Batalha de Nahrawan
La batalha de Nahrawan se debanèt lo 17 de julhet de 658 durant la Premiera Fitna. Opausèt una armada menada per lo califa Ali e sei fius Hassan e Hussein (40 000 òmes) ai fòrças kharijitas dirigida per Abdullah ibn Wahb (4 000 òmes). Aqueu conflicte es una consequéncia de la lucha de succession per lo Califat opausant Ali e Muawiya. D'efiech, per amaisar lei tensions, lei dos òmes avián acceptat un arbitratge. Pasmens, aquò suscitèt l'ostilitat dei kharijitas que consideravan coma una impietat lo fach d'acceptar de sometre la designacion dau califa – expression de la volontat de Dieu segon elei – a un tribunau uman. Abandonèron donc Ali e intrèron en rebellion, mai foguèron esquichats a Jisr al-Nahrawan, a 19 km de Bagdad. Lei subrevivents s'enfugiguèron vèrs lei regions perifericas dau territòri musulman (Magrèb, Oman, etc.).
La batalha de Nahrawan marquèt la rompedura entre lei kharijitas e la màger part dei musulmans. Afebliguèt tanben lo camp d'Ali que poguèt pas s'opausar a la conquistas d'Egipte per Muawiya[1]. Finalament, Ali foguèt assassinat en 661 per un kharijita e Muawiya fondèt lo Califat Omeia.