d'aniet, la ville a 'té pustôt ravigotée atout des nouvieaux bâtisses et dêv'loppements conmèrciaux et tchultuthels.